Kiitettidaageetu Oosuwa 5:1-42
5 Shin Hanaaniya giyo bitanee ba machchee Saphphiiriira gadiya bayzziis.
2 Gidoppe attin, I ba machchiya erishin he miishshaappe amaridaagaa qotti ashshidi, attidaagaa ehiidi kiitettidaageetuyyo immiis.
3 Shin Pheexiroosi hagaadan giis: “Hanaaniyaa, neeni xalada geeshsha ayyaanaa cimmanaadaaninne gadiya bayzzido miishshaappe amaridaagaa qottada ashshanaadan Seexaanay nena denttettana mala ayssi eeno gaadii?
4 Bayzzanaappe kase gadee nebaa gidennee? Qassi bayzza simmada miishshaa ne koyidogaadan oottana danddayikkii? Yaatin ha iitabaa ayssi qoppadii? Neeni cimmanawu malidoy Xoossaappe attin, asaa gidenna.”
5 Hanaanee he qaalata siyidi, kunddidi hayqqiis. Qassi hegaa siyida ubbati keehi yayyidosona.
6 Yaatin yelagati denddidi, afalan A xaaxidi tokki efiidi moogidosona.
7 Heezzu saate gidiyagee aadhdhi simmin, A machchiya hanidabaa erennan yaada soo gelaasu.
8 Pheexiroosi O, “Ane tawu yoota, gadiya intte hagaa keena miishshan bayzzidetii?” yaagiis. A, “Ee, hegaa keena” yaagaasu.
9 Yaagin Pheexiroosi iyyo hagaadan giis: “Intte naaꞌꞌay Yihoowa ayyaanaa paaccanawu ayssi maayettidetii? Siya! Ne keettaawaa moogida asati pengge gakkidosona, eti nenakka tookkidi kessana.”
10 Sohuwara A Pheexiroosa sinttan kunddada hayqqaasu. Yelagati soo geliyo wode, A hayqqidoogaa beꞌidi, tookki kessidi azinaa miyyiyan O moogidosona.
11 Hegaa gishshawu, galchchay kumettaynne he hanidabata siyida ubbati keehippe yayyidosona.
12 Hegaa bollikka, kiitettidaageeti kaseegaadankka daro malaatatanne malaaliyabata asaa giddon oottoosona; qassi eti ubbay Solomona Ogiya giyosan issippe shiiqoosona.
13 Hara ooninne etaara shiiqanawu xalibeennaagee tuma; shin asay eta nashshees.
14 Hara daro attuma asatinne macca asati Godaa ammanidosonanne A kaalliyageeta gididosona.
15 Eti haray atto, Pheexiroosi aadhdhiyo wode harggida asatuppe amaridaageetukkonne A kuway gakkana mala, wogga ogiya kessidi halaaninne hiixan eta zinꞌꞌissoosona.
16 Hegaa bollikka, Yerusalaame matan deꞌiya katamatuppe cora asati harggida asaanne iita ayyaanay oyqqin waayettiya asaa tookkidi yoosona, qassi he asati ubbay paxoosona.
17 Shin gita kahineenne Saduqaawetu timirttiya kaalliya, aara deꞌiya ubbati keehi yiillotidi* denddi eqqidosona.
18 Qassi eti kiitettidaageeta oyqqidi katamaa qasho keettan qachchidosona.
19 Shin qammi, Yihoowa kiitanchchay qasho keettaa penggeta dooyidi, eta kare kessidi hagaadan giis:
20 “Xoossaa garuwa biite, yaatidi merinaa deꞌuwabaa odettida ubbabaa asaayyo yootiyogaa aggoppite.”
21 Eti hegaa siyi simmidi, saꞌay wonttiyo wode Xoossaa garuwa gelidi tamaarissiyogaa doommidosona.
Gita kahineenne aara biidaageeti Sanhediriniya* asaanne Israaꞌeela asaa cimata ubbaa issippe shiishshidosona; yaatidi kiitettidaageeta eta sintti ehaanaadan zabeta qasho keetti kiittidosona.
22 Shin zabeti qasho keettaa gakkidi, yan eta demmibookkona. Hegaa gishshawu, guyye simmidi etayyo hagaadan giidosona:
23 “Qasho keettaa mintti qulppi wottidoogaa, qassi naagiyageeti penggen eqqidoogaa nuuni beꞌida, shin kariya dooyi gelidi giddon oonanne demmibookko.”
24 Xoossaa garuwa zabetu halaqaynne gita kahinee hegaa siyido wode, hegaappe simmin aybi hananaakko etayyo xiphphi giis.
25 Shin issi asi yiidi etayyo, “Siyite! Intte qashissido asati Xoossaa garuwan eqqidi asaa tamaarissoosona” yaagiis.
26 Yaagin zabetu halaqay ba wotaaddaratuura biidi eta ekkidi yiis, shin eti banttana asay shuchchan caddanaakkonne giidi yayyido gishshawu, eta qohennan ehiidosona.
27 Yaatidi, eti kiitettidaageeta ehiidi Sanhediriniya* sinttan essidosona. Yaatin gita kahinee eta hagaadan giidi oychchiis:
28 “Intte ha sunttan tamaarissenna mala nuuni mintti azazida, shin siyite! intte tamaarissiyobaa Yerusalaamen ubbasaa gattideta, qassi ha bitaniya suuttan nuuni oyshettanaadan oottanawu murttideta.”
29 Pheexiroosinne kiitettida harati hagaadan giidi zaaridosona: “Nuuni ayyo azazettana bessiyo haariyagee Xoossaappe attin, asa gidenna.
30 Intte mittan kaqqidi worido Yesuusa nu mayzza aawatu Xoossay hayquwappe denttiis.
31 Xoossay Israaꞌeela asay zilꞌꞌettidi laamettin eta nagaray atto geetettana mala, Kaalettiya Waannaanne Ashshiyagaa ootti A sunttidi, baappe ushachcha baggan xoqqu xoqqu oottiis.
32 Nuuninne Xoossay baayyo azazettiya* asatuyyo immido geeshsha ayyaanay hageetussi markka.”
33 Eti hegaa siyidi hanqquwa suullidosonanne* eta woranawu koyidosona.
34 Shin asay ubbay bonchchiyo, higgiya tamaarissiya Gamaaliꞌeela giyo Parisaawee Sanhediriniyan* denddi eqqidi, asata guutta wodiya kare kessanaadan azaziis.
35 I etayyo hagaadan giis: “Israaꞌeela asatoo, intte ha asatu bolli oottana qoppiyobawu naagettite.
36 Leemisuwawu, hagaappe kase Tewodaasi, ‘Taani Xoossay erissidobaa yootiyagaa’ yaagiiddi denddiis, qassi 400 gidiya asay A kaalliis. Shin asay A worin, A kaalliyageeti ubbay laalettidosonanne eta halchchoy hada attiis.
37 Appe guyyiyan, asaa qoodiyo wode, Galiilaa Yihuday denddin asay A kaalliis. He bitaniyakka asay worin A kaalliya ubbati laalettidosona.
38 Hegaa gishshawu, taani intteyyo odays, ha asata birshshiteppe attin, aybanne oottoppite. Eti halchchiyobay woy oottiyobay asaba gidikko xayana;
39 shin hegee Xoossaaba gidikko, intte ha asata xayssana danddayekketa. Hankkoode, geella intte Xoossaara gaaddetana danddayeeta.”
40 Yaagin eti A zoriya siyidosona, qassi kiitettidaageeta xeegidi shocidosona;* yaatidi Yesuusa sunttan yootiyogaa agganaadan azazidi eta birshshi yeddidosona.
41 Yesuusa sunttaa gishshawu kawuyyiyo maataa Xoossay etayyo immido gishshawu, Sanhediriniya* sinttappe ufayttiiddi kiyidi biidosona.
42 Eti ubba galla Xoossaa garuwan, qassi keettan keettan biidi, Kiristtoosabaa, Yesuusabaa mishiraachchuwa aggennan tamaarissidosonanne yootidosona.
Footnotes
^ Woykko “qanaatidi.”
^ Hegeekka, haariya urawu azazettiyogaadan.
^ Woykko “peegaamettidosonanne.”
^ Woykko “wadhdhidosona.”
