Kiitettidaageetu Oosuwa 6:1-15
6 He wode, Yesuusa kaalliyageetu qooday gujji gujji biis; qassi ubba galla yeziyo qumaappe banttana gakkiyagaa bantta amꞌꞌeti demmenna gishshawu, Giriikettuwa haasayiya Ayhudati Ibraawettuwa haasayiya Ayhudatu bolli zuuzummidosona.
2 Hegaa gishshawu, kiitettida tammanne naaꞌꞌati Yesuusa kaalliya ubbata issippe shiishshidi hagaadan giidosona: “Nuuni Xoossaa qaalaa tamaarissiyogaa aggidi qumaa yeziyogee maara* gidenna.
3 Hegaa gishshawu, ishatoo, nuuni eta ha oosuwawu sunttana mala, geeshsha ayyaanaynne hayyoy eellido, ammanettiya* laappun attuma asata intte giddoppe doorite;
4 shin nuuni woosaaninne qaalaa haggaazan sheekkana.”
5 Eti yootidobay shiiqidaageeta ubbaa ufayssiis; yaatin, ammanoynne geeshsha ayyaanay eellido Isxxifaanoosa, qassi Piliphphoosa, Phirokoroosa, Niqaaroona, Ximoona, Pharmmenanne ammanuwa laammidi Ayhuda gidida Anxxookiya Niiqolaawoosa dooridosona.
6 Eta kiitettidaageetukko ehiidosona, qassi kiitettidaageeti woossi simmidi bantta kushiya eta bolli wottidosona.
7 Hegaappe denddidaagan, Xoossaa qaalay aakki aakki biisinne Yesuusa kaalliyageetu qooday Yerusalaamen keehi gujji gujji biis; qassi daro kahineti ammanidosona.
8 Xoossay Isxxifaanoosaara deꞌees, qassi Xoossay ayyo gita wolqqaa immido gishshawu, I asaa giddon keehi malaaliyabatanne malaatata oottiis.
9 Shin Laꞌa Kiyidaageetu Shiiqo Keettaa giyogaappe amarida asati, qassi Qareenanne Iskkinddiriya asati amaridaageeti, hegaadankka Kilqqiyanne Isiya asati issoti issoti denddidi, Isxxifaanoosaara palamettidosona.
10 Gidoppe attin, I hayyuwaninne geeshsha ayyaanan haasayiyobaa eti zaarana danddayibookkona.
11 Hegaa gishshawu, “I Muusanne Xoossaa toochchishin siyida” gaana mala, asi erennan amarida asata ammanttidosona.
12 Qassi asaa, cimatanne higgiya tamaarissiyageeta denttettidi, I akeekennan yiidi oyqqidosona, yaatidi, A Sanhediriniya* efiidosona.
13 Qassi eti hagaadan giya worddo markkata ehiidosona: “Ha bitanee ha bonchcho sohuwanne Higgiya toochchiyogaa aggennan ixxiis.
14 Leemisuwawu, I Naazireete Yesuusi ha sohuwa laalanaagaanne Muusee nuuyyo immido wogaa laammanaagaakka yootishin siyida.”
15 Qassi Sanhediriniyan* uttidaageeti ubbay A tishshi oottidi xeelliyo wode, A somꞌꞌoy kiitanchchaa somꞌꞌuwa milatiyogaa beꞌidosona.
