Qolasiyasa Asaassi 4:1-18
4 Godatoo, intteyyokka saluwan Goday deꞌiyogaa eridi, intte aylleta suure ogiyaninne zaggennan ayssite.
2 Woosan genccite, yaatiiddi beegottidi deꞌitenne galatite.
3 Hegaadankka, taani A gaasuwan qashettido, Kiristtoosabaa geemmida yohuwa nuuni awaajjana mala, Xoossay qaalaayyo ogiya dooyanaadan nuuyyokka woossite,
4 qassi taani yootana bessiyagaadan geeshshada yootanaadankka woossite.
5 Ammanennaageetuura deꞌiyo wodiyan hayyottidi keehi koshshiyabaa oottiyogaa aggoppite.*
6 Maxiniya yeggidobadan malꞌꞌiya kehabaa intte ubbatoo haasayite; yaatikko, asa ubbawu waati zaaranaakko intte erana.
7 Taani siiqiyo ishay, ammanettidi haggaaziyanne Godaa ayllee ta malay Tikiqoosi tabaa ubbabaa intteyyo yootana.
8 Intte nu hanotaa eranaadaaninne I inttena minttettanaadan taani A inttekko kiittays.
9 I kase inttenaara deꞌiya, taani siiqiyo ammanettida ishaa Anaasimoosaara inttekko bees; hagan aybi haniiddi deꞌiyakko eti intteyyo ubbabaa yootana.
10 Tanaara qashettida Arisxxirokoosi intteyyo sarotaa kiittees, Barnnaabaasa dabboy Marqqoosikka intteyyo sarotaa kiittees (he Marqqoosi inttekko biikko mokki ekkanaadan nuuni inttena azazidoogaa),
11 Yosxxoosa giyo Yesuusikka intteyyo sarotaa kiittees; hageeti Ayhuda asa.* Xoossaa Kawotettawu tanaara oottiyageeti hageetu xalaala, qassi eti tana keehi minttettidosona.*
12 Kiristtoos Yesuusa ayllee, kase inttenaara deꞌiya Eppaafiri intteyyo sarotaa kiittees. Intte gamma gakkanaadaaninne Xoossay oottanabaa ubbaa mintti ammananaadan, I intteyyo ubbatoo wozanappe woossees.
13 I inttessi, qassi Lodooqiyaninne Hirapoliisan deꞌiyageetuyyo giidi minnidi oottidoogawu taani markka.
14 Nu siiqo ishay, aakimee Luqaasi intteyyo sarotaa kiittees, Deemaasikka intteyyo sarotaa kiittees.
15 Lodooqiyan deꞌiya ishatuyyo, qassi Nimppiyonne I son deꞌiya galchchaayyo ta sarotaa gattite.
16 Ha dabddaabbiya nabbabi simmidi, Lodooqiyan deꞌiya galchchankka nabbabettana mala kiittite, qassi Lodooqiya asawu kiitettida dabddaabbiya inttekka nabbabanawu eta oychchite.
17 Qassi Arkkipoosa, “Goday neeyyo immido haggaazaa polanawu minnada ootta” yaagite.
18 Hagee taani Phawuloosi ta kushiyan xaafido sarotaa. Ta qashuwa hassayite. Laggetiyabi baynna Xoossaa kehatettay intteyyo gido.
Footnotes
^ Mise, “maacido wodiya shammite.”
^ Mise, “qaxxarettidaageeta.”
^ Woykko “tana minttettidosonanne maaddidosona.”
