Kiitettidaageetu Oosuwa 28:1-31
28 Nuuni haattaappe saro gaxi kiyi simmidi, he haruuroy Maltta geetettiyogaa erida.
2 Qassi he haruuruwa* asati nuuyyo daroppe kehidosona.* Iray bukkiyo gishshawunne meeggiyo gishshawu, eti tamaa eettidi nuna ubbaa mokki ekkidosona.
3 Shin Phawuloosi qashetti uttida qayxaareta shiishshidi taman yeggiyo wode, tamaa mishuwappe denddidaagan hasoy qashuwa giddoppe kiyidi A kushiyan xaaxettiis.
4 He haruuruwa asati hasoy A kushiyan gooligooliyogaa beꞌidi issoy issuwawu, “Siree baynnan, ha bitanee shemppo worida asa, I abbaappe saro attikkonne, awutiya achchiyagee* I paxa deꞌennaadan diggiis” yaagidosona.
5 Shin I hasuwa wuxakkidi taman yeggiis, qassi aynne hanibeenna.
6 Shin eti A bollay kixxana woy I akeekennan hayqqidi kunddana giidi naagidosona. Eti naagiiddi daro takki simmidi, iitabi aybinne A bolli gakkibeennaagaa beꞌido gishshawu, bantta qofaa laammidi I xoossa giidi qoppiyogaa doommidosona.
7 He haruuruwa haariya Pupiliyosa giyo bitaniyawu hegaa heeran gadee deꞌees; I nuna mokkidi heezzu gallassi gakkanaashin imattiis.
8 Qassi Pupiliyosa aawaa karayiyonne michchiyo gishshawu I zinꞌꞌiis, yaatin Phawuloosi akko biidi woossiis, ba kushiya A bolli wottiisinne A pattiis.
9 Hegaappe guyyiyan, he haruuruwan deꞌiya harggida hara asaykka akko yiidi paxiis.
10 Qassi eti nuna bonchchido gishshawu darobaa immidosona, yaatin nuuni baanawu denddiyo wode, nuussi koshshiya ubbabaa markkabiyan caanidosona.
11 Heezzu aginappe guyyiyan, sintta baggan Zuusa naatu misilee deꞌiyo markkabiyan yaappe denddida. He Iskkinddiriya markkabee balgguwa he haruuruwan aattiis.
12 Markkabee Siraakusen eqqin, nuuni yan heezzu gallassaa takkida;
13 yaappe denddi biidi Regiyume gakkida. Issi gallassappe guyyiyan, tohossappe carkkoy denddin naaꞌꞌantto gallassi Putiyoluusa gakkida.
14 Yan ishatuura gayttida, qassi eti nuna woossin etaara laappun gallassaa takkida; hegaappe simmin Roome baanawu denddida.
15 Roomen deꞌiya ishati nuuni yaa biyogaa siyidi, Heezzu Keettata* giyosaa yiidosona, qassi issoti issoti Afiyosa Giyaa gakkanaashin yiidosona. Phawuloosi eta beꞌidi Xoossaa galatiisinne minettiis.
16 Wurssettan nuuni Roome gakkin, Phawuloosi bana naagiya wotaaddaraara barkka deꞌana mala eeno giidosona.*
17 Gidoppe attin, heezzu gallassappe guyyiyan, I Ayhudatu giddoppe gita asata xeegidi shiishshiis. Eti shiiqido wode, I etayyo hagaadan giis: “Asawu, ta ishatoo, taani nu asaa bolli woy nu mayzza aawatu wogaa bolli ayba nagaranne oottabeykke, shin taani Yerusalaamen qashettaas, qassi eti tana Roome kawotettawu aattidi immidosona.
18 Hegaa bollikka, eti tana oychchi simmidi, tana worissiyaba aybanne demmibeenna gishshawu, birshshanawu koyidosona.
19 Gidoppe attin, Ayhudati hegaa maayennan ixxin, taani he yohuwa Qeesaari qachchanaadan oychchiyogee attennaba gidiis, shin taani yaatidoy ta biittaa asaa mootiyobi deꞌiina gidenna.
20 Taani inttenaara gayttada haasayanawu oychchidoy hegaassa, ayssi giikko, taani Israaꞌeelati yeemottidi naagiyobaappe denddidaagan ha sanssalatan qashettaas.”
21 Eti ayyo hagaadan giidosona: “Nebaa yootiya dabddaabbee Yihudaappe nuukko gakkibeenna, woy qassi yaappe yiida ishatuppe ooninne nebaa haasayibeenna woy nena iitaban nuuyyo denttibeenna.
22 Shin ubbasan deꞌiya asay ha citaa iitaban denttiyogaa nuuni eriyo gishshawu, neeni yootiyobaa siyanawu koyoos.”
23 Eti aara gayttana gallassaa keeridi, koyroogaappekka daroti I deꞌiyo sohuwa akko yiidosona. Qassi I Muuse Higgiyappenne Xoossay erissidobaa yootiyageeti xaafidobaappe yootidi Yesuusabaa eta ammanttanawu, maalladoppe omarssi gakkanaashin Xoossaa Kawotettaabaa poli markkattidi yohuwa etayyo qonccissiis.
24 I yootidobaa amaridaageeti ammanidosona; harati qassi ammanibookkona.
25 Eti issoy issuwa qofaa phalqqido gishshawu, kiyidi biyogaa doommin, Phawuloosi hagaadan giidi issibaa yootiis:
“Xoossay erissidobaa yootiya Isiyasa baggaara geeshsha ayyaanay intte mayzza aawatuyyo gammabaa yootiis;
26 hagaadan giis: ‘Ha asaakko baada hagaadan ga: “Intte siyana shin akeekibeennabadan hanana, intte beꞌana shin beꞌibeennabadan hanana.
27 Ayssi giikko, ha asaa akeekay daallamiis, eti siyoosona shin azazettokkona, eti aynne beꞌenna mala woy aynne siyenna mala, bantta ayfiya goozidosonanne bantta hayttaa tuccidosona; hegaappe denddidaagan eti banttappe koyettiyabaa akeekenna gishshawu, taani pattanaadan taakko simmokkona.”’
28 Hegaa gishshawu, Xoossay asaa waati ashshiyakko ha odettiyabay hara biittaa asawukka awaajjettidoogaa erite; eti hegaa siyanaagee tuma.”
29 ——
30 I keraa ekkido ba keettan naaꞌꞌu laytta kumettaa deꞌiis, qassi baakko yiya asaa ubbaa mokki ekkidi,
31 teqqiyabi baynnan, xalidi* etayyo Xoossaa Kawotettaabaa yootiisinne Godaa Yesuus Kiristtoosabaa eta tamaarissiis.
Footnotes
^ Woykko “Giriikettuwa haasayenna.”
^ Hegeekka, asay issoy issuwa siiqiyogaappe denddidaagan kehiyogaa.
^ Woykko “Bessiya Pridday.” Giriikettuwan Dike, bessiyabaa pirddidi qaxxayiyogaa xoossiyo woy bessiya pirddaa giyo qofaa gidennan aggenna.
^ Keettati qumaa miyonne shemppiyo sohota.
^ Woykko “anttidosona.”
^ Woykko “yayyennan.”
