Kiitettidaageetu Oosuwa 4:1-37
4 Pheexiroosinne Yohaannisi asaayyo yootishin, kahineti, Xoossaa garuwa zabetu halaqaynne Saaduqaaweti etakko puttu giidosona.
2 He naaꞌꞌati asaa tamaarissiyo gishshawunne Yesuusi hayquwappe denddidoogaa* geeshshidi yootiyo gishshawu, he asati yiillotidosona.
3 Hegaa gishshawu, he asati eta oyqqidosonanne saꞌay omarido gishshawu, wonttetta gallassi gakkanaashin qachchidosona.
4 Shin he haasayaa siyida asatuppe daroti ammanidosona, yaatin attuma asaa qooday 5,000 heera gidiis.
5 Wonttetta gallassi, Ayhudata kaalettiyageeti, cimatinne higgiya tamaarissiyageeti Yerusalaamen shiiqidosona;
6 eta giddon waanna kahinee Haanni, Qayaafi, Yohaannisi, Iskkinddirinne waanna kahiniya dabboti ubbati deꞌoosona.
7 Eti Pheexiroosanne Yohaannisa yan essidi, “Intte ayba maatan woy O sunttan hagaa oottidetii?” yaagidi oychchidosona.
8 Yaagin Pheexiroosi geeshsha ayyaanay an eellin etayyo hagaadan giis:
“Asaa kaalettiyageetoonne cimatoo,
9 nuuni ha wobbe bitaniyawu oottido loꞌꞌobaanne I waani paxidaakko intte eranawu koyeetii?
10 Intte mittan kaqqidi worikkonne Xoossay hayquwappe denttido Naazireete Yesuus Kiristtoosa sunttaaninne A baggaara ha bitanee paxidi intte sinttan eqqidoogaa intte ubbaynne Israaꞌeela asay ubbay erana koshshees.
11 ‘Gimbbiyageeti intte karidi aggin zooziyawu liiphe shuchchaa* gididaagee’ ha Yesuusa.
12 Qassi nuuni attana mala asaayyo imettida hara suntti saluwappe garssaara baynna gishshawu, atotettay appe hara O baggaarakka yeenna.”
13 He asati Pheexiroosanne Yohaannisa xalatettaa beꞌidi, eti tamaaribeennaagaanne* wogetibeennaagaa akeekidi malaalettidosona. Qassi eti kase Yesuusaara zuppettidoogaa akeekidosona.
14 Eti paxida bitanee Pheexiroosaaranne Yohaannisaara eqqidaagaa beꞌiyo gishshawu, hegawu zaariyobaa xayidosona.
15 Hegaa gishshawu, shiiqido sohuwappe kare kiyanaadan eta azazidi, issoy issuwara zorettiyogaa doommidosona;
16 eti hagaadan giidosona: “Nuuni ha asata waatanee? Yerusalaamen deꞌiya asay ubbay eriyo gita malaataa eti oottido gishshawu, nuuni hegaa worddo gaana danddayokko.
17 Hegaa gishshawu, eti hagaappe guyyiyan hegaa asawu yootenna mala yashissoos, qassi hagaappe simmin he bitaniya sunttan ooyyonne yootenna mala etassi odoos.”
18 Yaatidi eta xeegidi, Yesuusa sunttan yootiyogaa woy tamaarissiyogaa agganaadan eta azazidosona.
19 Shin Pheexiroosinne Yohaannisi etayyo hagaadan giidosona: “Xoossaayyo azazettiyogaappe intteyyo azazettiyogee Xoossaa xeelan likke giidi intte qoppikko, hegee intte shene.
20 Gidoppe attin, nuuni beꞌidobaanne siyidobaa yootiyogaa aggana danddayokko.”
21 Yaagin, eta qaxxayanawu gaaso xayido gishshawunne hanidaban asay ubbay Xoossaa sabbiyo gishshawu, eti asaayyo yayyidi eta gujji yashissidi birshshidosona.
22 He malaaliya paxuwa* paxida bitaniya layttay 40ppe daro.
23 Birshshi simmin, eti bantta asaakko biidi waanna kahinetinne cimati banttana woygidaakko etayyo yootidosona.
24 Eti hegaa siyidi, bantta qaalaa xoqqu oottidi hagaadan giidi issippe Xoossaa woossidosona:
“Ubbaa Haariya Godawu, saluwa, saꞌaa, abbaanne eta giddon deꞌiya ubbabaa medhdhiday nena,
25 qassi geeshsha ayyaanaa baggaara nu mayzza aawaa Daawita doonan hagaadan giiday nena: ‘Dumma dumma biittaa asay ayssi hanqqettidee, qassi asay ayssi pattennabaa qoppii?
26 Saꞌaa kawoti maayettidi, asaa haariyageetuura issippe shiiqidi Yihoowa bollinne I sunttidoogaa* bolli denddidosona.’
27 Heeroodisinne Phenxxeniya Philaaxoosi hara biittaa asaaranne Israaꞌeela asaara issippe ha kataman shiiqidi, neeni sunttidonne neeyyo haggaaziya, geeshshaa Yesuusa bolli denddidoogee tuma;
28 ne kushiyaninne ne sheniyan hanana mala kasetidi qashettidabaa eti oottidosona.
29 Qassi Yihoowaa, eti haꞌꞌi nuna yashissiyogaa siyada, ne aylleti ne qaalaa yootiyogaa aggenna mala muleera xalanaadan maadda,
30 qassi hargganchchata pattada ne wolqqaa bessiyogaanne neeyyo haggaaziya, geeshshaa Yesuusa sunttan malaatatanne malaaliyabata oottiyogaa aggoppa.”
31 Eti wozanappe woossi simmin, eti deꞌiyo keettay qaaxxiis, qassi etan ubban geeshsha ayyaanay eellin, eti Xoossaa qaalaa xalidi yootidosona.
32 Qassi ammanida cora asay issi wozananne issi shemppo; eti ubbabaa issoy issuwawu immoosonappe attin, etappe issoynne baayyo deꞌiyaba aybanne babaadan xeellenna.
33 Hegaa bollikka, kiitettidaageeti Goday Yesuusi hayquwappe denddidoogaa kaseegaadankka keehi zirxxi oottidi markkattidosona, qassi Xoossay eta ubbaa daroppe anjjiis.
34 Gadee woy keettay deꞌiyogeeti ubbay hegaa bayzzidi miishshaa ehiyo gishshawu, eta giddon ooninne metootibeenna,
35 qassi eti he miishshaa kiitettidaageetuyyo ehoosona. Kiitettidaageeti qassi metootida ubbatuyyo he miishshaa immoosona.
36 Qophphiroosan yelettida Leewa zariyawu, kiitettidaageeti Barnnaabaasakka (hegee “Minttettuwa Naꞌaa” giyogaa) giyo Yooseefawu
37 gadee deꞌees, qassi I he gadiya bayzzidi kiitettidaageetuyyo miishshaa ehiis.
Footnotes
^ Woykko “Yesuusa hanotan hayquwappe dendduwabaa.”
^ Mise, “zooziya huuphe.”
^ Hegee Rebbetu timirtte keettatun loohibeennaagaa bessiyogee qoncce.
^ Woykko “malaatan.”
^ Woykko “A Kiristtoosa.”
