Kiitettidaageetu Oosuwa 3:1-26
3 Pheexiroosinne Yohaannisi uddufun saate heeran woosaa saatiyawu Xoossaa garuwa boosona,
2 qassi wobbe gididi yelettida issi bitaniya asay tookkiis. I Xoossaa garuwa geliya asay miishshaa immanaadan woossana mala, Loꞌꞌiyagaa giyo Xoossaa garuwa penggiya matan eti A ubba galla wottoosona.
3 I Pheexiroosinne Yohaannisi Xoossaa garuwa gelana haniyageeta beꞌidi, miishshaa immanaadan eta oychchiyogaa doommiis.
4 Shin Pheexiroosinne Yohaannisi akko xeellidosona, qassi Pheexiroosi A, “Nuukko xeella” yaagiis.
5 Yaagin, I bawu eti aybakko immanaakkonne giidi tishshi oottidi xeelliis.
6 Shin Pheexiroosi hagaadan giis: “Taayyo birinne worqqi baawa, shin taayyo deꞌiyabaa neeyyo immana. Naazireete Yesuus Kiristtoosa sunttan hemetta!”
7 Yaagidi, A ushachcha kushiya oyqqidi A pude denttiis. Sohuwara A tohotinne A meeshi meqettati minni aggidosona;
8 yaatin I shuttu giidi ba tohotun eqqidi hemettiyogaa doommiis, qassi hemettiiddi, guppiiddinne Xoossaa sabbiiddi etaara Xoossaa garuwa geliis.
9 Qassi asay ubbay I hemettishiininne Xoossaa sabbishin beꞌiis.
10 Qassi eti ha bitanee asay miishshaa immanaadan naagiiddi, Loꞌꞌiyagaa giyo Xoossaa garuwa penggiya matan uttiyagaa gidiyogaa akeekidosona; hegaa gishshawu, eti he bitanee hemettiyogaa beꞌidi malaalettidosona.
11 Bitanee Pheexiroosanne Yohaannisa oyqqi uttidaashin, asay ubbay keehi malaalettidi issippe woxxiiddi Solomona Ogiya giyo sohuwa etakko yiis.
12 Pheexiroosi hegaa beꞌidi asaayyo hagaadan giis: “Israaꞌeela asatoo, intte hagan ayssi keehi malaaletteetii, qassi nuuni nu wolqqan woy Xoossaayyo kumetta wozanaappe goynniyo gishshawu ha bitanee hemettanaadan oottidobadan qoppidi ayssi nuna tishshi oottidi xeelleetii?
13 Philaaxoosi Yesuusa birshshanawu maacikkonne, intte Yesuusa ayyo aattidi immidetanne Philaaxoosa sinttan A erokko giideta. Abrahaama, Yisaaqanne Yaaqooba Xoossay, nu mayzza aawatu Xoossay, ayyo haggaaziya ha Yesuusa bonchchiis.
14 Ee, intte he geeshshaanne xilluwa erokko giidi, shemppo worida ura intteyyo birshshanaadan Philaaxoosa oychchideta,
15 shin deꞌuwa immanawu sunttettidaagaa intte worideta. Gidikkonne, Xoossay A hayquwappe denttiis, qassi hegawu nuuni markka.
16 Intte eriyonne ha beꞌiyo bitanee, nuuni Yesuusa sunttan ammaniyo gishshawu, qassi A sunttan minniis. Nuuni A ammaniyo gishshawu ha bitanee intte ubbaa sinttan muleera paxiis.
17 Qassi ishatoo, inttena kaalettiya asatuugaadan intte ay oottiyakko erennan hegaa oottidoogaa taani erays.
18 Shin Xoossay I erissidobaa yootiyageetu ubbaa doonan ba Kiristtoosi waayettanaagaa awaajjissidobay hegaadan polettanaadan oottiis.
19 “Hegaa gishshawu, Xoossay intte nagaraa quccana mala, Yihooway* inttena gazddissiyo wodiya ehaanaadan zilꞌꞌettidi laamettite, qassi Xoossaakko simmite;
20 yaatikko, I Yesuusa, intteyyo sunttido Kiristtoosa kiittana.
21 Xoossay I erissidobaa beni yootida geeshshatu doonan odido ubbabaa ooraxissiyo wodee yaana gakkanaashin Yesuusi saluwan naagana bessees.
22 Muusee hagaadan giis: ‘Xoossay Yihooway I erissidobaa taagaadan yootiya ura intte ishatu giddoppe denttana. I yootiyobaa aybanne intte siyana bessees.
23 Xoossay I erissidobaa yootiya hegee odiyobaa siyenna oonanne* asaa giddoppe muleera xayssana.’
24 Qassi Sameelan doommidi Xoossay erissidobaa yootiya ubbati ha wodiyabaa geeshshidi odidosona.
25 Intte Xoossay erissidobaa yootiyageetu naata, qassi Xoossay Abrahaamayyo, ‘Saꞌan deꞌiya asay* ubbay ne zerettaa baggaara anjjettana’ yaagidi intte mayzza aawatuyyo maacidobaa laattiyageeta.
26 Xoossay baassi haggaaziyagaa dentti simmidi, inttena ubbaa iita oosuwappe simmanaadan maaddiyogan anjjanawu koyro A inttekko kiittiis.”
Footnotes
^ Mise, “Yihooway ba sinttappe.”
^ Woykko “ay shempponne.”
^ Mise, “Saꞌan deꞌiya keettati.”
