Kiitettidaageetu Oosuwa 17:1-34
17 Eti Amppipholiisanne Apholooniya giyo katamatuura aadhdhidi, Ayhudatu shiiqo keettay deꞌiyo Tasalonqqe gakkidosona.
2 Phawuloosi ubbatoo oottiyogaadan shiiqo keettaa geliis; yaatidi heezzu sambbatan Geeshsha Maxaafaa akeekanaadan maaddiiddi eta tamaarissiis;
3 I he xaafettidabaappe bessidi Kiristtoosi waayettidi hayqqananne hayquwappe denddana bessiyogaa qonccissiis; I, “Taani intteyyo abaa yootiyo Yesuusi Kiristtoosa” yaagiis.
4 Hegaappe denddidaagan, he asatuppe amaridaageeti ammanidi Phawuloosaaranne Sillaaseera zuppetiyogaa doommidosona, qassi Xoossaayyo goynniya Giriiketuppe keehi cora asaynne erettida macca asatuppe daroti hegaadan oottidosona.
5 Shin Ayhudati qanaatidi, giyan coo yuuyiya amarida iita asata shiishshidosonanne cora asaa denttettidi katamaa shabbiridosona. Eti Yaasoona keettaa penggiya mentti gelidosona, qassi Phawuloosanne Sillaasa asaakko kessanawu koyidosona.
6 He asati eta demmibookkona, yaanin Yaasoonanne hara amarida ishata katamaa haariyageetukko goochchi efiidi, bantta qaalaa xoqqu oottidi hagaadan giidosona: “Ubbasan kobaa kessida* asati hagaakka yiidosona,
7 qassi Yaasooni eta ba son ayssiis. Ha asati ubbay Yesuusa giyo hara kawoy deꞌees yaagi makkalidi, Qeesaari azazidobaa azazettokkona.”
8 Asaynne katamaa haariyageeti he ubbabaa siyido wode shabbirettidosona;
9 qassi eti koshshiya miishshaa* Yaasoonappenne haratuppe ekkidi eta birshshidosona.
10 Sohuwara ishati Phawuloosanne Sillaasa qammi Beeriya moyssidosona. Eti yaa gakkidi, Ayhudatu shiiqo keettaa gelidosona.
11 Beeriyan deꞌiyageeti siyidobay tumakkonne Geeshsha Maxaafaa ubba galla loytti pilggidi, qaalaa yeemottidi ekkido gishshawu, eti Tasalonqqen deꞌiyageetuppe aaruwan wozanay dooyettido asa.
12 Hegaa gishshawu, he asatuppe daroti ammaniya asa gididosona, qassi Giriike asatuppekka erettida daro macca asatinne amarida attuma asati ammaniya asa gididosona.
13 Shin Tasalonqqen deꞌiya Ayhudati Phawuloosi Beeriyankka Xoossaa qaalaa yootidoogaa siyidi, asaa denttettanawunne kobaa kessanawu yaa biidosona.
14 Yaatin ishati sohuwara Phawuloosa abbaa gakkanaashin moyssidosona, shin Sillaaseenne Ximootiyosi yan takkidosona.
15 Gidoppe attin, amaridaageeti Phawuloosa Ateena gakkanaashin moyssidosona; yaatin Sillaaseenne Ximootiyosi akko sohuwara yaana koshshiyogaa Phawuloosi etawu yootin eti yaappe biidosona.
16 Phawuloosi Ateenan eta naagiiddi, kataman eeqa misileti kumidoogaa beꞌido gishshawu A ayyaanay suulliis.
17 Hegaa gishshawu, Shiiqo keettan Xoossawu goynniya Ayhudatinne hara asati I tamaarissiyobaa akeekanaadan eta maaddiyogaa doommiis. Qassi giyan deꞌiya asatussikka ubba galla hegaadan oottiis.
18 Shin Eppiqoroosanne Zeeno* timirttiya kaalliya issi issi eranchchati aara palamettiyogaa doommidosonanne issoti issoti, “Ha tafaliinay ay yootanawu koyii?” yaagidosona. Harati qassi, “I hara biittaa xoossatubaa yootiyaba milatees” yaagidosona. Eti I Yesuusabaanne hayqqidaageeti denddanaagaa mishiraachchuwa yootiyo gishshawu hegaadan giidosona.
19 Hegaa gishshawu, eti A oyqqidi Ariyosppaagoosa efiidi, hagaadan giidosona: “Neeni yootiyo ha ooratta timirttee aybee?
20 Ayssi giikko, nuuni mule siyi erennabaa neeni yootaasa, qassi he yohoti aybakko nuuni eranawu koyoos.”
21 Ateena asaynne yan deꞌiya* hara biittaa asay ubbay shemppo wodiyan oorattabaa odoosona woy siyoosonappe attin, harabaa aybanne oottokkona.
22 Phawuloosi Ariyosppaagoosa giddon eqqidi, hagaadan giis:
“Ateena asatoo, intte hara asatuugaappe aaruwan ubbaban xoossatuyyo yayyiyaba milatiyogaa taani beꞌays.
23 Leemisuwawu, taani katamaa giddoora aadhdhiyo wode, intte goynniyobata* loytta xeellaydda, ‘Erettenna Xoossaassi’ geetettidi xaafettida yarshshiyo sohuwakka beꞌaas. Hegaa gishshawu, intte erennan goynniyobaa taani intteyyo yootays.
24 Saꞌaanne an deꞌiya ubbabaa medhdhida Xoossay saluwanne saꞌaa Godaa gidiyogaadan, asa kushen keexettida garuwan deꞌenna;
25 I asawu ubbawu deꞌuwa, shemppiyo shemppuwanne ubbabaa immiyo gishshawu, awu aybakko paccidobadan asi A maaddana koshshenna.
26 Qassi kumetta saꞌan deꞌana mala asaa ubbaa issi asappe medhdhiis, qassi bazzettida wodiya mooddiisinne asay deꞌiyo sohuwawu zawaa wottiis;
27 Xoossay nuussi ubbaassi mata gidikkonne, eti A koyanaadan, qassi minttidi koyikko, A demmanaadan hegaa oottiis.
28 Ayssi giikko, danttuwa xaafiya intte asatuppe issoti issoti, ‘Nuunikka A naata’ giidoogaadan, nuussi deꞌuwa immiday A, qassi nuuni qaaxxiyoynne hagan deꞌiyoy aana.
29 “Yaanikko, nuuni Xoossaa naata gidiyo gishshawu, Xoossay asay qoppidi medhdhido worqqaa woy biraa woy shuchchaa mala giidi qoppana koshshenna.
30 Xoossay asay eraa xayidi deꞌido he wodiya coꞌꞌu giidi xeellidoogee tuma; shin awaaninnne deꞌiya asay ubbay zilꞌꞌettidi laamettana koshshiyogaa haꞌꞌi yootiiddi deꞌees.
31 Ayssi giikko, I sunttido issi asa baggaara saꞌan deꞌiya asawu suure pirddaa pirddanawu halchchido gallassaa keeriis, qassi A hayquwappe denttiyogan asawu ubbawu waabe gidiyabaa oottiis.”
32 Eti hayqqida asay denddanaagaa siyido wode, issoti issoti qilliicidosona, harati qassi, “Nuuni ha yohuwabaa neeppe zaarettidi siyana” yaagidosona.
33 Yaagin Phawuloosi yaappe biis,
34 shin issi issi asati aara biidi ammaniya asa gididosona. Ariyosppaagoosa pirdda keettaa daannay Diyonaasiyosi, Damaariiso giyo maccaasiyanne haratikka he citan deꞌoosona.
Footnotes
^ Woykko “metuwa qaaserettida.”
^ Woykko “waabe gidiyabaa.”
^ Zeena kaalliyageeti Isxxoꞌike geetettoosona.
^ Woykko “beꞌanawu yaa yiida.”
^ Woykko “bonchchiyobata.”
