Roome Asaassi Xaafettidaagaa 13:1-14
13 Ayssiyo maati ooyyonne Xoossay anttennan* deꞌenna gishshawu, asay* ubbay ayssiya asatuyyo haaretto; haꞌꞌi ayssiya asata Xoossay eta dumma dumma sohotun wottiis.
2 Hegaa gishshawu, haariya asatu bolli makkalliya ooninne Xoossay essidobaa eqettees; hegaa eqettidaageeti bantta bolli pirddaa ehaana.
3 Ayssi giikko, ayssiya asati iitabaa oottiyageeta yashshoosonappe attin, loꞌꞌobaa oottiyageeta yashshokkona. Ayssiya asata yayyennan agganawu koyikko, ubbatoo loꞌꞌobaa ootta, yaatikko eti nena nashshana;
4 ayssi giikko, eti neeni goꞌettana mala Xoossaayyo haggaaziyageeta, shin eti gaasoy baynnan bisuwa oyqqenna gishshawu, iitabaa oottikko yayya. Eti iitabaa oottiya ura hanqqetidi* haluwa kessiya, Xoossawu haggaaziya asata.
5 Hanqquwa gishsha xalaalaassa gidennan, intte kahay zoriyo gishshawukka intte etayyo haarettana bessees.
6 Intte qaraxaa qanxxiyoykka hegaassa; ayssi giikko, eti ubbatoo asaayyo haggaaziiddi Xoossaayyo oottoosona.
7 Immana bessiyobaa ubbawu immite; qanxxana bessiyo urawu qaraxaa qanxxite, giiraa giirana bessiyo urawu giirite; yayyana bessiyo urawu yayyite, qassi bonchchana bessiyo ura bonchchite.
8 Issoy issuwa siiqiteppe attin, ooyyonne aybakka edatoppite; ayssi giikko, asa siiqiya ooninne higgiyan koyettiyabaa oottiis.
9 Ayssi giikko, “Neeni wodiraa laammana bessenna, asa worana bessenna, wuuqqana bessenna, asabaa amottana bessenna” yaagiya azazotinne hara azazoti ubbay xaaxi waaxin ha issi azazo: “Ne shooruwa nena siiqiyogaadan siiqana bessees.”
10 Siiqiya asi ba shooruwa bolli iitabaa oottenna; hegaa gishshawu, higgiyan koyettiyabay siiquwa.
11 Qassi intte ha wodiya eriyo gishshawu hageeta oottana koshshees; nuuni ammaniya asa gidido wodiyappe aaruwan Xoossay nuna ashshana wodee matido gishshawu, hagee intte xiskkuwappe denddana koshshiyo saate.
12 Qammay wurana hanees, gallassay matattiis. Hegaa gishshawu, simi xumaa oosuwa oli bayidi, pooꞌuwa ola miishshata gixxoos.
13 Dajjetidi allaxxennan, mattottennan, pokkiya tuna nagaraa oottennan, yeelli baynnabaa hanennan,* kobattennaaninne qanaatennan, asay gallassi haniyogaadan simi maarabaa hanoos.
14 Shin Godaa Yesuus Kiristtoosa maayite, qassi ashoy amottiyobaa waati oottanaakko kasetidi qoppoppite.
Footnotes
^ Woykko “eeno geennan.”
^ Woykko “shemppo.”
^ Woykko “qaxxayidi.”
^ Giriikettuwan, aselgiya.
