Kiitettidaageetu Oosuwa 8:1-40
8 Isxxifaanoosa woridoogee Saaꞌoola ufayssiis.
He gallassappe doommidi, Yerusalaamen deꞌiya galchchay keehi naaqettiis; kiitettidaageetuppe harati ubbati Yihudaanne Samaariya moottatun ubbasan laalettidosona.
2 Shin geeshsha asati Isxxifaanoosa efiidi moogidosona, yaatidi ayyo keehi yeekkidosona.
3 Gidoppe attin, Saaꞌooli galchchaa daafiyogaa doommiis. I keettan keettan woraajjidi, attuma asaakka macca asaakka goochchi kessidi qasho keettan yeggees.
4 Shin laalettidaageeti biidosan ubban mishiraachchuwa qaalaa asawu yootidosona.
5 He wode, Piliphphoosi Samaariya katamaa* wodhdhidi asaayyo Kiristtoosabaa yootiis.
6 Cora asay Piliphphoosi yootiyobaa siyiiddinne I oottiyo malaatata beꞌiiddi, I odiyobaa akeekan ezggees.
7 Darota tuna ayyaanati oyqqidosona, qassi hegeeti bantta qaalaa xoqqu oottidi waassiiddi kiyoosona. Hegaa bollikka, qaaxxana danddayennaageetinne wobbeti daroti paxidosona.
8 Hegaa gishshawu, he katamaa asay keehi ufayttiis.
9 Hegaappe kase daydanttatu wolqqan oottidoban Samaariya asaa malaalissidanne bana gita asa yaagiya Simoona giyo bitanee he wode he kataman deꞌees.
10 Guuttaappe gitaa gakkanaashin, eti ubbay I yootiyobaa siyoosonanne, “Ha bitanee Gitaa giyo, Xoossaa Wolqqaa” yaagoosona.
11 I daydanttatu wolqqan oottiyoban eta daro wodiyawu malaalissido gishshawu, eti A kaalloosona.
12 Shin Piliphphoosi etawu Xoossaa Kawotettaanne Yesuus Kiristtoosa sunttaa mishiraachchuwa yootin, I odidobaa ammanidosona; qassi attuma asaykka macca asaykka haattan muukettiis.
13 Simoonikka ammaniis, yaatidi haattan muuketti simmidi Piliphphoosaara zuppetiis; I Piliphphoosi oottiyo malaatatanne keehi wolqqaama oosota beꞌidi malaalettiis.
14 Yerusalaamen deꞌiya kiitettidaageeti Samaariya katamaa asay Xoossaa qaalaa ekkidoogaa siyidi, Pheexiroosanne Yohaannisa yaa kiittidosona;
15 qassi he asati yaa wodhdhidi Xoossay etayyo geeshsha ayyaanaa immana mala woossidosona.
16 Ayssi giikko, eti Godaa Yesuusa sunttan haattan muukettidosonappe attin, etappe issuwa bollinne biron geeshsha ayyaanay wodhdhibeenna.
17 Hegaa gishshawu, Pheexiroosinne Yohaannisi bantta kushiya eta bolli wottin, eti geeshsha ayyaanaa ekkiyogaa doommidosona.
18 Simooni kiitettidaageeti bantta kushiya wottin geeshsha ayyaanay imettiyogaa beꞌidi, etayyo miishshaa immana giis;
19 I hagaadan giis: “Taani ta kushiya A bolli wottiyo ooyyonne geeshsha ayyaanay imettana mala, taayyokka ha maataa immite.”
20 Shin Pheexiroosi ayyo hagaadan giis: “Neeni Xoossay coo immiyobaa miishshan demmana gaada qoppido gishshawu, ne biray nena ekkidi xayo.
21 Ne wozanay Xoossaa sinttan suure gidenna gishshawu, nena hagan gattiyabi aybinne baawa.
22 Hegaa gishshawu, ne nagaraappe zilꞌꞌettada laametta, ooni erii, Yihooway neeyyo atto gaana mala, wozanappe woossa, qassi iitabaa qoppiyogaa agga;
23 Ayssi giikko, neeni cammiya marzzenne* xillo gidennabaa aylle gidiyogaa taani akeekaas.”
24 Simooni etayyo hagaadan giis: “Intte giidobaappe aybinne tana gakkenna mala, taayyo Yihoowa wozanappe woossite.”
25 Hegaa gishshawu, eti poli markkattidi, qassi Yihoowa qaalaa yootidi, Yerusalaame simmiiddi Samaaretu katamatun darotun mishiraachchuwa yootiiddi biidosona.
26 Gidoppe attin, Yihoowa kiitanchchay Piliphphoosawu hagaadan giis: “Denddada, Yerusalaameppe tohossa baggi, Gaaza efiya ogiya oyqqada ba.” (Hegee bazzuwa oge.)
27 Yaatin I denddi biidi, Toophphiya kawee Hinddakiyyo haggaaziya, gita maatay deꞌiyonne I aquwan ubban aawatiya, Toophphiya biittaa sunttaa* beꞌiis. He bitanee goynnanawu Yerusalaame biis;
28 I yaappe simmiiddi ba para gaariyan uttidi, ba qaalaa xoqqu oottidi Xoossay erissidobaa yootiya Isiyasa maxaafaa nabbabees.
29 Yaatin ayyaanay Piliphphoosa, “Baada he gaariyakko shiiqa” yaagiis.
30 Piliphphoosi miyyiyara woxxiiddi bitanee Xoossay erissidobaa yootiya Isiyasa maxaafaa nabbabiyogaa siyidi A, “Neeni nabbabiyobaa ubbaa akeekay?”* yaagiis.
31 I, “Issi uri taayyo qonccissana xayikko waanada akeekana danddayiyanaa?” yaagiis. Hegaa gishshawu, Piliphphoosi gaariya bolli kiyidi aara uttanaadan woossiis.
32 I Geeshsha Maxaafaappe nabbabiyo qofay hagaadan gees: “Dorssadan A shuhawu efiidosona, qassi ikisiya meediyo dorssadan I sirphphi giis.
33 Eti A kawushshido wode gamidosona. A kochchaa wurssi yootanay oonee? Ayssi giikko, A deꞌoy saꞌaappe timꞌꞌi gaana.”
34 Hegaappe simmin, he bitanee Piliphphoosayyo hagaadan giis: “Ane hayyanaa tawu yoota, Xoossay erissidobaa yootiyagee hagan obaa odii? Babaa yootiiyye hara asabaa yootii?”
35 Piliphphoosi haasayiyogaa doommiis; I ha qofan* doommidi Yesuusabaa mishiraachchuwa ayyo yootiis.
36 Eti ogiyara biiddi haattay deꞌiyosaa gakkidosona; yaatin he bitanee, “Haattay hageeho! Taani muukettennaadan diggiyabi deꞌii?” yaagiis.
37 ——
38 Yaagidi para gaariya essanaadan azaziis; yaatin Piliphphoosinne bitanee duge wodhdhidi haattaa giddo gelin, Piliphphoosi A haattan muukkiis.
39 Eti haattaappe gaxi kiyin, Yihoowa ayyaanay Piliphphoosa hegaappe eesuwan kaalettidi efiis; yaatin bitanee hegaappe simmin A beꞌibeenna, shin I ufayttiiddi biis.
40 Gidoppe attin, Piliphphoosi Ashddooda biis, qassi katamatun ubban mishiraachchuwa yootiiddi Qiisaariya gakkanaashin biis.
Footnotes
^ Woykko geella, “Samaariya katama issuwa.”
^ Mise, “cammiya ciyyenne.”
^ Mise, “mureessaa.”
^ Woykko “eray.”
^ Mise, “Geeshsha Maxaafaa qofan.”
