Qolasiyasa Asaassi 3:1-25
3 Shin Xoossay inttena Kiristtoosaara denttidaba gidikko, Kiristtoosi Xoossaappe ushachcha baggan uttidosan, saluwan deꞌiyabaa koyiyogaa aggoppite.
2 Awudekka saluwan deꞌiyabata qoppiteppe attin, saꞌan deꞌiyabata qoppoppite.
3 Ayssi giikko, intte hayqqideta, qassi Xoossay ba sheniyadan intte deꞌuwa Kiristtoosaara issippe gentti wottiis.
4 Nu deꞌoy, Kiristtoosi, ba wolqqaa bessiyo wode, inttekka A bonchchuwa koxxiyogee qoncci beettana.
5 Hegaa gishshawu, intte pokkiya tuna nagaraa* oottenna mala, tunabaa oottenna mala, macca asa woy attuma asa amuwan xuugettenna mala, iitabaa qoppenna malanne yaaretenna mala, intte bollaa worite; yaaretiyogee eeqiyogaara issi mala.
6 Hegeetu gaasuwan Xoossay ba hanqquwa gussana.
7 Kase deꞌuwan, inttekka hegaadan deꞌideta.*
8 Shin haꞌꞌi hegeeta ubbaa intteppe qaari olite: yiillotoppite, hanqqettoppite, iitabaa oottoppite, cayoppite, qassi pokkiya haasayay intte doonaappe kiyoppo.
9 Issoy issuwawu worddotoppite. Galꞌꞌa eeshshaa* A oosotuura qaari olite,
10 qassi tumaa geeshshi eriyogan bana medhdhidaagaa eeshshaa milatanawu ooraxxi ooraxxi biya ooratta eeshshaa maayite;
11 Giriiketinne Ayhudati, qaxxarettidaageetinne qaxxarettibeennaageeti, aylleenne goqay, hara biittaa asinne Iskaytee,* hegeeti ubbay ooratta eeshshan lagge; he eeshshan Kiristtoosi ubbabaa; qassi I ubban deꞌees.
12 Intte Xoossay doorido A geeshshatanne I siiqiyogeeta gidiyo gishshawu, gomppan mishettidi qarettiyogaa, kehatettaa, ziqqi giyogaa,* ashilaaliyogaanne danddayaa maayite.
13 Intte ooyyonne lanccidobi deꞌiyakkokka, issoy issuwa mooruwa qoodennan, issoy issuwawu coo atto giyogaa aggoppite. Yihooway intteyyo coo atto giidoogaadan, inttekka hegaadan oottana bessees.
14 Shin hegeetu ubbaa bolli, siiqoy asaa tumuppe issuwa oottiyo gishshawu, siiquwa maayite.
15 Hegaa bollikka, intte issi bolla gididi sarotettan deꞌana mala Xoossay xeegido gishshawu, Kiristtoosa sarotettay intte wozanaa haaranaadan oottite. Qassi awudekka galatite.
16 Kiristtoosi tamaarissidobay hayyo ubbaara inttenan eellanaadan oottite. Geeshsha yettaa yexxiiddi, Xoossaa sabbiiddi, goynuwan galatiyo yettaa* yexxiiddinne Yihoowayyo intte wozanan yexxiiddi, issoy issuwa tamaarissiyogaanne minttettiyogaa* aggoppite.
17 Intte ay haasayikkokka woy ay oottikkokka, Godaa Yesuusan Xoossaa Aawaa galatiiddi, ubbabaa Yesuusa sunttan oottite.
18 Machchotoo, hegee Godaa sinttan bessiyaba gidiyo gishshawu, intte azinawu azinawu haarettite.
19 Azinatoo, intte machchiyo machchiyo awudekka siiqite, qassi I bolli keehi hanqqettoppite.*
20 Naatoo, hegee Godaa ufayssiyaba gidiyo gishshawu, inttena yelidaageetussi ubbaban azazettite.
21 Aawatoo, intte naati azzanenna* mala, eta yiilloyoppite.
22 Aylletoo, saꞌan deꞌiya* intte godatuyyo ubbaban azazettite, asa ufayssanawu oottiyobadan,* eti beꞌiyo wode xalaalan gidennan, Yihoowayyo yayyidi wozanappe azazettite.
23 Asassi gidennan Yihoowayyo oottiyogaadan, intte oottiyobaa aybanne kumetta shemppuwan oottite;
24 ayssi giikko, intte Yihoowappe woytodan laataa ekkanaagaa ereeta. Intte Godawu, Kiristtoosayyo aylle gidite.
25 Iitabaa oottiya ooninne ba iita oosuwawu qaxxayettana, qassi Xoossay oonanne zaggenna.
Footnotes
^ Giriikettuwan, porniya.
^ Woykko “Hegaadan deꞌiyo wode, inttekka hegaadan hemettideta.”
^ Mise, “asa.”
^ Eti haniyobaanne eta wogaa gaasuwan asay kariyo asata bessiyaba.
^ Woykko “qofan ziqqiyogaa.”
^ Woykko “goynuwan kehiyabaa.”
^ Woykko “zoriyogaa.”
^ Woykko “iyyo qareta xayoppite.”
^ Woykko “yibbaatenna.”
^ Mise, “ashuwan.”
^ Mise, “asa ufayssiyageetudan ayfe haggaazan.”
