Kiitettidaageetu Oosuwa 26:1-32
26 Agriiphi Phawuloosa, “Nena mootidobawu zaarana danddayaasa” yaagiis. Yaagin Phawuloosi ba kushiyan bessiiddi hagaadan giidi zaariis:
2 “Kawuwa Agriiphphaa, Ayhudati tana mootido ubbabaa hachchi taani ne sinttan zaariyo gishshawu ufayttays;
3 ayssi giikko, neeni Ayhudatu wogaa ubbaanne eti bantta giddon palamettiyobaa loytta eraasa. Hegaa gishshawu, taani yootiyobaa danddayada siyanaadan nena woossays.
4 “Taani naatettaappe doommada ta biittaa asaa* giddooninne Yerusalaamen waanada deꞌidaakko Ayhudati ubbay loytti eroosona;
5 Hegaa gishshawu, eti tana daro wodiyawu eroosona; eti yootanawu koyikko, taani Parisaawe gidada deꞌidoogaa eroosona, qassi intte eriyogaadan Parisaaweti nu goynuwaban hara Ayhudatuppe tishsha.
6 Shin taani Xoossay nu mayzza aawatuyyo qaalaa gelidobay polettanaagaa naagiyo* gishshawu, haꞌꞌi hagan pirddawu eqqaas;
7 qassi nu 12 yaratikka qamminne gallassi yeemottidi Xoossayyo goynniiddi I qaalaa gelido hegee polettanaagaa naagidosona. Kawuwawu, ha hidootaa gaasuwan Ayhudati tana mootoosona.
8 “Xoossay hayqqida asata denttiyogaa intte ammanana danddayennaba giidi ayssi qoppeetii?*
9 Taani kase Naazireete Yesuusa sunttaa gaaddetiyogaa bessiya darobaa oottana koshshees gaada ammanays.
10 Taani Yerusalaamen hegaadan oottaas, qassi waanna kahineti tawu maataa immin, geeshshatuppe darota qasho keettan qachchaas; hegaadankka, eta woranaadan maayettaas.
11 Taani shiiqo keettatu ubban eta gamaydda eti bantta ammanuwa kaddanaadan oottanawu malaas; qassi taani eta bolli keehi peegaamettido gishshawu, hara katamatun deꞌiyageetakka ashshennan naaqqaas.
12 “Taani yaataydda waanna kahineti maataa immidi tana kiittin issitoo Damasqqo biyo wode,
13 gita Kawuwawu, ta mataaninne tanaara biyageetu matan awaappe wolqqaamiya pooꞌoy saluwappe pozhzhattidi pooꞌishin taani seeta gallassi ogiyan beꞌaas.
14 Yaanin nuuni ubbay saꞌan kunddin, Ibraawettuwan tana, ‘Saaꞌoolaa, Saaꞌoolaa, tana ayssi naaqqay? Neeni tanaara gaaddetiyogan* neeyyo qohettaasa’ yaagiyogaa siyaas.
15 Shin taani, ‘Godawu, neeni oonee?’ yaagaas. Qassi Goday hagaadan giis: ‘Taani neeni naaqqiyo Yesuusa.
16 Shin dendda eqqa. Tabaa neeni beꞌidobaanne taani nena bessanabaa awaajjananne* markkattana mala nena dooranawu, taani neeyyo tana qonccissidoy hegaassa.
17 Qassi taani nena etakko kiittiyo ha asaappenne hara biittaa asaappe nena ashshana;
18 eti xumaappe pooꞌuwawu, qassi Seexaanaa haaruwappe kiyidi Xoossaakko simmanaadan neeni eta ayfiya dooyana mala, taani nena kiittays. Hegaappe denddidaagan, Xoossay eta nagaraa atto gaana, qassi I baassi ammanettida haratuyyo oottidoogaadan, etayyo laataa immananne eta geeshshana.’
19 “Hegaa gishshawu, Kawuwa Agriiphphaa, Yesuusi he ajjuutan tawu yootidobaa azazettennan ixxabeykke,
20 shin taani koyro Damasqqon deꞌiyageeti, hegaappe simmin qassi Yerusalaameeninne Yihudaa biittan ubbasan deꞌiyageeti, qassi hara biittaa asatikka zilꞌꞌettidi laamettananne hegaadan laamettidoogaa bessiyabaa oottiyogan Xoossawu goynnana koshshiyogaa etawu yootaas.
21 Ayhudati tana Xoossaa garuwan oyqqidi woranawu malidoy hegaassa.
22 Shin Xoossay tana maaddido gishshawu, guuttawukka gitawukka hachchi gakkanaashin markkattays; hegaa bollikka, Xoossay erissidobaa yootiyageetinne Muusee hanana giidi xaafidobaappe harabaa yootikke. Eti xaafidobay
23 Kiristtoosi waayettanaagaanne Xoossay hayquwappe denttiyogeetuppe koyro gidanaagaa, qassi ha biittaa asawunne hara biittaa asawu pooꞌuwa awaajjanaagaa qonccissees.”
24 Bana mootidobawu Phawuloosi hegaadan zaarin, Pisxxoosi ba qaalaa xoqqu oottidi, “Phawuloosaa, neeni baqettaasa! Neeni keehi tamaaridoogee baqettanaadan oottees!” yaagiis.
25 Shin Phawuloosi hagaadan giis: “Gita Pisxxoosaa, taani baqettikke, shin taani yootiyobay tuma, qassi suure qoppays.
26 Kawoy ha ubbabaa loytti eriyo gishshawu, taani ayyo xalada yootays; hageeti geeman hanidaba gidenna gishshawu, ha ubbabaa I loytti erees.
27 Kawuwa Agriiphphaa, neeni Xoossay erissidobaa yootiyageeti odidobaa ammanay? Neeni ammaniyogaa taani erays.”
28 Shin Agriiphphi Phawuloosayyo, “Neeni daro takkennan Kiristtaane gidanaadan tana ammanttana” yaagiis.
29 Yaagin Phawuloosi hagaadan giis: “Daro takkennan gidin, gamꞌꞌidi gidin, ne xalaala gidennan, taani yootiyobaa hachchi siyiya ubbaykka, ha qashoy etawu attin, ta mala asa gidanaadan taani Xoossaa woossays.”
30 Hegaappe simmin, kawoy uttosaappe denddiis, qassi Yihudaa haariyagee, Barnniiqanne etaara uttida asatikka denddidosona.
31 Shin eti biiddi issoy issuwawu, “Ha bitanee hayqqana woy qashettana bessiyabaa aybanne oottibeenna” yaagidosona.
32 Hegaappe simmin, Agriiphphi Pisxxoosayyo, “Ha bitanee ba yohuwa Qeesaari qachchanaadan oychchennaakko birshshettana” yaagiis.
Footnotes
^ Woykkko “ta asaa.”
^ Woykko “hidootaa wottiyo.”
^ Mise, “kuuyeetii.”
^ Mise, “birata xamꞌꞌaa qakkiyogan.”
^ Mise, “maaddananne.”
