Kiitettidaageetu Oosuwa 27:1-44
27 Pisxxoosi nuuni markkabiyan Xaaliya baanaadan maacido gishshawu, eti Phawuloosanne qashettida amarida asata Yuuliyosa giyo, Awugisxxoosa wotaaddaratu citaa halaqaayyo sheedhdhidosona.
2 Nuuni Isiya moottaa gaxan deꞌiya dumma dumma sohota baana haniya markkabiyan gelidi Adiraamixiyonappe denddida; Maqidooniya moottan deꞌiya Tasalonqqeppe yiida Arisxxirokoosikka nunaara deꞌees.
3 Wonttetta gallassi nuuni Sidoona gakkida, qassi Yuuliyosi Phawuloosayyo kehidi* I ba laggetukko beennaadan diggibeenna gishshawu, koshshiyaban eti A maaddidosona.
4 Nuuni yaappe markkabiyan denddidi, nuna teqqiya carkkuwappe sheephetanawu Qophphiroosa mataara aadhdhida.
5 Hegaappe guyyiyan, nuuni Kilqqiyanne Phinifiliya mataara biidi Luqiyawu abbaa gaxan deꞌiya Miran eqqida.
6 Yan wotaaddaratu halaqay Xaaliya biya Iskkinddiriya markkabiya demmidi, nuuni an gelanaadan oottiis.
7 Nuuni daro gallassi loddan bi simmidi, waayettidi Qaniidoosa gakkida. Nuuni sinttawu beennaadan carkkoy diggido gishshawu, Salmmoona mataara kanttidi Qarxxeesan sheephetidi aadhdhida.
8 Qassi abbaa gaxaakko shiiqidi waayetti biiddi Laasiya katamaa matan deꞌiya Loꞌꞌo Qatuwa giyosaa gakkida.
9 Yan daro gallassaa takkida, qassi markkabiyan biyogee hirggissiyaba; Genttiyo Gallassaa xoomaykka aadhdhido gishshawu, oottana bessiyabaa Phawuloosi
10 hagaadan giidi etayyo yootiis: “Asawu, ha buussay loꞌꞌo gidennaagaa akeekays; nuuni sinttawu biikko markkabee muukettana, caanaykka xayana, qassi nuunikka* hayqqana danddayoos.”
11 Shin wotaaddaratu halaqay Phawuloosi yootiyobaa siyiyogaa aggidi, markkabiya laaggiyageenne markkabiya goday yootiyobaa siyiis.
12 Loꞌꞌo Qatoy balgguwa aattanawu injjetenna gishshawu, balgguwa aattanawu Qarxxeesan markkabee eqqiyo Pinqqe gakkana danddayikko, he sohuwappe denddana mala daroti zoridosona; Pinqqee arshshokko simmi uttiis.
13 Carkkoy tohossa baggappe loddan carkkin, eti biyosaa gakkana giidi qoppido gishshawu, hinggetta malatiyabaa* denttidi abbaa gaxaakko shiiqidi Qarxxeesa mataara laaggiyogaa doommidosona.
14 Shin daro takkennan, Awuraaqiisa* giyo wolqqaama carkkoy yan denddiis.
15 Markkabee sinttawu beennaadan he wolqqaama carkkoy teqqido gishshawu, nuuni carkkoy sugiyo ginaa biida.
16 Hegaappe simmin, nuuni Qeeda giyo qeeri haruuruwan sheephetidi sitti giidi biikkonne, markkabiyawu guyye baggan deꞌiya wolwoluwa* ashshanawu keehi baaxetida.
17 Shin eti wolwoluwa pude kessi simmidi, kaafiyaban markkabiya garssaara minttidosona, qassi Sirttiisa shafiya bolli kiyennaadan yayyidi sharaa wodoruwa lefettin markkabee carkkuwan sugettidi biis.
18 Beetay nuna keehi cuggiyo gishshawu, eti wonttetta gallassi markkabiyan caanettidabaa poxxiyogaa doommidosona.
19 Qassi heezzantta gallassi, eti markkabiya miishshatuppe amaridaagaa olidosona.
20 Nuuni awa ayfiyanne xoolinttiya daro gallassi beꞌibeenna gishshawunne wolqqaama* beetay nuna keehi shociyo gishshawu, nuuni paxa attana giyo hidootay muleera xayiis.
21 Eti qumaa meennan daro wodee aadhdhi simmin, Phawuloosi eta giddon denddi eqqidi hagaadan giis: “Asawu, intte ta zoriya siyidi Qarxxeesappe denddennaakko ha waayee gakkenna, qassi xayidabaykka attana.
22 Shin markkabe xallay meqqanappe attin intteppe issi asinne* hayqqenna gishshawu, intte yayyennaadan taani zorays.
23 Taani ayyo haggaaziyonne goynniyo Xoossay kiittido kiitanchchay qammi ta matan eqqidi,
24 hagaadan giis: ‘Phawuloosaa, yayyoppa. Neeni Qeesaara sinttan eqqana bessees, qassi siya! Xoossay nenakka nenaara biya asaa ubbaakka ashshana.’
25 Hegaa gishshawu asawu, taayyo odettidaagaadan Xoossay oottanaagaa taani ammaniyo gishshawu, yayyoppite.
26 Gidoppe attin, issi haruuruwa matan nu markkabee meqqiyogee attenna.”
27 Adriya Abbaa bolli 14tta qammi bilahe nuna carkkoy cuggishin, markkabiya laaggiyageeti biittaa mati gakkida giidi qoppidosona.
28 Eti ciimmaa likkiyo wode 36 meetire gidiyogaa beꞌido gishshawu, guuttaa sinttawu shiiqidi haranttuwa likkiyo wode 27 meetire gidiyogaa beꞌidosona.
29 Nuuni markkabee zaallaa bolli kiyees giidi yayyido gishshawu, eti markkabiyawu guyye baggappe oyddu techchata* abban yeggidi saꞌay wonttana mala amottiiddi naagidosona.
30 Shin markkabiya laaggiyageeti hinggetta malatiyabaa* markkabiya sinttappe duge wottiyaba milatidi markkabiyappe kiyidi baanawu malidi, wolwoluwa duge abban wottiyo wode,
31 Phawuloosi wotaaddaratuyyonne eta halaqaayyo, “Ha asati ha markkabiyan deꞌana xayikko, intte attana danddayekketa” yaagiis.
32 Yaatin wotaaddarati wodoruwa qanxxidi wolwoluwa carkkoy suganaadan oottidosona.
33 Saꞌay wonttana haniyo wode, Phawuloosi eti ubbay qumaa maanaadan hagaadan giidi zoriis: “Intte yeemottidi naagishin hachchi 14tta gallassa, qassi intte quma mule mibeekketa.
34 Hegaa gishshawu, intte qumaa maanaadan taani inttena zorays; intte huuphiya binnaanaappe issoynne xayenna gishshawu, hegee inttena maaddana.”
35 I yaagi simmidi, oyttaa ekkiis, eta ubbaa sinttan Xoossaa galatiis, oyttaa menttiis, yaatidi miyogaa doommiis.
36 Hegaa gishshawu, eti ubbay minettidosonanne qumaa miyogaa doommidosona.
37 Markkabiyan deꞌiya nuuni muleera 276 asa.*
38 Eti qumaa miidi kallido wode, gisttiya markkabiyappe abban olidi caanaappe poxxidosona.
39 Saꞌay wonttiyo wode, eti biittaa beꞌikkonne hegee awakko eribookkona, shin abbaa gaxan shafetiya sohuwa beꞌidi, danddayettikko markkabiya yan essanawu murttidosona.
40 Hegaa gishshawu, eti hinggetta malatiyabaa* qanxxidi abbaa giddo yeddidosona, hegaa bollikka haattaa shaariyobaa qashuwa lefettidosona; qassi sintta bagga sharaa carkkoy suganaadan xoqqu oottidi abbaa gaxi gakkidosona.
41 Markkabee haattaa giddon kuurettida shafiya bolli kiyi uttidaashin eti laaggin markkabiyawu sintta baggay xishettidi qaaxennan ixxiis, shin beetay keehippe shociyo gishshawu, guyye baggay meꞌerettiyogaa doommiis.
42 Yaanin qashettida asatuppe ooninne haattaa wadhdhidi kessi ekkenna mala, wotaaddarati eta woranawu qoppidosona.
43 Shin wotaaddaratu halaqay Phawuloosa saro ashshanawu murttido gishshawu, eti halchchidobaa oottennaadan diggiis. I haattaa waraa eriyageeti abban guppi gelidi gaxi koyro kiyanaadan azaziis;
44 harati qassi markkabiyappe meqqida mittaaninne haraban eta geeduwa biidosona. Hegaa gishshawu, nuuni ubbay haattaappe saro gaxi kiyida.
Footnotes
^ Hegeekka, asay issoy issuwa siiqiyogaappe denddidaagan kehiyogaa.
^ Woykko “nu shemppoykka.”
^ Sanssalatan woy wodoruwan qachchidi markkabee qaaxxennan sohuwan eqqana mala abban yeggiyo miishsha.
^ Hegeekka, huuphessappenne arshshoppe gidduwara yiya carkkuwa.
^ Shemppo ashshanawu goꞌettana danddayiyo guutta wolwoluwa.
^ Mise, “guuxxenna.”
^ Woykko “shemppoynne.”
^ Woykko “shemppo.”
