Kiitettidaageetu Oosuwa 24:1-27
24 Ichchashu gallassappe guyyiyan, gita kahinee Hanaanee, amarida cimatuuranne Xarxxaluusa giyo afkaatuwara* Qiisaariya wodhdhiis; yaatidi eti Phawuloosa mootiyo yohuwa Yihudaa haariya Piliksayyo yootidosona.
2 Xarxxaluusi haasayanaadan malaatin, A mootiyogaa doommiis; I hagaadan giis:
“Ne wolqqan nuuni saro deꞌoos, qassi ne hayyuwappe denddidaagan ha deree dicciis;
3 gita Pilikisaa, awankka, ha ubbabaa nuuni awudekka nashshoos, qassi hegawu nena keehi galatoos.
4 Shin taani nena salettenna mala, neeni nubaa qantta qofaa danddayada siyanaadan woossays.
5 Ha bitanee kumetta saꞌan deꞌiya Ayhudata kawotettaa bolli denttettiyanne Naazireeteta giyo citaa kaalettiya, wayssiya asa* gidiyogaa neeyyo erissanawu koyida.
6 Hegaa bollikka, I Xoossaa garuwa tunissanawu malido gishshawu, A oyqqida.
7 ——
8 Neeni A oychchikko, nuuni A mootiyo ubbabay tuma gidiyogaa erana.”
9 He wode, Ayhudatikka he ubbabay tuma gidiyogaa yootidi, A mootidosona.
10 Phawuloosi haasayanaadan Pilikisi malaatin, I hagaadan giis:
“Neeni ha biittan daro layttawu daannatidoogaa loytta erays, qassi tana mootiyobawu ne sinttan zaariyo gishshawu ufayttays.
11 Taani goynnanawu Yerusalaame yoosappe 12 gallassappe darenna, hegee tumakkonne eranawu koyikko, oychchana danddayaasa;
12 qassi taani Xoossaa garuwan oonaaranne palamettishin, woy qassi shiiqo keettatun gidin, woy katama giddon awankka cora asaa denttettishin beꞌibookkona.
13 Woykko eti tana haꞌꞌi mootiyo ubbabawu naqaasha gidiyabaa yootana danddayokkona.
14 Shin taani eti Naazireetetu citaa giyo ha ogiya maaraadan nu mayzza aawatu Xoossaayyo haggaaziyogaanne Muuse Higgee yootiyobaanne Xoossay erissidobaa yootiyageeti xaafidobaa ubbaa ammaniyogaa neeyyo kashi giikke.
15 Qassi Xoossay xillotakka xillo gidennaageetakka hayquwappe denttanaagaa ha asati an ammanettiyogaadan, taanikka an ammanettays.
16 Hegaappe denddidaagan, Xoossaa sinttaaninne asaa sinttan ta wozanay* geeshsha* gididi deꞌanaadan taani ubba wode baaxetays.
17 Daro layttappe guyyiyan, ta biittaa asawu imettidabaa ekkada, qassi Xoossawu yarshshanawu Yerusalaame baas.
18 Eti taani hageeta allaallaydda Muuse Higgee yootiyogaadan geeyidaagaa Xoossaa garuwan beꞌidosonappe attin, cora asaa giddon woykko asaa shabbirishin beꞌibookkona. Shin Isiya moottaappe yiida amarida Ayhudati yan deꞌoosona;
19 he asati tana mootiyobay deꞌikko, mootanawu ne sinttan eqqana bessees.
20 Woykko taani hagan deꞌiya asatu sinttan Sanhediriniyan* eqqido wode ay mooridaakko eti yootona,
21 eti issibaa xalaalan tana mootana danddayoosona. Taani pirdda keettan, ‘Taani hayqqidaageeti denddanaagaa ammaniyo gishshawu hachchi intte sinttan pirddawu eqqaas!’ yaagaas.”
22 Gidoppe attin, Pilikisi ha Ogiyabaa loytti eriyo gishshawu, “Wotaaddarata azaziya Lusiyosi yiyo wode, taani ha intte yohuwa qachchana” yaagidi eta moyssiis.
23 Qassi I Phawuloosa qachchanaadan, gidoppe attin, A issi issibaa diggennaadan, qassi A asati A koshshiyaban maaddennaadan diggenna mala, wotaaddaratu halaqaa azaziis.
24 Amarida gallassappe guyyiyan, Pilikisi ba Ayhuda machchee Dirusilliira yiidi, Phawuloosa xeesissidi Kiristtoos Yesuusa ammaniyogee woygiyogaakko I yootishin siyiis.
25 Shin Phawuloosi xillotettaaranne teqettiyogaara gayttidabaa, qassi Xoossay awude pirddanaakko yootin, Pilikisi yayyidi, “Haꞌꞌissawu ba, shin taayyo injjetiyo wode neeni haranttuwa yaanaadan kiittana” yaagiis.
26 Qassi I bawu Phawuloosi miishshaa immana giidikka qoppiis. Hegaa gishshawu, I Phawuloosi yaanaadan darotoo kiittidi aara haasayiis.
27 Shin naaꞌꞌu layttappe guyyiyan, Pilikisa sohuwan Phorqqiyos Pisxxoosi haariyogaa doommiis; Pilikisi Ayhudata ufayssanawu koyido gishshawu, Phawuloosi qashettidaashin aggi bayiis.
Footnotes
^ Woykko “xabaqaara.”
^ Mise, “eesuwan laaꞌiya hargge.”
^ Woykko “kahay.”
^ Woykko “ufuri baynnaagaa.”
