Kiitettidaageetu Oosuwa 25:1-27
25 Hegaa gishshawu, Pisxxoosi Yihudaa moottaa gakkidi haariyogaa doommi simmidi, heezzu gallassappe guyyiyan Qiisaariyappe Yerusalaame kiyiis.
2 Qassi waanna kahinetinne Ayhudata kaalettiyageeti A sinttan Phawuloosa mootidosona. Yaatidi, Pisxxoosi eti oychchiyogaadan oottidi,
3 Phawuloosa Yerusalaame yeddanaadan woossiyogaa doommidosona. Shin eti zuggidi ogiyan Phawuloosa woranawu qoppidosona.
4 Gidoppe attin, Phawuloosi Qiisaariyan qashettidi takkanaagaanne ikka mati yaa baanaagaa Pisxxoosi yootiis.
5 I hagaadan giis: “Hegaa gishshawu, intte giddon asaa kaalettiyageeti tanaara wodhdhidi, bitanee tumukka mooridaba gidikko mootona.”
6 Qassi I hosppun woy tammu gallassa gidiya wode yan takkidi, Qiisaariya wodhdhiis; yaatidi wonttetta gallassi pirddiyo sohuwan uttidi Phawuloosa ehaanaadan azaziis.
7 Phawuloosi gelin, Yerusalaameppe yiida Ayhudati A matan eqqidi, naqaasha gidiyabaa yootana danddayibeenna, dumma dumma hanttaaraban A mootidosona.
8 Shin Phawuloosi, “Taani Ayhudatu Higgiya bolli woy Xoossaa garuwa bolli woy Qeesaara bolli ayba nagaranne oottabeykke” yaagidi zaariis.
9 Pisxxoosi Ayhudata ufayssanawu koyidi Phawuloosa, “Neeni ha yohoti ta sinttan qashettana mala Yerusalaame baanawu koyay?” yaagiis.
10 Shin Phawuloosi hagaadan giis: “Taani ta yohoy qashettana bessiyo Qeesaara pirddaa sohuwa sinttan eqqaas. Neeni loytta eriyogaadan, taani Ayhudatu bolli ayba nagaranne oottabeykke.
11 Taani tumukka tana worana bessiyabaa oottida mooranchcha asa gidikko, hayqoppe attanawu malikke; shin eti tana mootidobawu naqaashi xayikko, ooninne eta ufayssanawu tana etayyo aattidi immana danddayenna. Ta yohuwa Qeesaari qachchanaadan oychchays!”
12 Yaagin Pisxxoosi zoriya asatuura haasayi simmidi, “Neeni ne yohuwa Qeesaari qachchanaadan oychchido gishshawu, Qeesaarakko baana” yaagiis.
13 Amarida gallassappe guyyiyan, Pisxxoosa bonchchuwassi kawoy Agriiphphinne Barnniiqa A oychchanawu Qiisaariya biidosona.
14 Eti yan daro gallassaa takkido gishshawu, Pisxxoosi Phawuloosa yohuwa kawuwayyo hagaadan giidi yootiis:
“Pilikisi qachchi wottido issi bitanee deꞌees,
15 qassi taani Yerusalaame biido wode, waanna kahinetinne Ayhudatu cimati A bolli pirddanaadan tana oychchidi A mootidosona.
16 Shin mootido asi bana mootiyageetu sinttan zaariyo qaada demmennan A etayyo aattidi immiyogee Roometu woga gidennaagaa taani etayyo yootaas.
17 Hegaa gishshawu, eti haa gakkin, taani haganaa sugennan, wonttetta gallassi pirddiyo sohuwan uttada he bitaniya ehaana mala azazaas.
18 Yaatin, mootiyageeti denddi eqqidi A daroban mootikkonne, eti A mootana gaada taani qoppido iitabaappe issuwaninne mootibookkona.
19 Eti bantta ammanuwabaaninne* I hayqqidaba gidikkonne paxa deꞌiyogaa Phawuloosi darotoo geeshshi yootido, Yesuusa giyo bitaniyaban aara palamettidosona.
20 He palamaa waatanaakko taayyo erettennan ixxin, ha yohoy Yerusalaamen qashettana mala, Phawuloosi yaa baanawu koyiyakkonne taani A oychchaas.
21 Shin Augisxxoosi* yohuwa qachchanaagaa naagiiddi takkanawu Phawuloosi awuddashin, taani A Qeesaarakko yeddana gakkanaashin I qashettidi takkanaadan azazaas.”
22 Yaatin Agriiphphi Pisxxoosayyo, “Taani he bitanee haasayishin siyanawu koyays” yaagiis. I, “Neeni I haasayishin wontto siyana” yaagiis.
23 Yaatin wonttetta gallassi Agriiphphinne Barnniiqa keehi wogetidoogaa bessiiddi, wotaaddarata azaziyageetuuranne kataman erettida asatuura pirdda keettaa gelidosona; qassi Pisxxoosi azazin Phawuloosa ehiidosona.
24 Yaatin Pisxxoosi hagaadan giis: “Kawuwa Agriiphphaa, qassi hagan nunaara deꞌiya asawu ubbawu, Yerusalaameeninne hagan deꞌiya Ayhudati ubbay, ‘I hayqqana bessees’ yaagidi sheekkidi tana woossiyo bitaniya hagaa beꞌite.
25 Shin worana bessiyabaa aybanne I oottibeennaagaa taani akeekaas. Qassi I Augisxxoosi he yohuwa qachchanaadan oychchido gishshawu, taani A yeddanawu qoppaas.
26 Shin taani abaa ta Godaayyo woygada xaafanaakko erikke. Hegaa gishshawu, oychchi simmin, taani xaafiyobaa demmana mala, intte ubbaa sinttan, ubba qassi Kawuwa Agriiphphaa, ne sinttan A essaas.
27 Qashettida ura Roome yeddiyo wode, A mootidobaakka qonccissana bessees gaada qoppays.”
