Kiitettidaageetu Oosuwa 19:1-41
19 Yaanidaashin, Aphiloosi Qoronttoosan deꞌiyo wode, Phawuloosi abbaappe haahuwan deꞌiya heeraara aadhdhidi Efisoona biis. I yan Yesuusa kaalliya amaridaageetuura gayttidi,
2 eta, “Intte ammaniya asa gidido wode geeshsha ayyaanaa ekkidetii?” yaagiis. Eti ayyo, “Nuuni geeshsha ayyaanay deꞌiyogaa siyinne erokko” yaagidosona.
3 Yaagin I, “Intte haattan waani muukettidetii?” yaagiis. Eti, “Nuuni Yohaannisi tamaarissidoogaadan muukettida” yaagidosona.
4 Phawuloosi hagaadan giis: “Yohaannisi appe simmin yiya Yesuusa ammananaadan asawu yootidi, eti zilꞌꞌettidi laamettidoogawu malaatadan eta haattan muukkiis.”
5 Eti hegaa siyidi, Godaa Yesuusa sunttan haattan muukettidosona.
6 Qassi Phawuloosi ba kushiya eta bolli wottin, eta bolli geeshsha ayyaanay wodhdhiisinne eti hara biittaa qaalaa haasayiyogaanne Xoossay erissidobaa yootiyogaa doommidosona.
7 Eti muleera 12 attuma asata.
8 I shiiqo keettaa gelidi, Xoossaa Kawotettaabaa ammanttiyabaa yootiiddinne haasayiiddi heezzu aginawu yayyennan tamaarissiis.
9 Shin issoti issoti jallidi ammanennan ixxidi, Xoossaa Ogiya asaa sinttan boridosona; yaatin I etappe duuxxidi Yesuusa kaalliyageeta banaara efiidi, Xiraanoosa timirtte keettaa addaraashan ubba gallassi haasayiyogaa doommiis.
10 I yan tamaarissiiddi naaꞌꞌu layttaa takkido gishshawu, Isiya moottan deꞌiya asay ubbay, Ayhudatikka Giriiketikka Godaa qaalaa siyidosona.
11 Qassi Xoossay Phawuloosa baggaara malaaliya gitabata oottiyogaa aggibeenna;
12 Hegaa gishshawu, haray atto A bollaa bochchida maayuwanne marxxuwa harggida asaakko efin, harggidaageeti paxoosona, qassi iita ayyaanati asaappe kiyoosona.
13 Shin daydanttata kessiiddi yuuyiya issi issi Ayhudati iita ayyaanata eti oyqqido asatuppe kessiyo wode Godaa Yesuusa sunttaa xeesanawu malidosona; eti, “Phawuloosi yootiyo Yesuusa sunttan nena mintta azazays” yaagoosona.
14 Asqqeewa giyo Ayhudatu waanna kahiniya laappun attuma naatikka hegaadan oottoosona.
15 Gidoppe attin, iita ayyaanay eta, “Taani Yesuusakka Phawuloosakka erays; shin intte oonee?” yaagiis.
16 He wode, iita ayyaanay oyqqido bitanee piridi eta bolli kiyiis, etaara warettiisinne eta ubbaa xooniis; yaatin eti masunxxidi he keettaappe woxxi kiyidosona.
17 Efisoonan deꞌiya Ayhudatikka Giriiketikka, ubba asay hegaa erees; qassi eti ubbay yayyidosonanne Godaa Yesuusa sunttay yaa yaa sabettiis.
18 Qassi ammanida asati daroti kase oottidobaa yiidi asaa sinttan paaxoosonanne yootoosona.
19 Hegaa bollikka, daydanttatu wolqqan dumma dummabaa oottiya asatuppe daroti bantta maxaafata shiishshidi asa ubbaa sinttan xuuggidosona. He maxaafatu gatee 50,000 bira.*
20 Hegaa gishshawu, Yihoowa wolqqan A qaalay dicci diccidinne xooni xoonidi biis.
21 Ha ubbabay hani simmin, Phawuloosi Maqidooniyaranne Akkaayiyara aadhdhidi Yerusalaame baanawu kuuyiis. I, “Taani yaa ba simmada, Roomekka baana bessees” yaagiis.
22 Yaatidi I bana maaddiyageetuppe naaꞌꞌata, Ximootiyosanne Erasxxoosa Maqidooniya kiittiis, shin I Isiya moottan amarida wodiya takkiis.
23 Xoossaa Ogiyaban asay he wode keehippe kacciis.
24 Biraa tigidi Arxxemiisissi goynniyo sohuwa medhdhiya Dimexiroosa giyo bitanee hiillanchchati daro miishshaa demmanaadan oottiis.
25 I he asatanne hegaadan oottiya hara asata shiishshidi hagaadan giis: “Asawu, nuuni ha oosuwan duretidoogaa loytti ereeta.
26 Phawuloosa giyo ha bitanee asi medhdhido xoossati tumu Xoossa gidennaagaa, Efisoona xallan gidennan Isiya moottan ubbasan ammanttidi yootin, daro asay ammanidoogaa intte beꞌeetanne siyeeta.
27 Hegaa bollikka, asay nu oosuwa boranaagaa xalla gidennan, gita xoossee Arxxemiisi garuwakka pattennabadan xeellana gaadakka yayyays. Isiya moottaaninne kumetta saꞌan deꞌiya asay ubbay iyyo goynniyaba gidikkokka, I bonchchoy ubbay attana.”
28 He asati hegaa siyidi hanqquwa suullidi, bantta qaalaa xoqqu oottidi, “Efisoonatu xoossiya Arxxemiisa gita!” yaagidosona.
29 Yaanin, kataman deꞌiya asay ubbay wocamiis, qassi eti ubbay Phawuloosaara yuuyiya Maqidooniya asata, Gaayosanne Arisxxirokoosa oyqqidi dirbbiiddi tiyatiriya beꞌiyosaa gelidosona.
30 Phawuloosi asaakko gelanawu koyikkonne, Yesuusa kaalliyageeti I beennaadan diggidosona.
31 Haray atto baalatanne kaassata giigissiyageetuppe A dosiya amaridaageeti I tiyatiriya beꞌiyo sohuwa biidi qohettennaadan ayyo yootana mala asaa kiittidosona.
32 Shiiqida asawu haniyobay xiphphi giis; eti bantta qaalaa xoqqu oottidi, amaridaageeti issibaa giyo wode harati qassi harabaa goosona, qassi etappe daroti ayssi shiiqidaakko erokkona.
33 Ayhudati Iskkinddira sinttawu sugido gishshawu, issi issi asati asaa giddoppe A kessin, I hanotaa asaayyo yootanawu koyidi asay coꞌꞌu gaanaadan kushiyan malaatiis.
34 Shin I Ayhuda asa gidiyogaa eti eridi, ubbay issippe bantta qaalaa xoqqu oottidi, “Efisoonatu xoossiya Arxxemiisa gita!” yaagiiddi naaꞌꞌu saate gidiyagaa takkidosona.
35 He katamaa ayssiyagee wurssettan asaa coꞌꞌu oottidi hagaadan giis: “Efisoona asawu, Efisoona katamay gita Arxxemiisinne saluwappe wodhdhida I misiliya garuwa naagiyogaa erenna asi awan deꞌii?
36 Ha ubbabaa siriya asi deꞌenna gishshawu, intte woppu gaananne yuushshi qoppana koshshees.
37 Ayssi giikko, intte xoossatu garota bonqqibeenna woykko nu xoossiyo toochchibeenna ha asata ehiideta.
38 Dimexiroosinne aara deꞌiya hiillanchchati asa mootanawu koyikko, pirddaa gallassatun moottaa haariyageetu* sinttan A essana danddayoosona; eti issoy issuwa he wode mootona.
39 Shin intte hegaappe harabaa oottanawu koyikko, he yohoy katamaa asay shiiqiyo wode qashettana bessees.
40 Hachchi hanidabay nuna daafan yeggiyaba; ha maara xayida shiiquwa nuuni ayssi shiiqidaakko yootana danddayenna gishshawu, kawotettaa bolli makkalanaadan oottideta giidi nuna mootana danddayoosona.”
41 I hegaa yooti simmidi shiiquwa laaliis.
