Kiitettidaageetu Oosuwa 22:1-30
22 “Asawu, ta ishatoonne ta aawatoo, siyite; aybi hanidaakko taani intteyyo yootana.”
2 I Ibraawettuwan etayyo yootiyogaa asay siyido wode, eti ubba yaa coꞌꞌu gin, I hagaadan giis:
3 “Taani Kilqqiya Xarsseesen yelettidaba gidikkokka, Gamaaliꞌeeli tamaarissin ha kataman luxida Ayhuda asa, qassi mayzza aawatu Higgiya mintta naaganaadan loohaasinne intteegaa ubbaagaadan yeemottaydda Xoossaayyo oottaas.
4 Taani ha Ogiya kaalliya attuma asaakka macca asaakka oyqqa qashissada, eti hayqqana gakkanaashin daro naaqqaas;
5 gita kahineenne yaaꞌaa cimati ubbay hegaa markkattana danddayoosona. Eti Damasqqon deꞌiya nu ishatuyyo kiittido dabddaabbiyakka ekkada yan deꞌiyageeti qaxxayettana mala, qashetti uttidaashin Yerusalaame ehaanawu baydda ogiyan deꞌays.
6 “Shin taani baydda Damasqqo matishin, akeekennan saluwappe wolqqaama pooꞌoy ta matan ubbasan pozhzhattiis;
7 yaatin taani saꞌan kunddada, ‘Saaꞌoolaa, Saaꞌoolaa, tana ayssi naaqqay?’ yaagiyogaa siyaas.
8 Taani, ‘Godawu, neeni oonee?’ yaagaas. I taayyo, ‘Taani neeni naaqqiyo Naazireete Yesuusa’ yaagiis.
9 He wode tanaara deꞌiya asati pooꞌuwa beꞌidosona, shin tanaara haasayiyagee woygidaakko siyibookkona.
10 Hegaappe simmin, taani, ‘Godawu, taani waatoo?’ yaagaas. Goday taayyo, ‘Denddada Damasqqo ba; neeni oottana mala qashettida ubbabaa issi asi neeyyo yan yootana’ yaagiis.
11 Shin he pooꞌuwa wolqqaappe denddidaagan taani aybanne beꞌana danddayenna gishshawu, tanaara deꞌiya asati kushiya oyqqidi kaalettin Damasqqo gakkaas.
12 “Hegaappe guyyiyan, Xoossaayyo yayyiyanne Higgiya naagiya, yan deꞌiya Ayhudati ubbay loꞌꞌoban denttiyo Hanaaniya giyo bitanee
13 taakko yiis. I ta matan eqqidi tana, ‘Ta ishawu, Saaꞌoolaa, zaarettada xeella!’ yaagiis. Yaagin he saatiyan taani pude xeellada A beꞌaas.
14 I hagaadan giis: ‘Nu mayzza aawatu Xoossay, neeni A sheniya eranaadan, qassi xilluwa Yesuusa beꞌanaadaaninne I yootiyobaa siyanaadan nena dooriis;
15 ayssi giikko, neeni beꞌidobaanne siyidobaa asawu ubbawu yootana mala, Yesuusi nena dooriis.
16 Yaatin haꞌꞌi ay naagay? Denddada haattan muuketta, qassi A sunttaa xeegada ne nagaraappe geeya.’
17 “Shin taani Yerusalaame yiido wode, Xoossaa garuwan woossaydda ajjuutaa beꞌaas,
18 qassi I tana, ‘Hagan deꞌiya asay neeni tabaa markkattiyobaa ekkenna gishshawu, gamꞌꞌennan Yerusalaameppe elle kiya’ yaagishin A beꞌaas.
19 Taani qassi hagaadan gaas: ‘Godawu, taani shiiqo keetta ubbaa baada, nena ammaniyageeta qachchidoogaanne shocidoogaa eti loytti eroosona;
20 qassi eti ne markkaa Isxxifaanoosa woriyo wode, taani hegan ufayttada A woriyageetu maayuwa naagaydda yan eqqaas.’
21 Shin I tana, ‘Taani nena keehi haahosan deꞌiya hara biittaa asaakko kiittiyo gishshawu, ba’ yaagiis.”
22 Eti, I hegaa gaana gakkanaashin siyidaba gidikkonne, hegaappe simmin bantta qaalaa xoqqu oottidi, “Hagaa mala asi deꞌana bessenna gishshawu, A wora!” yaagidosona.
23 Eti bantta maayuwa oliiddinne sophphiya toskkayiiddi cabbottiyo gishshawu,
24 wotaaddarata azaziyagee asay Phawuloosa bolli hegaadan cabbottiyoy aybissakko shaakki eranawu, A shociiddi iisetti oychchana mala, wotaaddaratu qatuwa ehaanaadan azaziis.
25 Shin eti Phawuloosa shocanawu qachchin, matan eqqida, wotaaddaratu halaqaayyo I, “Daanni mooradasa gibeenna* Roome asa intte shociyogee wogee?” yaagiis.
26 Wotaaddaratu halaqay hegaa siyidi, wotaaddarata azaziyagaakko biidi, “Neeni waatana gaada qoppay? Ayssi giikko, ha bitanee Roome asa” yaagiis.
27 Hegaa gishshawu, wotaaddarata azaziyagee Phawuloosakko shiiqidi A, “Neeni Roome asee?” yaagidi oychchiis. I, “Ee” yaagiis.
28 Wotaaddarata azaziyagee, “Taani Roome asa gidanawu daro miishshaa qanxxaas” yaagiis. Phawuloosi, “Shin taani yelettayddakka Roome asa” yaagiis.
29 Hegaa gishshawu, A shociiddi iisetti oychchana haniya asati sohuwara guyye pachchi giidosona; qassi wotaaddarata azaziyagee A sanssalatan qachchido gishshawu, I Roome asa gidiyogaa eridi yayyiis.
30 Hegaa gishshawu, I Ayhudati Phawuloosa ayssi mootiyakko eranawu koyidi, wonttetta gallassi A birshshiisinne waanna kahinetinne Sanhediriniya* asay ubbay shiiqanaadan azaziis. Yaatidi, I Phawuloosa duge wottidi, eti shiiqidosaa efiidi eta giddon essiis.
