Qolasiyasa Asaassi 2:1-23
2 Taani inttessi, Lodooqiyan deꞌiyageetussinne tana mule beꞌi erenna* ubbaassi gaada ayba wolqqaama baaxe baaxetidaakko intte akeekanaadan koyays.
2 Hegee eta wozanay minettanaadaananne eti siiquwan issuwa gidanaadaana, qassi yaatiyogan eti duretana; he duretettay Xoossay gentti wottidobaa, hegeekka, Kiristtoosa geeshshidi eriyogaanne loytti akeekiyogaa.
3 Hayyuwanne eraa buquray ubbay an geemmi uttiis.
4 Ooninne ammanttiya haasayan inttena balettenna mala hegaa yootays.
5 Intte loꞌꞌo maaraanne Kiristtoosa intte ammaniyo ammanuwa minotettaa beꞌanaagee tana ufayssishin, taani asatettan inttenaara deꞌana xayikkonne, ta wozanay inttenaara deꞌees.
6 Hegaa gishshawu, Godaa Kiristtoos Yesuusa intte ammanidoogaadan, aara issippe hemettiyogaa aggoppite;
7 intte tamaaridoogaadan, Kiristtoosa ammaniyo intte ammanoy xaphuwa yeddana, A bolli diccananne minnana bessees, qassi intte ubbatoo galatana koshshees.
8 Ha saꞌaa asaa hayyuwaninne balettiya pattennaban ooninne inttena gitiyan oyqqenna mala naagettite; hegeeti asa wogaadaananne ha saꞌaa asaa qofaadaanappe* attin, Kiristtoosi tamaarissidoogaadaana gidokkona;
9 ayssi giikko, Xoossaa eeshshay muleera an deꞌees.
10 Hegaa gishshawu, kawotettanne maata ubbaa kaalettiya* aani intteyyo koshshiyabi aybinne paccibeenna.
11 Kiristtoosa ammaniyo gishshawu, asa kushen gidennan, asho bollaa diggirggiyogan inttekka qaxxarettideta; Kiristtoosa kaalliyageeti qaxxarettiyoy hegaadaana.
12 Ayssi giikko, intte aagaadan muukettiyogan aara moogettideta, qassi hayquwappe A denttida Xoossay oottiyo wolqqaamabaa intte ammaniyo gishshawu, aagaadan denttin aara issuwa gidideta.
13 Hegaa bollikka, intte intte nagaraa gaasuwan hayqqidaageetanne qaxxarettibeennaageeta gidikkokka, Xoossay intteyyo aara issippe deꞌuwa immiis. I nu nagaraa ubbaa wozanappe atto giis,
14 qassi nu bolli markkattiya, xaafettida Higgiya qucciis. I he Higgiya Kiristtoosi hayqqido mittaa bolli baxxannidi ogiyappe diggiis.
15 Hegaappe* denddidaagan, I kawotettatanne maataawata qaaridi kalloyiis, qassi xooni simmiya wotaaddaratuugaadan kaalettiiddi, eti xoonettidoogaa qoncciyan bessiis.
16 Hegaa gishshawu, ay maanaakkonne ay uyanaakko, woykko baalaa woy aginaa xeeruwa woy sambbataa intte bonchchanaakkonne yootanawu ooyyonne maati baawa.
17 Hegeeti yaanabaa eesho, shin tumu bollay Kiristtoosa.
18 Asa beso xalaalawu ziqqi giyageetinne kiitanchchatussi* goynniyageeti intte woytuwa ekkennaadan oottenna mala naagettite. He asati beꞌidobaa xalaalan “bantta equwa minttoosona.”* Qassi eti pattenna bantta qofan ceeqettoosona,
19 qassi he asati A baggaara kumetta bollay koshshiyabaa ekkiyonne kuriyaninne shayan issippe gaytti uttidi Xoossaa wolqqan dicciyo kaalettiyagaara* issippetettan oottokkona.
20 Ha saꞌaa asaa qofaara gayttidaban intte Kiristtoosaara issippe hayqqidaba gidikko, ayssi ha saꞌaa asa mala gididi deꞌeetii? Ha azazota ayssi azazetteetii?:
21 “Oyqqoppite woy mooppite woy bochchoppite.”
22 Ha azazoti min woy uyin xayiyabatuura gayttidaageeta; hageeti asi tamaarissiyo azazota.
23 Hegeeti hayyottidi yootidoba milatikkonne, hegaa oottiyageeti bantta shenedan goynnoosona; eti asa sinttan ziqqi giyaba milatanawu bantta bollaa qohoosona; shin issi asi ashuwa amuwara gayttidaagan baaxetiyo baaxiyan hegeeti aynne maaddokkona.
Footnotes
^ Mise, “ashuwan ta somꞌꞌuwa beꞌibeenna.”
^ Mise, “doomettaabaadaanappe.”
^ Mise, “huuphe.”
^ Woykko geella, “Appe.”
^ Woykko “kiitanchchatuugaadan.”
^ Eeqiyageetu baqaa (dummatiyo) wogaappe ekettidaba.
^ Mise, “huuphiyara.”
