Kiitettidaageetu Oosuwa 23:1-35
23 Phawuloosi Sanhediriniya* asaa tishshi ootti xeellidi, “Asawu, ta ishatoo, taani Xoossaa sinttan oottidoban hachchi gakkanawu ta wozanay* geeshsha” yaagiis.
2 Yaagin gita kahinee Hanaanee A matan eqqidaageeti A doonaa baqqanaadan azaziis.
3 Yaatin Phawuloosi ayyo hagaadan giis: “Ha shollooriyawu,* Xoossay nena shocana. Neeni Higgee yootiyogaadan tabaa qachchanawu uttadasa, shin Higgiya kanttada tana shocanaadan azazay?”
4 A matan eqqidaageeti, “Xoossay sunttido gita kahiniya cayay?” yaagidosona.
5 Yaagin, Phawuloosi hagaadan giis: “Ta ishatoo, taani I gita kahine gidiyogaa erabeykke. Shin, ‘Ne asaa kaalettiyagaa bolli neeni iitabaa haasayana bessenna’ geetettidi xaafettiis.”
6 Phawuloosi etappe baggay Saaduqaawe, qassi harati Parisaawe gidiyogaa eridi, Sanhediriniyan* ba qaalaa xoqqu oottidi hagaadan giis: “Asawu, ta ishatoo, taani Parisaawetu naꞌa, Parisaawe. Taani hayqqidaageeti denddanaagaa ammaniyo gishshawu pirddanawu tana ehiidosona.”
7 I hegaa giido gishshawu, Parisaaweti Saaduqaawetuura palamaa denttin, yaaꞌay naaꞌꞌawu shaahettiis.
8 Ayssi giikko, Saaduqaaweti hayquwappe denddiyobikka, kiitanchchikka, ayyaana meretikka baawa yaagoosona, shin Parisaaweti hegeeti deꞌiyogaa yootoosona.
9 Hegaa gishshawu, asay keehippe kacciis, qassi Higgiya tamaarissiya Parisaawetuppe amaridaageeti denddidi, hagaadan giidi keehippe yootettiyogaa doommidosona: “Ha bitaniyan ayba mooronne demmibookko, shin ayyaana mereti woy kiitanchchi ayyo yootidaba gidikko—.”
10 Asay yaa kaccin, wotaaddarata azaziyagee eti Phawuloosa worennaadan yayyiis; yaanin duge wodhdhidi, sohuwara asaa giddoppe A kessidi wotaaddaratu qatuwa efaanaadan wotaaddarata azaziis.
11 Shin hegaappe simmin qammi, Goday A matan eqqidi hagaadan giis: “Yayyoppa! Ayssi giikko, neeni Yerusalaamen tabaa pola markkattidoogaadan, Roomenkka hegaadan markkattana bessees.”
12 Saꞌay wonttiyo wode, Ayhudati maqettidosonanne Phawuloosa worennan aybanne mookko woy uyokko giidi massammidosonanne caaqqidosona.
13 Hegaadan maqettidi caaqqida asati 40ppe daro.
14 He asati waanna kahinetukkonne cimatukko biidi hagaadan giidosona: “Nuuni Phawuloosa worennan aybanne meenna mala murttidi, massammidanne caaqqida.
15 Hegaa gishshawu, haꞌꞌi intte Sanhediriniya* asaara Phawuloosa harabaa oychchana koyiyaba milatidi, A inttekko duge ehanaadan wotaaddarata azaziyagawu yootana koshshees. Shin nuuni giigi uttidi, I yaa gakkanaappe kase A worana.”
16 Shin Phawuloosa michchee naꞌay eti zuggidi A woranawu maqettidoogaa siyiis, yaatidi wotaaddaratu qatuwa gelidi, hegaa Phawuloosawu yootiis.
17 Yaatin Phawuloosi wotaaddaratu halaqatuppe issuwa xeegidi, “Ha naꞌay wotaaddarata azaziyagawu yootiyobay deꞌiyo gishshawu, A akko efa” yaagiis.
18 Hegaa gishshawu, I naꞌaa wotaaddarata azaziyagaakko efiidi, “Qashettida bitanee Phawuloosi tana xeegidi ha naꞌay neeyyo yootiyobay deꞌiyo gishshawu taani A neekko ehaanaadan oychchiis” yaagiis.
19 Wotaaddarata azaziyagee naꞌaa kushiya oyqqidi A xalaalaa shaakki efiidi, “Neeni taayyo yootanabay aybee?” yaagidi oychchiis.
20 I hagaadan giis: “Ayhudati Phawuloosa yohuwabaa gujjidi erana koyiyaba milatidi, wontto neeni A Sanhediriniya* duge ehaana mala nena oychchanawu maayettidosona.
21 Shin eti oychchiyobaa eeno gooppa; ayssi giikko, eta asatuppe 40ppe dariyageeti zuggidi A woranawu naagoosona, qassi eti A worennan aybanne meennaadaaninne uyennaadan massammidi caaqqidosonanne neeni etawu eeno gaanaagaa naagiiddi giigi uttidosona.”
22 Hegaa gishshawu, wotaaddarata azaziyagee naꞌaa, “Neeni hagaa tawu odidoogaa ooyyonne qaattoppa” yaagi azazidi yeddiis.
23 I wotaaddaratu halaqatuppe naaꞌꞌata xeegidi hagaadan giis: “Qiisaariya gakkanaashin salppidi baanawu qammaappe heezzantta saatiyan* denddana mala, 200 wotaaddarata, 70 paraasatanne tooraa oyqqida 200 asata giigissite.
24 Qassi Phawuloosa, Yihudaa haariya Pilikisakko saro gattanawu I toggana parata giigissite.”
25 Yaagidi, I hagaadan giidi dabddaabbiya xaafiis:
26 “Taani Qalawudeyos Lusiyosi, neeyyo, Yihudaa haariya gita Pilikisayyo ha dabddaabbiya xaafays: Saro!
27 Ayhudati ha bitaniya oyqqidi woriichchidi ashshidosona, shin I Roome asa gidiyogaa taani erada, ta wotaaddaratuura eesuwan baada A ashshaas.
28 Qassi eti A ayssi mootidaakko eranawu koyada, eta Sanhediriniya* A efaas.
29 Eti A bantta Higgiyara gayttidabaanappe attin, A worissiya woy qashissiya issibaaninne mootibeennaagaa akeekaas.
30 Shin taani eti A woranawu maqettidoogaa siyido gishshawu, A mootiyageeti ne sinttan mootanaadan azazada, A sohuwara neekko yeddaas.”
31 Hegaa gishshawu, he wotaaddarati banttana azazidoogaadankka A qamman Anttiphaaxiriisa efiidosona.
32 Wonttetta gallassi paraasati aara biidosona, shin hankko wotaaddarati bantta qatuwa simmidosona.
33 Paraasati Qiisaariya gakkidi Pilikisayyo dabddaabbiya immidosona, qassi Phawuloosakka ayyo sheedhdhidosona.
34 Yaatin, I dabddaabbiya nabbabiisinne Phawuloosi awa biitta asakko oychchidi, Kilqqiya asa gidiyogaa eriis.
35 I, “Nena mootiyageeti yiyo wode ne yohuwa wurssa siyana” yaagiis. Yaatidi A Heeroodisa garuwan* qachchi wottanaadan azaziis.
Footnotes
^ Woykko “kahay.”
^ Woykko “nooraa tiyido godawu.”
^ Woykko “heezzu saate heeran.”
^ Woykko “pritoriyem.”
