Kiitettidaageetu Oosuwa 18:1-28
18 I hegaappe simmin Ateenappe kiyidi Qoronttoosa biis.
2 Qassi Qalawudeyosi Ayhudati ubbay Roomeppe kiyanaadan azazido gishshawu, mata wode Xaaliyappe yiida, Phanxxoosan yelettida Aqiila giyo Ayhudaanne A machchiyo Phirisqqilo I yan demmiis. Yaatidi I etakko biis,
3 qassi ikka etadan dunkkaaniya sikkiyo gishshawu, eta son uttidi etaara issippe oottiis.
4 I sambbatan sambbatan ubba galla Ayhudatinne Giriiketi bantta qofaa laammidi ammananaadan maaddidi, shiiqo keettan etawu yootiis.*
5 Sillaaseenne Ximootiyosi Maqidooniyappe wodhdhiyo wode, Yesuusi Kiristtoosa gidiyogaa bessanawu Phawuloosi Ayhudatuyyo markkattiiddi, qaalaa yootiyogan sheekkiis.
6 Shin eti I yootiyobaa phalqqiyogaanne A boriyogaa aggennan ixxin, ba maayuwa qoqqofidi* etayyo hagaadan giis: “Intte ay hanikkonne hegee intte mooruwana. Hegan taani mooridobi baawa.* Hagaappe guyyiyan taani hara biittaa asaakko baana.”
7 I yaappe* aggidi A keettay shiiqo keettaa miyyiyan deꞌiyo, Xoossawu goynniya Tiitoos Yosxxoosa giyo bitaniya soo biis.
8 Shin shiiqo keettan kaalettiya Qarisphphoosi ba soo asaa ubbaara Godaa ammaniis. Qassi mishiraachchuwa siyida Qoronttoosa asatuppe daroti ammaniyogaanne haattan muukettiyogaa doommidosona.
9 Hegaa bollikka, Goday qammi ajjuutan Phawuloosayyo hagaadan giis: “Yayyoppa, shin ubbatoo yoota, qassi sirphphi gooppa,
10 taani nenaara deꞌiyo gishshawu, ooninne nena qohanawu ba kushiya ne bolli denttenna; ayssi giikko, ha kataman taayyo daro asay deꞌees.”
11 Hegaa gishshawu, I eta giddon Xoossaa qaalaa tamaarissiiddi issi layttanne usuppun aginaa yan takkiis.
12 Gaaliyosi Akaayiya haariyo* wode, Ayhudati Phawuloosa bolli issippe denddidosonanne pirddiyo sohuwa A efiidi,
13 hagaadan giidosona: “Ha bitanee wogaa phalqqiya ogiyan Xoossawu goynnanaadan asaa tamaarissees.”
14 Shin Phawuloosi haasayana haniyo wode, Gaaliyosi Ayhudatuyyo hagaadan giis: “Ayhudatoo, yohoy mooro woy wolqqaama dano gidiyakko, intte yootiyobaa taani danddayada siyiyogee maara.
15 Intte haasayan, sunttaaninne intte wogan palamettiyaba gidikko, hegaa intte intteyyo maarayana bessees. Taani hageetussi daanna gidanawu koyikke.”
16 Yaagidi, I pirddiyo sohuwappe eta kessi yeddiis.
17 Hegaa gishshawu, eti ubbay shiiqo keettan kaalettiya Sostteniisa oyqqidi, pirddaa sohuwa sinttan A shociyogaa doommidosona. Shin Gaaliyosi he ubbaban mule gelibeenna.
18 Shin Phawuloosi yan daro gallassaa takki simmidi, ishata saro deꞌite yaagidi, Phirisqqiliiranne Aqiilaara markkabiyan Sooriya biis. I geppido gishshawu, Kinkkiriyan ba huuphiya qanttidi qanxxissiis.
19 Yaatidi, eti Efisoona gakkiyo wode harati kataman takkidosona, shin Phawuloosi shiiqo keettaa gelidi, Ayhudati akeekanaadan maaddanawu maliis.
20 I takkishshanaadan eti oychchidi aggennan ixxikkonne, eeno gibeenna,
21 Shin I eta saro deꞌite yaagidi, etayyo, “Yihoowa shene gidikko, taani simmada yaana” yaagiis. Qassi Efisoonappe denddidi markkabiyan gelidi,
22 Qiisaariya wodhdhiis. Qassi pude kiyidi* galchchaa beꞌi simmidi Anxxookiya wodhdhiis.
23 I yan amarida wodiya takki simmidi, yaappe denddidi Galaatiyanne Pirggiya biittatun Yesuusa kaalliyageeta ubbaa minttettiiddi, dumma dumma heeraa biis.
24 He wode, Iskkinddiriyan yelettida Aphiloosa giyo issi Ayhuday Efisoona biis; I Geeshsha Maxaafata loytti eriya, haasayankka gooba asa.
25 He bitanee Yihoowa ogiyan tamaariis,* qassi I ayyaanan suulliiddi,* Yesuusabaa suure haasayeesinne tamaarissees, shin haattan muukettanaadan Yohaannisi yootidoogaa xalaalaa erees.
26 I shiiqo keettan xalidi haasayiyogaa doommiis, qassi Phirisqqilanne Aqiili I yootiyobaa siyidi, A banttanaara efiidi Xoossaa ogiya ayyo geeshshidi qonccissidosona.
27 Hegaa bollikka, I Akaayiya pinnanawu koyido gishshawu, Yesuusa kaalliyageeti A mokki ekkanaadan woossidi, ishati etawu xaafidosona. Yaatin I yaa gakkido wode, laggetiyabi baynna Xoossaa kehatettan ammaniya asa gididaageeta keehi maaddiis;
28 ayssi giikko, I Yesuusi Kiristtoosa gidiyogaa Ayhudatuyyo Geeshsha Maxaafatuppe bessiiddi, keehi murttidi, eti balidoogaa daro naqaashatun asaa sinttan qonccissiis.
Footnotes
^ Woykko “eti akeekanaadan maaddiis.”
^ Maayuwa qoqqofiyogee bessiyabaa oottidoogaa qonccissiyaba.
^ Mise, “Taani geeshsha.”
^ Hegee shiiqo keettaa.
^ Beni Rooman ‘prokonsil’ geetettees.
^ Yerusalaame gidana.
^ Woykko “oduwan tamaariis.”
^ Woykko “wozanappe oottiiddi.”
