Kiitettidaageetu Oosuwa 20:1-38
20 Asay kacciyogaa aggin, Phawuloosi Yesuusa kaalliyageeti baakko yaanaadan kiittiis; yaatidi eta minttetti simmidi saro deꞌite yaagidi, Maqidooniya baanawu denddiis.
2 I ishatussi darobaa yooti minttettiiddi hegaa heeran deꞌiya katamatuura aadhdhidi Giriike gakkiis.
3 I yan heezzu aginaa takkiis, shin I markkabiyan Sooriya baana haniyo wode Ayhudati A woranawu maqettido gishshawu, Maqidooniyara aadhdhidi guyye simmanawu qoppiis.
4 Beeriya Pharihaasa naꞌay Sophaaxiroosi, Arisxxirokoosi, Tasalonqqiya Sikonddisi, Darbbiya Gaayosi, Ximootiyosinne Isiya moottaa asati Tikiqoosinne Xirofiimoosi aara biidosona.
5 Ha asati sinttawu biidi Xiroꞌaadan nuna naagidosona;
6 shin nuuni Oyttaa Baalaa gallassati aadhdhi simmin, Piliphphisiyusappe denddidi markkabiyan gelidi ichchashu gallassan etakko Xiroꞌaada gakkida, yaatidi yan laappun gallassaa takkida.
7 Saaminttawu koyro gallassi, nuuni qumaa maanawu shiiqido wode, Phawuloosi wonttetta gallassi biyo gishshawu, etayyo yootiyogaa doommiis; I bilahe gakkanaashin haasayiiddi takkiis.
8 Keettawu bollaara deꞌiya, nuuni shiiqido kifiliyan daro xomppeti deꞌoosona.
9 Maskkootiya bolli uttida Ewuxikoosa giyo yelagay Phawuloosi haasayishin bana xiskkoy gophphayin xiskki bayiis; I naaꞌꞌantta pooqiyappe kunddiis, qassi eti akko gakkiyo wode hayqqiis.
10 Shin Phawuloosi duge wodhdhidi, A bolli zinꞌꞌiis, qassi A qoommidi, “I paxa* deꞌiyo gishshawu, hirggoppite” yaagiis.
11 Hegaappe simmin, I oyttaa menttidi miyogaa doommiis. I saꞌay wonttana gakkanaashin etaara haasayiiddi takkiis, yaatidi yaappe biis.
12 Qassi eti naꞌaa guyye soo efiidosonanne I paxa deꞌiyo gishshawu keehi minettidosona.
13 Hegaa gishshawu, nuuni markkabee deꞌiyosaa biidi Asoosa baanawu denddida, shin Phawuloosi tohuwan he katamaa baanawu qoppiis; I nuuyyo yootidoogaadan, yan I nuuni deꞌiyo markkabiyan gelanaadan koyida.
14 Yaatin I Asoosan nuukko gakkin, nuuni markkabiyan A gelissidi Mixiliine biida.
15 Qassi wonttetta gallassi yaappe markkabiyan denddidi Kiiyo haruuruwa gaxaa gakkida, shin kaalliya gallassi Saamoosan guuttaa eqqida, qassi wonttetta gallassi Miliixe gakkida.
16 Phawuloosi danddayettikko Phenxxaqosxxe Baalaa gallassi Yerusalaame gakkanawu eesotiis; hegaa gishshawu, I Isiya moottan takkenna mala, Efisoonan shemppennan baanawu qoppiis.
17 Gidoppe attin, galchchaa cimata xeeganaadan Miliixeppe Efisoona I asa kiittiis.
18 Eti yin, I etayyo hagaadan giis: “Taani Isiya moottaa koyro yiido gallassappe doommada intte giddon waanada deꞌidaakko intte loytti ereeta;
19 taani keehippe ziqqi gaada Godaayyo aylledan oottaas, qassi Ayhudati ta bolli iitabaa maqettido gishshawu, yeekkaasinne waayettaas;
20 taani inttena maaddiyabaappe aybanne yootennan aggabeennaagaa woykko asaa sinttaaninne keettan keettan inttena tamaarissennan aggabeennaagaakka ereeta.
21 Shin zilꞌꞌettidi laamettana, Xoossaayyo goynnananne nu Godaa Yesuusa ammanana koshshiyogaa taani Ayhudatussikka Giriiketussikka pola markkattaas.
22 Qassi taani yan waananaakko erana xayikkonne, geeshsha ayyaanay kaalettin* haꞌꞌi Yerusalaame bays;
23 tana qashoynne waayee naagiyogaa katama ubban taayyo geeshsha ayyaanay darotoo markkattiyogaa xallaa erays.
24 Gidoppe attin, taani ta wottaanne laggetiyabi baynna Xoossaa kehatettaa mishiraachchuwa pola markkattanaadan Goday Yesuusi immido haggaazaa wurssikko, ta shemppoy* tana goꞌꞌennabadan xeellays.
25 “Simi haꞌꞌi siyite! Taani intte giddon Xoossaa Kawotettaa yootido intteppe ooninne hagaappe guyyiyan ta somꞌꞌuwa beꞌennaagaa erays.
26 Hegaa gishshawu, ooninne hayqqikko* taani mooranchcha gidennaagaa intte hachchi markka,
27 ayssi giikko, taani Xoossaa zoriya* ubbaa intteyyo yootennan aggabeykke.
28 Xoossay ba Naꞌaa suuttan shammido A galchchaa intte heemmana mala, geeshsha ayyaanay inttena ayyo henttanchcha oottidi doorido wudiya ubbaanne inttena mintti naagite.
29 Taani ba simmin hanttaara wanggireelloti intte giddo gelanaagaa erays, qassi eti wudiyawu qarettokkona;
30 hegaa bollikka, intte giddoppe issi issi asati denddidi Yesuusa kaalliyageeti eta kaallanaadan oottanawu geellabaa tamaarissana.
31 “Hegaa gishshawu, naagi uttite, qassi taani yeekkaydda inttena ubbaa heezzu layttawu qamminne gallassi zoriyogaa mule aggabeennaagaa hassayite.
32 Qassi taani haꞌꞌi inttena Xoossawunne laggetiyabi baynna A kehatettaa qaalawu sheedhdhays; he qaalay inttena minttananne geeshshatu ubbaara laatissana danddayees.
33 Taani O biraakka woy worqqaakka woy maayuwakka ekkanawu koyabeykke.
34 Taani taayyonne tanaara yuuyiyageetuyyo koshshiyabawu ta kushiyan oottidoogaa ereeta.
35 Taani minnada oottiyogan maadoy koshshiyogeeta intte waati maaddana bessiyakko inttena ubbaban bessaas, qassi Goday Yesuusi, ‘Immiyogee ekkiyogaappe aaruwan ufayssees’ giidobaa intte hassayana bessees.”
36 Qassi I ha ubbabata yooti simmidi, gulbbatidi etaara ubbaara woossiis.
37 Eti ubbay keehi yeekkidosona, qassi Phawuloosa qoommidi* yeridosona;*
38 ayssi giikko, ubbakka eti A somꞌꞌuwa mule beꞌennaagaa I yootidoogee eta keehi seelliis. Hegaappe simmin, eti markkabee deꞌiyosaa gakkanaashin A moyssidosona.
Footnotes
^ Woykko “A shemppoy an.”
^ Woykko “giddin.”
^ Woykko “deꞌoy.”
^ Woykko “O suuttankka.”
^ Woykko “halchchuwa.”
^ Mise, “Phawuloosa qooriyan kunddidi.”
^ Woykko “qaretan yeridosona.”
