Roome Asaassi Xaafettidaagaa 10:1-21
10 Ta ishatoo, eti attanaadan taani wozanappe koyaysinne Xoossaa wozanappe woossays.
2 Ayssi giikko, eti Xoossaa geeshshi erana xayikkokka, A ufayssanawu koyiyogawu taani markka.
3 Ayssi giikko, eti Xoossay koyiyogaadan xillotettaa erokkona; shin banttawu koyiyogaadan xillo gidanawu baaxetido gishshawu, Xoossay xillotetta giyobawu azazettibookkona.
4 Ammaniya ubbay Xoossaa sinttan xillo geetettana mala, Higgee Kiristtoosan kuuyettiis.
5 Ayssi giikko, Higgee bessiyogaadan xillotettay aybakko Muusee, “Hageeta oottiya asi etappe denddidaagan paxa deꞌana” yaagidi xaafiis.
6 Shin issi asi ammanuwan xillo geetettana danddayiyogaakka Geeshsha Maxaafay yootees; hagaadan gees: “Ne wozanan, ‘Saluwa kiyanay oonee?’ hegeekka, Kiristtoosa duge wottanawu kiyanay oonee? gooppa;
7 woykko, ‘Ciimma ollaa duge wodhdhanay oonee?’ hegeekka, Kiristtoosa hayquwappe denttanawu duge wodhdhanay oonee? gooppa.”
8 Shin Geeshsha Maxaafay woygii? “Qaalay ne doonaaninne ne wozanan, neeyyo matan deꞌees”; nuuni yootiyo ammanuwa “qaalay” hegaa.
9 Ayssi giikko, Yesuusi Goda gidiyogaa ne doonan awaajjikko, qassi Xoossay hayquwappe A denttidoogaa ne wozanan ammanikko, neeni attana.
10 Ayssi giikko, issi asi xillo gidanawu ba wozanan ammanana bessees, qassi attanawu he qaalaa ba doonan awaajjana bessees.
11 Ayssi giikko, Geeshsha Maxaafay, “An ammanettiya ooninne yeellatenna” yaagees.
12 Ayhuda asay Giriike asaappe dummatiyobi baawa. Maaddanaadan A xeesiya ubbaayyo darissidi immiya, issi Goday etawu ubbawu deꞌees.
13 Ayssi giikko, “Yihoowa sunttaa xeesiya ubbay attana.”
14 Gidoppe attin, eti A ammanibeennaba gidikko, waatidi A sunttaa xeesanee? Qassi abaa siyibeenna ura eti waatidi ammananee? Qassi abaa yootiya asi baynnan eti waatidi siyanee?
15 Qassi eti kiitettana xayikko waatidi yootanee? “Loꞌꞌobaa mishiraachchuwa yootiyageetu tohoti ayba loꞌꞌiyonaa!” geetettidi xaafettidoogaadaana.
16 Gidoppe attin, mishiraachchuwa ammanidaageeti eta ubbata gidokkona. Ayssi giikko, Isiyasi, “Yihoowaa, nuuni yootidobaa* ooni ammanidee?” yaagiis.
17 Hegaa gishshawu, issi asi qaalaa siyido gishshawu ammanees. Qassi asi Kiristtoosabaa yootido gishshawu issi uri he qaalaa siyees.
18 Shin hagaadan oychchays: Eti qaalaa siyibookkonaa? Akkay, “he qaalay kumetta saꞌan, haray atto keehi haahosankka siyettiis.”
19 Shin hagaadan oychchays: Israaꞌeelati eribookkonaa? Akkay, eroosona. Koyruwan, Muusee hagaadan giis: “Israaꞌeela gidenna asatun intte yiillotanaadan taani oottana; eeyya deriyan intte hanqquwa suullanaadan taani oottana.”
20 Shin Isiyasi keehi xalidi hagaadan giis: “Tana koyibeennaageeti taakko yiidosona; tabaa oychchibeennaageeti tana eranaadan oottaas.”
21 Shin I Israaꞌeelatubaa, “Taani azazettennanne zozza asatuyyo ubba gallassi ta kushiya micca bessaas” yaagiis.
Footnotes
^ Woykko “nuuppe siyidobaa.”
