Qolasiyasa Asaassi 1:1-29
1 Xoossaa shenen Kiristtoos Yesuusi kiittido Phawuloosinne nu ishay Ximootiyosi,
2 Kiristtoosa kaalliya, Qolasiyasan deꞌiya geeshshatuyyonne ammanettida ishatuyyo hagaa kiittoos:
Xoossaa nu Aawaa laggetiyabi baynna kehatettaynne sarotettay intteyyo gido.
3 Nuuni intteyyo woossiyo wode awudekka, nu Godaa Yesuus Kiristtoosa Aawaa, Xoossaa galatoos;
4 ayssi giikko, intte Kiristtoos Yesuusa ammaniyo ammanuwabaanne geeshshata ubbaa siiqiyo siiquwabaa nuuni siyida;
5 hegee Xoossay intteyyo saluwan giigissi wottido woytuwa intte naagiyo gishshataassa. Mishiraachchuwa tumay intteyyo odettido wode, he woytuwabaa kase siyideta.
6 Inttekko gakkida ha mishiraachchoy ayfiiddinne kumetta saꞌan dicciiddi deꞌees; laggetiyabi baynna Xoossaa kehatettay tumuppe aybakko intte siyidonne geeshshidi erido gallassaappe doommidi, hegaadan intte giddonkka ayfiiddinne dicciiddi deꞌees.
7 Nu gishshawu Kiristtoosayyo ammanettidi haggaaziya nu mala aylliya, nuuni siiqiyo Eppaafirappe intte eridobaykka hegaa.
8 Ayyaanay maaddido* intte siiquwabaakka I nuussi yootiis.
9 Nuuni hegaa siyido gallassappe doommidi intteyyo woossiyogaa mule aggibeennaykka hegaassa, qassi Xoossay koyiyobaa geeshshidi eriyo eray inttenan eellanaadan, hegaadankka, hayyo ubbaynne ayyaanay maaddiyo akeekay intteyyo deꞌanaadan woossoos;
10 intte loꞌꞌo ooso ubban ayfiiddinne Xoossaa geeshshi geeshshi eriiddi, Yihoowa wurssi ufayssanawu ayyo goynniya asadan hemettanaadan woossoos;
11 intte ubbaban danddayiiddinne ufayttiiddi genccana mala, Xoossay ba gita minotettaadan wolqqa ubban inttena minttanaadankka woossoos;
12 pooꞌuwan deꞌiya geeshshatu laataa intte ekkana bessiya asa gidanaadan inttena maaddida Aawaa intte galatana malakka intteyyo woossoos.
13 I nuna xumaa wolqqaappe ashshiisinne ba siiqo Naꞌaa kawotettawu kaalettiis;
14 nuuni A baggaara wozettidi laꞌa kiyida, hegeekka, nu nagaray atto geetettiis.
15 I beettenna Xoossaa misile, qassi merettida ubbabaappe bayra;
16 ayssi giikko, beettiyabaykka beettennabaykka, hegeekka, araatata gidin, haariyageeta gidin, kawotettata gidin woy maataawata gidin, saluwaninne saꞌan deꞌiya ubbabaa Xoossay A baggaara medhdhiis. Hara ubbabay A baggaara, qassi ayyo merettiis.
17 Hegaa bollikka, I hara ubbabaappe kasekka deꞌees, qassi hara ubbabay A baggaara merettiis;
18 qassi I ba bollaayyo, galchchaayyo huuphe. I doometta, hayquwappe denddidaageetun bayra; hegaappe denddidaagan, I ubbaban koyroogaa gidiis;
19 ayssi giikko, Xoossay ba eeshshay ubbay an deꞌanaadan koyiis,
20 qassi Xoossay saꞌan deꞌiyageeta gidin, saluwan deꞌiyageeta gidin, ubbabay A baggaara, hegeekka, mittaa bolli gukkida A suuttan zaarettidi banaara sigettanaadan oottanawu koyiis.
21 Intte iita oosota sheekkidi qoppiyo gishshawu, issi wode Xoossaappe haakkidinne ayyo morkke gididi deꞌideta;
22 intte A sinttan geeshshanne boree baynnaageeta, qassi mootiyobi baynnaageeta gidana mala, I ba Naꞌaa asatetta bollan, A hayquwan, haꞌꞌi intte aara sigettanaadan oottiis;
23 gidoppe attin, intte ammanuwan deꞌananne saluwappe garssan deꞌiya mereta ubbawu odettida, intte siyido mishiraachchuwa hidootaappe wora simmennan, hiixettida shuchchan tokettidi minni eqqana bessees. Taani Phawuloosi he mishiraachchuwawu haggaaziyagaa gidaas.
24 Taani inttessi gaada haꞌꞌi waayettiyo waayiyan ufayttays, qassi taani Kiristtoosadan waayettays; shin he waayiya Kirsttoosa bollawu, hegeekka galchchawu, biron wurssa waayettabeykke gaada qoppays.
25 Xoossay taayyo immido, oosettana bessiya oosuwadan taani inttessi gaada Xoossaa qaalaa wozanappe yootana mala, he galchchawu haggaazanawu sunttettaas;
26 ee, kase aadhdhida wodetuuninne yeletatun erettibeenna, Xoossay gentti wottidobaa yootays. Shin haꞌꞌi Xoossay ba geeshshatuyyo hegaa qonccissiis;
27 Xoossay he geemmi uttida gita duretaa, hegeekka, intte A gita bonchchuwa yeemottidi naagiyo, inttenaara issuwa gidiya Kiristtoosa ha saꞌaa asaa giddon deꞌiya geeshshatuyyo erissidoogee A ufayssees.
28 Nuuni asay ubbay Kiristtoosa eranaadan eta zoriiddinne hayyo ubban tamaarissiiddi A awaajjoos; yaatidi, nuuni asi ubbi Kiristtoosa kaalliya gamma gakkida asa gidanaadan maaddanawunne Xoossaayyo sheedhdhanawu danddayoos.
29 Yaatanawu, I taayyo immiyo wolqqaaninne akatan baaxetaysinne minnada oottays.
Footnotes
^ Mise, “Ayyaanan.”
