Kiitettidaageetu Oosuwa 9:1-43
9 Shin Saaꞌooli Godaa kaalliyageetu bolli kaseegaadankka hanqquwa suulliisinne eta woranawu yashissiis, yaatidi gita kahiniyakko biidi,
2 attuma gidin macca gidin, Xoossaa ogiya kaalliya, I demmiyo oonanne qachchidi Yerusalaame ehaana mala, Damasqqon deꞌiya shiiqo keettatuyyo bessiyo azazuwa immanaadan A oychchiis.
3 I biiddi Damasqqo matishin, akeekennan saluwappe pooꞌoy A matan pozhzhattiis;
4 yaatin I saꞌan kunddidi, “Saaꞌoolaa, Saaꞌoolaa, tana ayssi naaqqay?” yaagiyogaa siyiis.
5 I, “Godawu, neeni oonee?” yaagidi oychchiis. I hagaadan giis: “Taani neeni naaqqiyo Yesuusa.
6 Shin denddada katamaa gela, yaatin neeni ay oottana bessiyakko issi asi neeyyo yootana.”
7 He wode aara biya asati cenggurssaa siyikkonne, oonanne beꞌenna gishshawu, malaalettidi aybanne haasayana danddayibookkona.
8 Hegaappe simmin, Saaꞌooli saꞌaappe denddiis, qassi A ayfee pogetti uttikkonne, aybanne beꞌenna. Hegaa gishshawu, eti A kushiya oyqqi kaalettidi Damasqqo efiidosona.
9 I heezzu gallassawu aybanne beꞌibeenna, qassi aynne mibeenna woy uyibeenna.
10 Damasqqon Yesuusa kaalliya Hanaaniya giyo asi deꞌees, qassi Goday ajjuutan A, “Hanaaniya!” yaagidi xeegiis. I, “Hekko, Godawu” yaagiis.
11 Goday ayyo hagaadan giis: “Denddada Sittaa giyo ogiya ba, yaatada Saaꞌoola giyo Xarsseese bitaniya Yihudaa son koya. Haꞌꞌi I woossiiddi deꞌees.
12 Qassi Hanaaniya giyo bitanee soo gelidi, I zaaretti xeellana mala ba kushiya A bolli wottiyogaa Saaꞌooli ajjuutan beꞌiis.”
13 Shin Hanaanee hagaadan giis: “Godawu, ha bitanee Yerusalaamen deꞌiya ne geeshshata qohido ubbabaa taani darotuppe siyaas.
14 Qassi I ne sunttaa xeegiyageeta ubbaa qachchana* mala waanna kahineti maataa immin hagaa yiis.”
15 Shin Goday ayyo hagaadan giis: “Ba! ayssi giikko, ha bitanee hara biittaa asawu, kawotuyyonne Israaꞌeela naatuyyo ta sunttaa gattana mala taani doorido miishsha.
16 I ta sunttaa gishshawu aappunban waayettana bessiyakko taani ayyo geeshshada qonccissana.”
17 Hegaa gishshawu, Hanaanee biidi he keettaa geliis, qassi I ba kushiya A bolli wottidi hagaadan giis: “Ta ishawu, Saaꞌoolaa, neeni yaydda ogiyan beꞌido Goday Yesuusi, neeni zaarettada xeellana malanne geeshsha ayyaanay nenan eellana mala tana kiittiis.”
18 Yaatin sohuwara A ayfiyappe issibay wodhdhin I zaarettidi xeelliis, hegaappe simmin denddidi haattan muukettiis,
19 qassi guutta qumaa miidi gazddiis.
I Damasqqon deꞌiya Yesuusa kaalliyageetuura amarida gallassaa takkiis,
20 qassi I sohuwara, Yesuusi Xoossaa Naꞌaa gidiyogaa shiiqo keettatun tamaarissiyogaa doommiis.
21 Shin I yootiyobaa siyiya ubbati malaalettidi hagaadan giidosona: “Hagee Yerusalaamen ha sunttaa xeegiyageeta daafida bitaniya gidennee? Qassi I hagaa yiidoy eta qachchidi waanna kahinetukko efaanaassa gidennee?”
22 Shin Saaꞌooli haggaazan tishshi tishshidi biis, qassi I ammanttiyabaa yootidi Yesuusi Kiristtoosa gidiyogaa qonccissin, Damasqqon deꞌiya Ayhudatuyyo xiphphi giis.
23 Daro gallassappe guyyiyan, Ayhudati A woranawu issippe maqettidosona.
24 Shin Saaꞌooli eti A bolli maqettidoogaa eriis. Qassi eti A woranawu gallassinne qammi katamaa penggeta matasaappe wochchoosona.
25 Hegaa gishshawu, A kaalliyageeti qammi A efiidi, keeshiyan utissidi katamaa dirssaa xooꞌiyara duge wottidosona.
26 I Yerusalaame gakkidi Yesuusa kaalliyageetuura zuppetanawu maliis, shin eti ubbay I Yesuusa kaalliyagaa gididoogaa ammanibeenna gishshawu ayyo yayyidosona.
27 Yaatin Barnnaabaasi Saaꞌoola maaddiisinne kiitettidaageetukko A efiis, hegaa bollikka, Saaꞌooli ogiyan Godaa waati beꞌidaakko, qassi Goday A haasayissidoogaanne Saaꞌooli Damasqqon Yesuusa sunttan waati xalidi yootidaakkokka I etayyo odiis.
28 Yaatin Saaꞌooli etaara takkiis, qassi Yerusalaamen eti biyosaa ubbasaa biiddi Godaa sunttan xalidi yootiis.
29 I Giriikettuwa haasayiya Ayhudatuura darotoo haasayiisinne palamettiis, shin eti A woranawu malidosona.
30 Ishati hegaa erido wode, A Qiisaariya duge efiidi Xarsseese moyssidosona.
31 Hegaappe guyyiyan, Yihudan, Galiilaaninne Samaariyan ubbasan deꞌiya galchchay eqettiyabi baynnan saro deꞌiisinne ammanuwan minniis; qassi Yihoowayyo yayyidinne geeshsha ayyaanay minttettiyogaadan deꞌiyo gishshawu dicci dicci biis.
32 Pheexiroosi ubbasaa biiddi Lidan deꞌiya geeshshatukkokka wodhdhiis.
33 Qaaxxana danddayenna gishshawu hosppun layttawu hiittaappe denddibeenna, Eeniya giyo bitaniya I yan beꞌiis.
34 Pheexiroosi A, “Eeniya, Yesuus Kiristtoosi nena pattiiddi deꞌees. Denddada ne hiixaa maaraya” yaagiis. Yaagin I sohuwara denddi eqqiis.
35 Lidaninne Saaroona dembban deꞌiya asay ubbay A beꞌido wode Godaa ammaniis.
36 Giriikettuwan, “Dorqqo” geetettiya, Yesuusa kaalliya Xaabito* giyora he wode Yoophphen deꞌawusu. A loꞌꞌobaa darobaa oottaasunne hiyyeesatuyyo daro imotaa immaasu.
37 Shin he wode A harggada hayqqaasu. Yaatin eti O meeccidi keettawu bollaara deꞌiya kifiliyan wottidosona.
38 Lidi Yoophpheyyo mata gidiyo gishshawu, Yesuusa kaalliyageeti Pheexiroosi Yoophphen deꞌiyogaa siyidi A, “Hayyanaa nuukko eesuwan haa ya” yaagidi woossana mala, naaꞌꞌu asata akko kiittidosona.
39 Yaatin Pheexiroosi denddidi etaara biis. Qassi I yaa gakkido wode, eti keettawu bollaara deꞌiya kifiliya A efiidosona, qassi amꞌꞌeti ubbay yeekkiiddi akko yiidi, Dorqqa etaara deꞌiyo wode sikkido daro afalatanne hara maayota bessidosona.
40 He wode Pheexiroosi asaa ubbaa kare kessidi, gulbbatidi Xoossaa woossiis. Yaatidi anhaakko simmidi, “Xaabitee, dendda!” yaagiis. A ba ayfiya pogada Pheexiroosa beꞌada xoqqu gaada uttaasu.
41 Pheexiroosi I kushiya oyqqidi A denddana mala maaddiis, yaatidi geeshshatanne amꞌꞌeta xeegidi, A paxa deꞌiyogaa bessiis.
42 Yoophphen ubbasan deꞌiya asay hegaa eriis, qassi daro asay Godaa ammaniis.
43 Pheexiroosi Yoophphen galbbaa qaaciya Simoona giyogaa son daro gallassaa takkiis.
