Kiitettidaageetu Oosuwa 21:1-40
21 Baaxxoole* gidikkonne, nuuni etappe shaahettida, yaatidi markkabiyan gelidi, sitti gi biidi Qoosa gakkida, wonttetta gallassi Rooda gakkida, hegaappe qassi Phaaxira gakkida.
2 Nuuni yan Pinqqe biya markkabiya demmidi, an gelidi biida.
3 Nuuni Qophphiroosa haruuruwa haddirssa baggaara beꞌiiddi aadhdhidi Sooriya biiddi, markkabiyappe caanaa wottanawu Xiiroosa gakkida.
4 Nuuni Yesuusa kaalliyageeta koyi demmidi yan laappun gallassaa takkida. Shin Yerusalaame beennaadan, eti geeshsha ayyaanay kaalettin Phawuloosayyo darotoo yootidosona.
5 Nuuni yan takkiyo wodee wurin, yaappe baanawu denddida, shin katamaappe kiyana gakkanaashin, macca asaaranne naatuura eti ubbay nuna moyssidosona. Yaatin nuuni abbaa doonan gulbbatidi woossida;
6 yaatidi issoy issuwa saro deꞌite yaagida. Hegaappe simmin, nuuni markkabiyan gelida, eti qassi bantta soo simmidosona.
7 Hegaappe guyyiyan, nuuni Xiiroosappe denddidi markkabiyan Phexelemayse gakkida; yaatidi ishata sarotanawu biidi etaara issi gallassaa takkida.
8 Nuuni wonttetta gallassi yaappe denddidi Qiisaariya gakkida, qassi mishiraachchuwa yootiya Piliphphoosa soo biidi yan shemppida; Piliphphoosi kiitettidaageeti Yerusalaamen doorido laappun attuma asatuppe issuwa.
9 Xoossay erissidobaa yootiya, azinaa gelibeenna* oyddu macca naati Piliphphoosayyo deꞌoosona.
10 Shin nuuni yan daro gallassaa shemppi simmin, Agaaboosa giyo, Xoossay erissidobaa yootiyagee Yihudaappe duge wodhdhiis.
11 Qassi I nuukko yiidi Phawuloosa dafuwa ekkidi ba tohuwanne kushiya qachchidi hagaadan giis: “Geeshsha ayyaanay yaagees: ‘Ha dafuwa godaa Ayhudati Yerusalaamen hagaadan qachchidi hara biittaa asawu aattidi immana.’”
12 Hegaa siyido wode, Yerusalaame beennaadan nuunikka yan deꞌiyageetikka A woossiyogaa doommida.
13 Yaatin Phawuloosi hagaadan giis: “Intte ayssi yeekkeetiinne taani murttidoban tana shugissanawu* ayssi maleetii? Hirggoppite, taani Godaa Yesuusa sunttan ammaniyo gishshawu Yerusalaamen qashettanaagaa xallaassa gidennan hayqqanawukka giiga uttaas.”
14 I siyennan ixxin nuuni, “Simi Yihoowa shenee hano” yaagidi sirphphi giida.*
15 Hegaappe guyyiyan, nuuni ogiyawu giigetti simmidi, Yerusalaame baanawu denddida.
16 Nuuni A son imattatettan shemppana, Qophphiroosa Minaasoona soo nuna efaanawu, Yesuusa kaalliya Qiisaariya asatuppe amaridaageetikka nunaara biidosona; Minaasooni Yesuusa kaalliya koyroogeetuppe issuwa.
17 Nuuni Yerusalaame gakkin, ishati nuna ufayttiiddi mokkidosona.
18 Wonttetta gallassi Phawuloosi nunaara Yaaqoobakko biis, qassi cimati ubbay yan deꞌoosona.
19 Qassi Phawuloosi eta saroti simmidi, I haggaazido haggaazan Xoossay hara biittaa asaa giddon oottidobaa ubbaa etayyo yootiis.
20 Eti hegaa siyi simmidi, Xoossaa sabbiyogaa doommidosona, shin ayyo hagaadan giidosona: “Ishawu, daro shaꞌu Ayhudati ammaniya asa gididoogaanne eti ubbay Higgiya mintti naagiyogaa eraasa.
21 Shin neeni hara biittan deꞌiya Ayhudati ubbay bantta naata qaxxarennaadan woy wogaa naagennaadan yootada, Muuse Higgiya agganaadan tamaarissiyogaa eti nebaa paafunttaa siyidosona.
22 Yaatin waatin kehee? Eti neeni yiidoogaa siyiyogee attenna.
23 Hegaa gishshawu, nuuni neeyyo yootiyobaa ootta: Xoossawu geppidobaa polanawu koyiya oyddu asati nu giddon deꞌoosona.
24 Ha asati bantta huuphiya qanttan qanxxissana mala, eta nenaara efaada, Muuse Higgee yootiyogaadan geeyitenne etawu koshshiya miishshaa qanxxa. Yaatikko, asay ubbay nebaa siyido paafunttay tuma gidennaagaa, qassi neeni maara hemettiyogaanne Higgiya naagiyogaakka eti erana.
25 Hara biittaa asaa giddoppe ammaniya asa gididaageetubaa gidikko, eeqa misiletussi yarshshidobaappe, suuttaappe, sulettidabaappenne* pokkiya tuna nagaraappe* teqettidi deꞌana koshshiyogaa nuuni maacidi xaafidoogaa etawu kiittida.”
26 Hegaappe simmin, Phawuloosi wonttetta gallassi he asata efiisinne ikka etikka Muuse Higgee yootiyogaadan geeyidosona, qassi kahinee etayyo huuphiyan huuphiyan yarshshuwa yarshshana mala, Muuse Higgiya maaran geeyiyo laappun gallassay awude wuriyakko yootanawu Phawuloosi Xoossaa garuwa geliis.
27 He laappun gallassay wurana haniyo wode, Isiyappe yiida Ayhudati A Xoossaa garuwan beꞌidi asaa ubbaa denttettidosona, yaatidi A oyqqidi,
28 bantta qaalaa xoqqu oottidi hagaadan giidosona: “Israaꞌeela asawu, nuna maaddite! Nu asaa, nu Higgiyanne ha sohuwa kawushshiyabaa ubbasan asa ubbaa tamaarissiya bitanee hagaa. Hegaa xalla gidennan, I haray atto Giriiketakka Xoossaa garuwa ehiidi ha geeshsha sohuwa tunissiis.”
29 Eti Efisoona Xirofiimoosa kase aara kataman beꞌido gishshawu, Phawuloosi Xoossaa garuwa A ehiis giidi qoppidosona.
30 Kumetta katamay shabbirettiis, qassi asay issippe eesotiiddi yiidi Phawuloosa oyqqidi Xoossaa garuwappe goochchi kessiis, qassi penggeti sohuwara gorddettidosona.
31 Eti A woranawu shocishin, Yerusalaame katamay kumettay shabbirettiyogaa wotaaddarata azaziyagee siyiis.
32 I wotaaddaratanne wotaaddaratu halaqata ekkidi eesuwan asaakko biis. Eti wotaaddaratanne eta azaziyagaa beꞌido wode, Phawuloosa shociyogaa aggidosona.
33 Hegaappe simmin, wotaaddarata azaziyagee shiiqidi A oyqqiis, qassi naaꞌꞌu sanssalatan A qachchana mala azaziis; yaatidi, I oonakkonne ay oottidaakko asaa oychchiis.
34 Shin asay ba qaalaa xoqqu oottidi, issoti issoti issibaa giyo wode harati qassi harabaa goosona. Yaatin asay cancciyo gishshawu ayyo aybinne erettennan ixxin, I Phawuloosa wotaaddaratu qatuwa efaanaadan azaziis.
35 Shin pude kiyiyo xekkaa I gakkiyo wode, asay A qohanawu koyido gishshawu, wotaaddarati A tookkidosona,
36 ayssi giikko, cora asay A geeduwappe duuxxennan, ba qaalaa xoqqu oottidi, “A xayssa!” yaagiis.
37 Phawuloosi bana wotaaddaratu qatuwa efaana haniyo wode, wotaaddarata azaziyagaa, “Hayyanaa, taani neeyyo issibaa yootoo?” yaagiis. I ayyo hagaadan giis: “Haha, hekko neeni Giriikettuwa haasayaasa.
38 Yaatin neeni asay makkalanaadan denttettidanne shemppo woriya 4,000 asata kaalettada bazzuwa efiida Gibxxe bitaniya gidikkiiyye?”
39 Yaagin Phawuloosi, “Taani keehi erettida Kilqqiya Xarsseese katamaappe yiida Ayhuda asa. Hayyanaa, taani asaa sinttan haasayanaadan eeno garkkii?” yaagiis.
40 I eeno gin, Phawuloosi xekkaa bolli eqqidi, asay coꞌꞌu gaanaadan kushiyan malaatiis. Asay coꞌꞌu gin, I etayyo Ibraawettuwan hagaadan giis:
Footnotes
^ Woykko “Keehi metiyaba.”
^ Mise, “geelaꞌo.”
^ Woykko “ta wozanaa shugissanawu.”
^ Woykko “phalqqiyogaa aggida.”
^ Woykko “suuttaa xexxeefidi gussennan woridobaappenne.”
^ Giriikettuwan, porniya.
