Roome Asaassi Xaafettidaagaa 1:1-32
1 Taani Phawuloosi, Kiristtoos Yesuusa ayllee hagaa intteyyo xaafays. I tana kiitettidaagaa gidanaadan xeesiisinne Xoossaa mishiraachchuwa yootanaadan sunttiis.
2 Xoossay I erissidobaa yootiyageetu baggaara Geeshsha Maxaafan he mishiraachchuwa kasetidi yootiis.
3 He mishiraachchoy A Naꞌaa, Daawita zerettaabaa yootiyagaa.
4 I geeshsha ayyaanaa wolqqan hayquwappe denddiis. Qassi hegee I Xoossaa Naꞌaa gidiyogaa qonccissiis. I nu Godaa Yesuus Kiristtoosa.
5 Hara biittaa asay ubbay Yesuusa sunttaa bonchchanawu ammananaadaaninne ayyo azazettanaadan, Xoossay A baggaara nuuyyo laggetiyabi baynna kehatettaa kehiisinne kiitettidaageeta gidiyo maataa immiis.
6 Inttekka Yesuus Kiristtoosa kaalliyageeta gidanaadan, he asatu giddoppe xeesettideta.
7 Xoossay siiqidonne geeshsha gidanaadan xeesido, Roomen deꞌiya ubbawu hagaa xaafays:
Laggetiyabi baynna Xoossaa nu Aawaa kehatettaynne sarotettay, qassi Godaa Yesuus Kiristtoosaagee intteyyo gido.
8 Ubbaappe koyruwan, intte ammanuwabaa ubbasan deꞌiya asay haasayiyo gishshawu, intte ammanuwassi Yesuus Kiristtoosa sunttan Xoossaa galatays.
9 Taani Xoossaa Naꞌaabaa mishiraachchuwa yootiyo wode, kumetta wozanaappe Xoossawu oottays. Taani A woossiyo wode ubbatoo inttebaa oychchiyogawu I markka.
10 Xoossaa shene gidikko, haꞌꞌi wurssettan taani inttekko yaana mala A woossays.
11 Ayssi giikko, ammanuwan intte minnanaadan minttettana mala, taani inttena beꞌanawu laamotays;
12 qassi inttenne taani nu ammanuwan issoy issuwa minttettana mala, inttena beꞌanawukka koyays.
13 Ta ishatoo, taani hara biittaa asawu mishiraachchuwa yootiyogan demmidoogaa mala loꞌꞌo ayfiya yankka demmanawu, inttekko baanawu darotoo koyidoogaa intte erana mala koyays. Shin taani beennaadan hanno gakkanawu aybakko diggiis.
14 Taani Giriiketuyyonne hara biittaa asawu,* qassi tamaaridaageetuyyonne tamaaribeennaageetuyyo acota uttaas.
15 Yaatiyo gishshawu, taani Roomen deꞌiya intteyyokka mishiraachchuwa yootanawu keehi koyays.
16 Taani mishiraachchuwan yeellatikke; mishiraachchoy Xoossaa wolqqaa bessiyaba; he mishiraachchoy ammaniya ubbaa, koyruwan Ayhudata, qassi Giriiketakka ashshana danddayees.
17 Ayssi giikko, ammanoy deꞌiyogeeti Xoossay mishiraachchuwa baggaara ba xillotettaa qonccissiyogaa akeekoosona. Qassi, “Xilloy ammanuwa gaasuwan deꞌana” geetetti xaafettidoogaadan, hegee eta ammanuwa minttees.
18 Bantta iita hiillan tumay erettennaadan diggiya asatu iitatettaanne geella ooso ubbaa bolli Xoossaa hanqqoy saluwappe qoncciiddi deꞌees.
19 Xoossay etawu darobaa qonccissido gishshawu, eti A erana bessees.
20 Xoossaa beꞌana danddayennaba gidikkonne, ayyo merinaa wolqqay deꞌiyogeenne I tumukka Xoossaa gidiyogee saꞌay merettoosappe doommidi qoncci beettees; Xoossay medhdhidobaappe asay hegaa akeekana danddayees; hegaappe denddidaagan, etayyo gaasoyiyobi baawa.
21 Hegaa mala asati Xoossaa erikkokka, Xoossadan A bonchchibookkona. Shin eti pattennabaa qoppoosonanne dammida eta wozanaykka aybanne akeekenna.
22 Eti banttana eranchcha goosona, shin eeyyidosona.
23 Eti merinawu deꞌiya* Xoossawu goynniyogaa aggidi, asa milatiya eeqa misiletussi goynnoosona; he eeqa misiletuppe amaridaageeti kafota, oyddu tohoy deꞌiyo meretata, qassi shooshshaanne zariya milatoosona.
24 Hegaa gishshawu, eti bantta wozanan amottidoogaadan bantta bollaa kawushshana mala, Xoossay sheneyiyabawu eta aatti immiis.
25 Eti Xoossaabaa tumaa wordduwan laammidosona, merettidabata bonchchidosonanne etassi goynnidosona. Shin, Medhdhidaagaa xallay merinawu sabettana bessees. Aminꞌꞌi.
26 Iitanne sheneyiya amuwawu Xoossay eta aatti immidoy hegaassa. Macca asati issoy issuwara banttawu bessennabaa hanidosona; gidoppe attin, Xoossay eti hegaadan hananaadan oottidi medhdhibeenna;
27 hegaadankka, attuma asay macca asaara zinꞌꞌiyogaa aggidi, issoy issuwa keehi amottiis. Qassi eti issoy issuwara sheneyiyabaa hanido gishshawu, bantta mooruwawu bessiyagaadan qaxxayettidosona.
28 Eti Xoossaa loytti eranawu koyibeenna gishshawu, bessennabaa oottana mala iitabaa qoppanaadan Xoossay eta aggibayiis.
29 Eta qofan geellabay ubbay, iitatettay, yaaree, loꞌꞌennabaynne qanaatee kumiis; ayssi giikko, eti shemppuwa woroosona, ooyettoosona, cimmoosonanne morkkoosona. Eti zigiriyageeta,
30 toochchiyageeta, Xoossaa ixxiyageeta, cayiyageeta, otorettiyageeta, ceeqettiyageeta, qohiyabaa maqqiyageeta, banttana yelidaageetuyyo azazettennaageeta,
31 akeeki baynnaageeta, qashoy baynnaageeta, asa siiqennaageetanne qarettennaageeta.*
32 Xoossay hegaa malabaa oottiyageetussi hayqoy bessiyogaa yootido geeshsha higgiya ha wodiyankka hegaa mala asati loytti eriyaba gidikkonne, ubbatoo hegeeta oottiyogaa xalla gidennan, hegeeta oottiyageetu hanotankka ufayttoosona.
Footnotes
^ Woykko “Giriike gidenna asawu”; mise, “Barbbaaretussi.”
^ Woykko “hayqqenna.”
^ Woykko “maarennaageeta.”
