Roome Asaassi Xaafettidaagaa 15:1-33
15 Shin minnida nuuni minnibeenna asati banttana deexxiyaban genccanaadan maaddana bessees.
2 Nuuni ubbay nu shooruwa minttanawu A ufayssiya loꞌꞌobaa oottana koshshees.
3 Ayssi giikko, haray atto Kiristtoosikka bana ufayssibeenna, shin, “Asay nena boranawu giyobaa tawukka giis” geetettidi xaafettidoogaadan haniis.
4 Kase xaafettida ubbabay nuna tamaarissanawu xaafettiis, qassi Geeshsha Maxaafati nuna minttiyo gishshawunne genccanaadan maaddiyo gishshawu, nuussi hidootay deꞌees.
5 Nuuni genccanaadan Xoossay maaddeesinne nuna minttettees. Hegaa gishshawu, Kiristtoos Yesuusi qoppidoogaadan qoppana mala, Xoossay inttena maaddanaadan woossays;
6 yaanikko, intte issuwa gididi issi doonan* nu Godaa Yesuus Kiristtoosa Xoossaanne Aawaa sabbana.
7 Hegaa gishshawu, Kiristtoosi inttena mokki ekkidoogaadan inttekka issoy issuwa mokki ekkite; harata mokki ekkiya asi Xoossaa bonchchees.
8 Ayssi giikko, Xoossay eta mayzza aawatuyyo gelido qaalay tuma gidiyogaanne Xoossay tumanchcha gidiyogaa bessanawu, Kiristtoosi qaxxarettida asatuyyo haggaaziyagaa gididoogaa intte eranaadan koyays.
9 Qassi hara biittaa asay A qaretaa* gishshawu Xoossaa bonchchana danddayees. Hegee kasetidi hagaadan xaafettidoogaadan haniis: “Taani hara biittaa asaa giddon nena sabbanay hegaassa, qassi taani ne sunttawu sabaa yettaa yexxana.”
10 Qassi I, “Hara biittaa asawu, A asaara ufayttite” yaagees.
11 Harasan qassi, “Hara biittaa ubbaa asawu, Yihoowa sabbite; qassi asay ubbay A sabbo” yaagees.
12 Qassi Isiyasi hagaadan giis: “Daro deriya haaranawu denddiya uri Isseya zerettaappe* yaana, qassi I loꞌꞌobaa oottana giidi eti yeemottidi naagana.”
13 Hidootaa immiya Xoossay intte an ammanettido gishshawu intte wozanan ufayssaynne sarotettay eellanaadan oottana mala woossays; yaatin geeshsha ayyaanay intte wozanan hidootay eellanaadan maaddana.
14 Ta ishatoo, loꞌꞌobaa oottanawu intte giigi uttidoogaa, era ubbay inttenan eellidoogaanne intte issoy issuwa zoranawu* danddayiyogaa taani haꞌꞌi ammanettays.
15 Gidoppe attin, inttena hassayissanawu issi issibata qonccissada xaafaas; Xoossay taassi laggetiyabi baynna kehatettaa kehido gishshawu, taani inttena hageeta hassayissays;
16 taani Kiristtoos Yesuusa aylle gidada hara biittaa asawu mishiraachchuwa yootanaadan I taayyo laggetiyabi baynna kehatettaa kehiis, he oosoy geeshsha. Hara biittaa asay geeshsha ayyaanan geeyidi Xoossaa ufayssiya yarshsho mala gidanaadan taani ha oosuwa oottays.
17 Hegaappe denddidaagan, taani Kiristtoos Yesuusa kaalliyo gishshawunne Xoossaa oosuwa oottiyo gishshawu ufayttays.
18 Ayssi giikko, taani oottiyobaa aybanne hagaappe guyyiyan yootikke. Gidoppe attin, hara biittaa asay Kiristtoosawu azazettana mala, Kiristtoosi ta baggaara oottidobaa xalaalaa yootana. Qassi taani yootidobaaninne oottidoban, I hegaa oottiis;
19 hegaadankka, malaatatuuninne malaaliyabatun, Xoossaa ayyaanaa wolqqan hegaa oottiis; hegaappe denddidaagan, taani Yerusalaameppe biidi Iliwariqoona gakkanaashin deꞌiya heeran ubbasaa yuuyada, Kiristtoosabaa mishiraachchuwa yootada polaas.
20 Hegaappe denddidaagan, taani hara uri doommido oosuwa oottenna mala, asay Kiristtoosa sunttaa siyido sohuwan mishiraachchuwa yootennaadan baaxetaas;
21 shin hegee kasetidi hagaadan xaafettidoogaadan haniis: “Abay etawu odettibeenna asati beꞌana, qassi abaa siyibeenna asati akeekana.”
22 Taani inttekko baanawu koyikkonne, darotoo danddayabeennay hegaassa.
23 Shin taani ha moottatun ubbasan mishiraachchuwa yootaas, qassi inttekko baanawu daro* layttawu amottaas.
24 Hegaa gishshawu, taani Isppeene baydda inttenaara gayttada yan amarida ufayssiya wodiya aatta simmin, intte tana guutta ogiya moyssanaadan koyays.
25 Shin taani Yerusalaamen deꞌiya geeshshata maaddanawu yaa baana hanays.
26 Ayssi giikko, Maqidooniyaninne Akaayiyan deꞌiya ishati, Yerusalaamen hiyyeesatettan deꞌiya geeshshata maaddanawu banttawu deꞌiyabaappe ufayttiiddi immidosona.
27 Eti hegaa ufayttiiddi oottidoogee tuma, shin yaatiyogaa eti aco qanxxiyobadan qoppidosona. Ayhudati Xoossaappe ekkido loꞌꞌobaa hara biittaa asatussi immidosona, haꞌꞌi qassi hara biittaa asati banttawu deꞌiyabaappe eta maaddana koshshees.
28 Hegaa gishshawu, taani haꞌꞌi ishatinne michchoti immidobaa* etayyo gattanawu Yerusalaame bays. Hegaa pola simmada, Isppeene baydda inttenaara gayttana.
29 Hegaa bollikka, taani inttekko biyo wode, Kiristtoosappe daro anjjuwa inttessi ekkada baanaagaa erays.
30 Simi ta ishatoo, nuuni nu Godaa Yesuus Kiristtoosa ammaniyo gishshawunne geeshsha ayyaanay issoy issuwa siiqanaadan oottido gishshawu, intte taassi Xoossaa wozanappe tanaara woossanaadan inttena minttettays.
31 Taani Yihudan deꞌiya ammanenna asatuppe attanaadaaninne taani efiyo maaduwa Yerusalaamen deꞌiya geeshshati ufayttidi ekkanaadan woossite,
32 qassi Xoossaa shene gidikko, taani inttekko baada ufayttana, yaanin, nuuni issoy issuwa minttettana.
33 Sarotettaa immiya Xoossay inttenaara ubbaara gido. Aminꞌꞌi.
Footnotes
^ Woykko “qaalan.”
^ Woykko “maarotaa.”
^ Mise, “xaphoy.”
^ Woykko “tamaarissanawu.”
^ Woykko geella, “amarida.”
^ Mise, “ayfiya.”
