Kiitettidaageetu Oosuwa 7:1-60
7 Shin gita kahinee A, “Ha ubbabay tumee?” yaagiis.
2 Isxxifaanoosi hagaadan giis: “Asawu, ta ishatoonne ta aawatoo, siyite. Nu mayzza aaway Abrahaami Kaaraanen deꞌanawu baanaappe kase, I Masphphexoomiyan deꞌishin, gita Xoossay akko yiidi,*
3 hagaadan giis: ‘Ne biittaanne ne dabbota aggada taani neeyyo bessana biitti ba.’
4 Yaatin, I Kaladawetu biittaappe kiyidi, Kaaraanen deꞌiyogaa doommiis. Qassi A aaway hayqqi simmin, Xoossay A yaappe kessidi intte haꞌꞌi deꞌiyo ha biittan wottiis.
5 Shin Xoossay ayyo he sohuwan ayba laatanne, haray atto takkaaro* gadenne immibeenna; shin I he wode naꞌa yelibeennaba gidikkokka, Xoossay ayyonne A zerettaayyo he biittaa aqo oottidi immanawu qaalaa geliis.
6 Qassikka, A zerettay banttabaa gidenna biittan hara biitta asadan deꞌanaagaa, qassi 400 layttawu he biittaa asay eta aylle ootti haaranaagaanne naaqqanaagaa* Xoossay ayyo yootiis.
7 Xoossay hagaadan giis: ‘Eta aylle oottana deriya bolli taani pirddana. Qassi he ubbabaappe guyyiyan, eti he biittaappe kiyidi ha sohuwan taayyo goynnana.’
8 “Xoossay aara maacettidi qaxxaraa hegawu maatafa oottin, I Yisaaqa yelidi hosppuntta gallassi A qaxxariis, qassi Yisaaqi Yaaqooba yeliis,* Yaaqoobi qassi nu mayzza aawata 12ta yeliis.
9 Qassi nu mayzza aawati Yooseefa qanaatidi Gibxxetuyyo bayzzidosona. Gidikkonne, Xoossay aara deꞌiisinne
10 A gakkida waaye ubbaappe ashshidi, Gibxxe kawoy Paarooni A dosanaadaaninne I hayyuwa eranaadan maaddiis. Qassi Yooseefi Gibxxe biittaanne A keettaa ubbaa haaranaadan kawoy sunttiis.
11 Shin Gibxxeeninne Kanaanen ubbasan koshay, ee, gita waayee denddin, nu mayzza aawati miyobaa demmana danddayibookkona.
12 Shin Yaaqoobi Gibxxen kattay deꞌiyogaa siyidi, nu mayzza aawata yaa kiittiis.
13 Eti naaꞌꞌanttuwa yaa biido wode, Yooseefi I oonakko ba ishatussi yootiis, qassi Paarooni Yooseefantta soo asaabaa siyiis.
14 Yaatin, Yooseefi ba aaway Yaaqoobinne ba dabboti ubbay, muleera 75 asay* Kanaaneppe Gibxxe yaanaadan kiittiis.
15 Hegaa gishshawu, Yaaqoobi duge Gibxxe wodhdhiis, qassi I yan hayqqiis, nu mayzza aawatikka yan hayqqidosona.
16 Eta meqettati Sekeema biitti efin, Abrahaami Sekeeman Hamoora naatuppe shammido duufuwan moogettidosona.
17 “Xoossay Abrahaamayyo gelido qaalaa poliyo wodee mati mati biyo wode, nu asay Gibxxen keehippe corattiis.
18 He wode, Yooseefa erenna hara kawoy Gibxxen denddiis.
19 He kawoy nu mayzza aawatu bolli iitabaa maqqiisinne eti bantta guutta naati hayqqana mala eta yeggi bayanaadan giddidi gamiis.
20 He wode, keehi loꞌꞌiya* Muusee yelettiis. Heezzu agina gidiyagaa A aawaa son A dichchidosona.
21 Shin A yeggi bayido wode, Paaroona naꞌiya efaada ba naꞌadan dichchaasu.
22 Hegaa gishshawu, Muusee Gibxxe hayyuwa ubbaa tamaariis. I haasayidobaaninne oottidoban wolqqaama asa gidiyogee qoncciis.
23 “Ayyo layttay 40 gidido wode, I ba ishata Israaꞌeela naata beꞌanawu* qoppiis.
24 I etappe issuwa asi qohiyogaa beꞌidi, ba ishawu exatidi Gibxxe bitaniya woridi haluwa kessiis.
25 I Xoossay A ishata A baggaara ashshiyogaa eti akeekana giidi qoppiis, shin eti hegaa akeekibookkona.
26 Wonttetta gallassi etappe naaꞌꞌati warettiiddi A beꞌidosona; yaatin I, ‘Asatoo, intte ishantta. Ayssi issoy issuwara waretteetii?’ yaagidi eta sigettanawu maliis.
27 Shin ba laggiya naaqqiya bitanee Muusa sugidi hagaadan giis: ‘Nena kaalettiyagaanne daanna oottidi nuussi ooni sunttidee?
28 Zine Gibxxe bitaniya woridoogaadan tanakka woranawu koyayiyye?’
29 Muusee hegaa siyidi, Gibxxeppe betidi Midiyama biittan deꞌiis; I yan naaꞌꞌu attuma naata yeliis.
30 “I 40 layttappe guyyiyan, Siina Deriya matan bazzuwan eexxiya daraa lacuwa giddon issi kiitanchchaa beꞌiis.
31 Muusee hegaa beꞌidi malaalettiis. Shin I hegaa xomoosanawu shiiqiyo wode, Yihooway hagaadan giishin siyiis:
32 ‘Taani ne mayzza aawatu Xoossaa, Abrahaama Xoossaa, Yisaaqa Xoossaa, qassi Yaaqooba Xoossaa.’ Muusee kokkoriyogaa doommiis, qassi hegaa gujji xomoosanawu xalibeenna.
33 Yihooway ayyo hagaadan giis: ‘Neeni eqqido biittay geeshsha gidiyo gishshawu, ne caammaa tohuwappe kessa.
34 Taani Gibxxen deꞌiya ta asay naaqettiyo naaquwa beꞌaas, qassi eti ooliyogaa siyada eta ashshanawu duge wodhdhaas. Haꞌꞌi simi, taani nena Gibxxe kiittana.’
35 Ha Muusa eti, ‘Nena kaalettiyagaanne daanna oottidi nuussi ooni sunttidee?’ yaagidi phenqqeshidosona. Xoossay A haariyagaanne ashshiyagaa oottidi, daran I beꞌido kiitanchchaa baggaara kiittiis.
36 He bitanee eta Gibxxeppe kaalettidi kessiis; I Gibxxen, Zoꞌo Abbaaninne bazzuwan 40 layttawu malaaliyabatanne malaatata oottiis.
37 “Israaꞌeela naatuyyo, ‘Xoossay I erissidobaa taagaadan yootiya ura intte ishatu giddoppe denttana’ yaagiday ha Muusa.
38 Siina Deriyan A haasayissida kiitanchchaaranne nu mayzza aawatuura beni bazzuwan galchchaa giddon deꞌiyagee A. Qassi I nuussi immanawu merinawu deꞌiya geeshsha awaajjuwa ekkiis.
39 Nu mayzza aawati ayyo azazettennan ixxidosona, shin A phenqqeshidi, bantta wozanan Gibxxe simmidi,
40 Aaroonayyo hagaadan giidosona: ‘Nuna kaalettana mala nuussi eeqa xoossata medhdha. Ayssi giikko, nuna Gibxxeppe kaaletti kessida ha Muusee waanidaakko erokko.’
41 Hegaa gishshawu, he wode eti miizzaa maraa misiliya medhdhidi, he eeqawu yarshshidosonanne eti oottidoban ufayttanawu gibiraa kessidosona.
42 Hegaa gishshawu, Xoossay eta yeggi bayidi, eti saluwa meretatuyyo goynnana mala aatti immiis. Hegee Xoossay erissidobaa yootiyageetu maxaafan hagaadan xaafettidoogaadan haniis: ‘Israaꞌeela asatoo, intte 40 layttawu bazzuwan shukkidoynne yarshshidoy taasseeyye?
43 Shin Molooka dunkkaaniyanne Refaana giyo xoossaa xoolinttiya, intte goynnanawu medhdhido misileta tookkideta. Hegaa gishshawu, taani inttena Baabilooneppe haassada yeddana.’
44 “Xoossay Muuseera haasayiyo wode I beꞌidoogaa milatissidi oottana mala azazidoogaadan, bazzuwan beni nu mayzza aawatuyyo markkatettaa dunkkaanee deꞌees.
45 Guyyeppe nu mayzza aawatu naati he dunkkaaniya ekkidi, hara dere asatu biittaa Yaasuura geliyo wode yaa efiidosona. He dunkkaanee Daawita wodee gakkanaashin yan deꞌiis.
46 Xoossay Daawitan ufayttiis, qassi I Yaaqooba Xoossay bawu deꞌiyo keettaa keexxiyo maataa ayyo immanaadan oychchiis.
47 Shin ayyo keettaa keexxiday Solomona.
48 Gidoppe attin, Xoossay erissidobaa yootiyagee giidoogaadan, Ubbaappe Xoqqa Xoossay asa kushiyan keexettida keettan deꞌenna; I hagaadan giis:
49 ‘Yihooway hagaadan gees: Saloy ta araata, qassi saꞌay ta tohoy yedhdhiyosa. Intte taayyo ay mala keetta keexxuuteetii? Woykko taani deꞌiyo sohuwa awan keexxuuteetii?
50 Ha ubbabay taani ta kushiyan oottidoba gidennee?’
51 “Wozanaynne hayttay jallido* kebeela asatoo, intte awudekka geeshsha ayyaanaara eqetteeta; intte intte mayzza aawati oottidoogaadan ootteeta.
52 Xoossay erissidobaa yootiyageetuppe intte mayzza aawati naaqqibeennay oonee? Ee, eti xilloy yaanaagaa kasetidi yootidaageeta woridosona; intte A morkketuyyo mata wode aatti immidoogeenne woridoogee A;
53 Xoossay kiitanchchatu baggaara intteyyo Higgiya immiis, shin intte hegaa naagibeekketa.”
54 Eti hegaa siyidi, hanqquwa suullidosona,* qassi A xeelliiddi bantta achchaa garccidosona.
55 Shin I banan geeshsha ayyaanay eellin, saluwa tishshi ootti xeellidi, Xoossaa bonchchuwanne Yesuusi Xoossaappe ushachcha baggan eqqidaagaa beꞌiis;
56 qassi I, “Beꞌite! Taani saloy dooyettidoogaanne asa Naꞌay Xoossaappe ushachcha baggan eqqidoogaa beꞌays” yaagiis.
57 Yaagin, eti bantta qaalaa xoqqu oottidi waassiiddi bantta hayttaa kushiyan tuccidi, ubbay dirbbiiddi akko biidosona.
58 Eti A katamaappe gaxi kessidi, shuchchan caddiyogaa doommidosona. Maltte markkati bollaara maayido bantta maayuwa Saaꞌoola giyo yelagaa sinttan wottidosona.
59 Eti Isxxifaanoosa shuchchan caddiyo wode I, “Godawu, Yesuusaa, ta ayyaanaa ekka” yaagidi woossiis.
60 Hegaappe simmin, I gulbbatidi ba qaalaa keehi xoqqu oottidi, “Yihoowa, ha nagaraa etan qoodoppa” yaagiis. I yaagi simmidi hayqqiis.*
Footnotes
^ Mise, “ayyo beettidi.”
^ Mise, “issi toho.”
^ Woykko “gamanaagaa.”
^ Woykko geella, “hegaadan oottiis.”
^ Woykko “shemppoti.”
^ Woykko “Xoossaa xeelan loꞌꞌiya.”
^ Woykko “xomoosanawu.”
^ Mise, “Wozanaynne hayttay qaxxarettibeenna.”
^ Woykko “peegamettidosona.”
^ Mise, “xiskkiis.”
