Roome Asaassi Xaafettidaagaa 14:1-23
14 Ammanoy minnibeenna asa mokki ekkiteppe attin, haratu qofaa boroppite.
2 A ammanoy minnido asi ubbabaa mees, shin A ammanoy minnibeenna asi gaden mokkiyabaa xallaa mees.
3 Ubbabaa miya asi ubbabaa meenna asa karoppo, qassi ubbabaa meenna asi ubbabaa miya asa boroppo, ayssi giikko Xoossay A mokki ekkiis.
4 Hara ura aylliya boranawu neeni oonee? I eqqanaakkonne kunddanaakko maaciyay A godaa. Yihooway A essana danddayiyo gishshawu, I eqqanaadan maaddana.
5 Issi asi issi gallassaa haraappe aadhdhiyabadan xeellees; haray qassi gallassa ubbay haraappe dummatennabadan xeellees; I oottiyobay likke gidiyogaa asi ubbi ammanettana bessees.
6 Issi gallassay hara gallassaappe aadhdhees giidi qoppiya asi hegaa Yihoowayyo oottees. Qassi ubbabaa miya asi Yihoowayyo giidi mees, qassi Xoossaa galatees; hegaa bollikka, ubbabaa meenna asi Yihoowayyo giidi meenna, qassi ikka Xoossaa galatees.
7 Nu giddoppe ooninne ba bonchcho xallawu deꞌenna, qassi ooninne ba bonchcho xallawu hayqqenna.
8 Nuuni deꞌikko Yihoowa bonchchuwawu deꞌoos, qassi hayqqikko Yihoowa bonchchuwawu hayqqoos. Hegaa gishshawu, nuuni deꞌinkka hayqqinkka Yihoowaba.
9 Ayssi giikko, Kiristtoosi hayqqidaageetussinne paxa deꞌiyageetussi Goda gidanawu hayqqiisinne hayquwappe denddiis.
10 Shin neeni ne ishaa ayssi boray? Woy qassi neeni ne ishaa ayssi karay? Ayssi giikko, nuuni ubbay Xoossay pirddiyosaa sinttan eqqana.
11 Ayssi giikko, hagaadan geetettidi xaafettiis: “Yihooway, ‘Taani deꞌiyogee ammanttiyogaadan gulbbata ubbay taayyo gulbbatanaageenne inxxarssa ubbay taani Xoossaa gidiyogaa ammananaagee tuma’ yaagees.”
12 Simi nuuni ubbay haasayidobawunne oottidobawu Xoossaa sinttan pirddawu eqqana.
13 Hegaa gishshawu, issoy issuwa boriyogaa aggidi, nu ishaa xubbana woy wora zaarana danddayiya aybanne oottenna mala baaxetana koshshees.
14 Taani Godaa Yesuusa kaalliyagaa gidiyo gishshawu, issibinne ba meretan tuna gidennaagaa eraysinne ammanays; issi asi issibay tuna giidi qoppikko hegee ayyo tuna.
15 Neeni miyobaa gaasuwan ne ishaa yiilloyikko, siiquwan oottiyogaa aggadasa. Hegaa gishshawu, Kiristtoosi awu hayqqido ne ishaa ammanuwa neeni miyoban bashshoppa.*
16 Hegaa gishshawu, hegee inttena harati iitaban denttanaadan oottikko, loꞌꞌo gidiyogaa intte ammaniyobaa oottoppite.
17 Ayssi giikko, Xoossaa Kawotettay miyobaaranne uyiyobaara gayttidaba gidenna, shin issi uri geeshsha gidana, haratuura saro deꞌananne geeshsha ayyaanaa wolqqan ufayttana bessees.
18 Kiristtoosawu hegaadan aylledan oottiya oonaaninne Xoossaykka asaykka ufayttees.
19 Hegaa gishshawu, sarotettawunne minotettawu issoy issuwa maaddiyabaa oottanawu keehippe baaxetite.
20 Qumaa gaasuwan Xoossaa oosuwa laaliyogaa* aggite. Ubbabay geeshsha gidiyogee tuma, shin harata xubbanabaa issi asi miyaba gidikko, hegee A qohiyaba.*
21 Ne ishay xubettanaba gidikko, asho meennan woy woyne eessaa uyennan woy hara aybanne oottennan aggiyogee keehi loꞌꞌo.
22 Neeni ammanidobaa Xoossaa sinttan neessi naaga. Oottanawu maacidobaa oottidi ba bolli pirddenna asi ufayttees.
23 Shin I siriiddi miyaba gidikko, ammaniichchennan miido gishshawu pirddettiis. Hegaa gishshawu, ammaniichchennan oottiyobay ubbay nagara.
