Kiitettidaageetu Oosuwa 2:1-47
2 Phenxxaqosxxe Baalaa gallassi, eti ubbay issisan shiiqi uttidosona.
2 Eti uttidaashin, wolqqaama carkkuwa mala kooshinchchay saluwappe kooshimmishin siyidosona.
3 Qassi eti inxxarssata milatiya tamaa lacota beꞌidosona; hegeeti gishettidi eta ubbaa bolli issoy issoy uttidosona;
4 qassi etan ubban geeshsha ayyaanay eelliis; he ayyaanay haasayanaadan oottidoogaadan, eti dumma dumma qaalaa* haasayiyogaa doommidosona.
5 He wode kumetta saꞌan deꞌiya biitta ubbaappe yiida, Xoossawu yayyiya Ayhudati Yerusalaamen deꞌoosona.
6 He kooshinchchaa siyidi shiiqida asay he asati eta qaalan qaalan haasayiyogaa siyido gishshawu, etawu hananabay xiphphi giis.
7 Eti keehi malaalettidi hagaadan giidosona: “Hagaa beꞌeetii? Ha haasayiyageeti ubbay Galiilaa asata gidokkonaa?
8 Shin nuuni ubbay nu qaalaa qaalaa* siyoos.
9 Nu giddon deꞌiya asati yiido biittati, Phartte, Meedoona, Elaama, Masphphexoomiya, Yihudaa, Qaphphadooqiya, Phanxxoosa, Isiya moottaa,
10 Pirggiya, Phinifiliya, Gibxxenne Qareena matan deꞌiya Liibiya moottata; harati qassi Yerusalaame beꞌanawu Roomappe yiida Ayhudatanne ammanuwa laammidi Ayhuda gididaageeta;
11 amaridaageeti Qarxxeesa asatanne Araba asata—Xoossay oottido malaaliyabata eti nu qaalan haasayishin siyoos.”
12 Ee, eti ubbay malaalettidosona, qassi etawu hananabay xiphphi gin, issoy issuwawu, “Hagee aybee?” yaagidosona.
13 Shin harati, “Eti mattottidosona” yaagidi qilliiccidosona.
14 Shin Pheexiroosi kiitettida tammanne isiinetuura denddi eqqidi, ba qaalaa xoqqu oottidi hagaadan giis: “Yihudaa asatoonne Yerusalaamen deꞌiya ubbatoo, intte hagaa erana koshshees, qassi taani yootiyobaa akeekan ezggite.
15 Saꞌay biron wonttaappe heezzu saate heera gidiyo gishshawu, ha asati intte qoppiyogaadan mattottibookkona.
16 Shin hagee Xoossay erissidobaa yootiya Yuuꞌeeli hagaadan giidobaa:
17 ‘Xoossay hagaadan gees: “Wurssetta gallassatun asa ubbaa bolli ta ayyaanaappe amaridaagaa gussana; yaatin intte attuma naatinne macca naati Xoossay erissidobaa yootana, qassi intte giddon deꞌiya yelagati ajjuutaa beꞌananne cimati aymuwa aymottana;
18 qassi he gallassatun haray atto ta aylletu attumaageetunne maccaageetu bollikka ta ayyaanaappe amaridaagaa gussana, yaatin eti Xoossay erissidobaa yootana.
19 Qassi taani saluwan malaaliyabatanne saꞌan malaatata, suuttaa, tamaanne dumꞌꞌa cuwaa bessana.
20 Yihoowa bonchcho gallassay gitay yaanaappe kase awa ayfee xumana, qassi aginay suutta kiyana.
21 Qassi Yihoowa sunttaa xeegiya ubbay attana.”’
22 “Israaꞌeela asatoo, hagaa siyite: Intte eriyogaadan, Xoossay Naazireete Yesuusa baggaara intte giddon malaaliyabatanne malaatata oottiyogan I Yesuusa kiittidoogaa bessiis.
23 I oyqettanaagaa Xoossay kasekka eriyo gishshawu, hegee A shene* gidiis; intte A iita asatu kushiyan mittaa bolli misimaariyan xishissidi worideta.
24 Shin A carppiyo wolqqay hayquwawu baynna gishshawu, Xoossay A hayquwa qashuwappe birshshidi denttiis.
25 Daawiti abaa hagaadan giidoy hegaassa: ‘Taani mule shabbirettenna mala Yihooway ta ushachcha miyyiyan deꞌiyo gishshawu, taani ubbatoo A qoppays.*
26 Hegaappe denddidaagan, ta wozanay poocammiisinne taani keehi ufayttada haasayaas. Qassi taani* nenan ammanettada deꞌana;
27 ayssi giikko, neeni tana* Duufuwan* aggaagakka, woy qassi taani neeyyo ammanettiyo gishshawu, ta bollay musanaadan aggaagakka.
28 Tana deꞌuwa ogiya erissadasa; taani ne sinttan keehi ufayttanaadan oottaasa.’
29 “Asawu, ta ishatoo, nu mayzza aaway Daawiti hayqqidi moogettidoogaa, qassi A duufoy hachchi gakkanawu nu matan deꞌiyogaa hayyanintta abaa taani intteyyo xalada yootays.
30 I Xoossay erissidobaa yootida asa, qassi Xoossay A naatuppe issuwa A araatan utissanawu caaqqidoogaakka I erees;
31 qassi I Kiristtoosa dendduwabaa kaseti beꞌidi, I Duufuwan* attennaagaa, woy qassi A bollay musennaagaakka* yootiis.
32 Xoossay ha Yesuusa hayquwappe denttiis, qassi nuuni ubbay hegawu markka.
33 Hegaa gishshawu, Xoossay A baappe ushachcha baggan xoqqu xoqqu oottiis, Aaway immana giido geeshsha ayyaanaa I ekkiis, qassi ha intte beꞌiyobaanne siyiyobaa gussiis.
34 Daawiti saluwa bibeennaba gidikkonne, hagaadan giis: ‘Yihooway ta Godaa,
35 “Taani ne morkketa neeni yedhdhanaadan oottana* gakkanaashin taappe ushachcha baggaara utta” yaagiis.’
36 Hegaa gishshawu, intte mittan kaqqidi worido ha Yesuusa Xoossay Godanne Kiristtoosa oottidoogaa Israaꞌeela asay ubbay siree baynnan ero.”
37 Eti hegaa siyidi keehi zilꞌꞌettidi, Pheexiroosanne kiitettida harata, “Asawu, ishatoo, nuuni waatin kehee?” yaagidosona.
38 Pheexiroosi etayyo hagaadan giis: “Zilꞌꞌettidi laamettite, qassi intte nagaray atto geetettana mala intte ubbay Yesuus Kiristtoosa sunttan haattan muukettite, yaatikko Xoossay coo immiyo geeshsha ayyaanaa intte ekkana.
39 Ayssi giikko, nu Xoossay Yihooway intteyyonne intte naatuyyo, qassi haahuwan deꞌiya ubbatuyyo, I baakko xeegana ubbatuyyo hegaa immanaagaa yootiis.”
40 Hegaa bollikka, hara daro qaalan I loytti qonccissiis, qassi, “Ha iita asaara xayenna mala etappe shaahettite” yaagidi eta zoriis.
41 Yaatin, I yootiyobaa ufayttidi ekkida asay haattan muukettiis, qassi he gallassi 3,000 gidiya asay* gujettiis.
42 Eti kiitettidaageetuppe tamaariyogaa, ubbabaa issoy issuwawu immiyogaa, issippe qumaa miyogaanne woossiyogaa aggibookkona.
43 Kiitettidaageeti malaaliya darobaanne malaatata oottidosona, qassi asay* ubbay hegaa beꞌidi yayyiis.
44 Ammanidaageeti ubbay issippe deꞌoosona, qassi banttawu deꞌiyabaa ubbaa issoy issuwawu immoosona;
45 eti bantta gadiyanne banttawu deꞌiyabaa bayzzidi, huuphiyan huuphiyan koshshiyagaadan ubbaayyo he miishshaa shaakkoosona.
46 Hegaa bollikka, eti ubba galla Xoossaa garuwan issippe shiiqoosona, qassi eti bantta qumaa issoy issuwawu immoosonanne issoy issuwa son moosona; eti keehi ufayttiiddi, wozanappe hegaa oottoosona;
47 yaatiiddi Xoossaa sabboosona, qassi asay ubbay eta nashshees. Qassi Yihooway ashshana asaa ubba galla eta bolli gujjees.
Footnotes
^ Woykko “inxxarssaa.”
^ Woykko “doonaa pogido qaalaa.”
^ Woykko “halchcho.”
^ Mise, “ta sinttan wottays.”
^ Mise, “ta ashoy.”
^ Woykko “ta shemppuwa.”
^ Woykko “Hedes,” hegeekka, asi ubbi moogettiyo sohuwa.
^ Woykko “Hedes,” hegeekka, asi ubbi moogettiyo sohuwa.
^ Woykko “moorettennaagaakka.”
^ Mise, “ne morkketa ne tohuwappe garssaara wottana.”
^ Woykko “shemppoy.”
^ Woykko “shemppoy.”
