Roome Asaassi Xaafettidaagaa 16:1-27
16 Kinkkiriyan deꞌiya galchchan haggaaziya nu michchee Peebiira taani inttena eretissays;
2 intte O geeshshatuyyo bessiyagaadan Godaa sunttan mokki ekkite, qassi iyyo koshshiyaban ubban maaddite; ayssi giikko, A tanakka hara daro ishatanne michchotakka keehi maaddaasu.
3 Tanaara Kiristtoos Yesuusa oosuwa oottiya Phirisqqilonne Aqiila saro giite;
4 eti ta gishshawu* bantta shemppuwa* daafissiichchi attidosona, qassi ta xalaala gidennan, hara biittaa asaa galchchay ubbay eta galatees.
5 Qassi eta son shiiqiya galchchaakka saro giite. Isiyan Kiristtoosa kaallida koyro asatuppe issuwa, taani siiqiyo Eppaneetosa saro giite.
6 Intteyyo keehi daafurida Mayraamo saro giite.
7 Taappe kasetidi Kiristtoosa kaallida, tanaara qashettida, ta dabbota Anddironiqoosanne Yuniyasa saro giite, qassi kiitettidaageeti eta nashshoosona.
8 Godaa kaalliya, taani siiqiyo ishaa Amppiliyatoosa saro giite.
9 Kiristtoosa oosuwa nunaara issippe oottiya Urbbaanoosa, qassi taani siiqiyo Isttakuusa saro giite.
10 Kiristtoosi an ufayttiyo Apheliisa saro giite. Arisxxobiloosa so asaa saro giite.
11 Ta dabbuwa Heeroodiyona saro giite. Narssiisasa so asaappe Godaa kaalliyageeta saro giite.
12 Godaa oosuwan daafuriya macca asata, Tirufaynonne Tirufooso saro giite. Nu siiqiyo Perssiiso saro giite, ayssi giikko, A Godaa oosuwan keehi daafuraasu.
13 Goday doorido Rufoosa, qassi taanikka ta aayeedan xeelliyo A aayyiyo saro giite.
14 Asinkkiriitoosa, Pileegoona, Hermmeesa, Patirobaasa, Hermmaasanne etaara deꞌiya ishata saro giite.
15 Pilelegoonanne Yuulo, Neeriyanne A michchiyo, qassi Olumppoosanne etaara deꞌiya geeshshata ubbaa saro giite.
16 Issoy issuwa geeshsha wozanan yeridi sarotite. Kiristtoosa galchchay ubbay inttena saro yaagees.
17 Simi ta ishatoo, intte tamaaridobaa phalqqidi, issuwa issuwappe shaakkiyabaanne xubbiyabaa oottiyageeta loytti wochchanaadan taani inttena zorays; etakko shiiqoppite.
18 Ayssi giikko, hegaa mala asati bantta amuwa* aylleppe attin, nu Godaa Kiristtoosa aylle gidokkona; eti liiqo qaalaaninne heebboyiyo haasayan akeekibeenna asatu wozanaa balettoosona.
19 Intte azazettiyogaa asay ubbay akeekiis, qassi taani intteban ufayttays. Shin intte loꞌꞌobawu hayyo eriyageeta, qassi iitabawu eri baynnaageeta gidanaadan koyays.
20 Sarotettaa immiya Xoossay Seexaanaa intte tohuwappe garssaara mati kinchchana. Nu Godaa Yesuusa laggetiyabi baynna kehatettay inttenaara gido.
21 Tanaara oottiya Ximootiyosi inttena saro yaagees, qassi ta dabboti, Luqiyosi, Yaasooninne Sosiiphaaxiroosikka inttena saro yaagoosona.
22 Phawuloosi yootidoogaadan ha dabddaabbiya xaafida, inttenadan Godaa ammaniya, taani Xarxxiyosi inttena saro yaagays.
23 Tananne galchchaa asaa ubbaa ba son mokkida Gaayosi inttena saro yaagees. Katamaa miishshaa oyqqiya Erasxxoosi inttena saro yaagees, qassi A ishay Quwarxxoosikka inttena saro yaagees.
24 ——
25 Taani yootiyo mishiraachchoynne Yesuus Kiristtoosabay odettiyabay Xoossay inttena minttanaagaa bessees; ha mishiraachchoy Xoossay haꞌꞌi erissido, daro wodiyawu I gentti wottido yohuwa akeekiyogaara gayttidaba;
26 shin geemmida he yohuwabay hara biittaa ubbaa asawu haꞌꞌi qoncciis. Merinawu deꞌiya Xoossay azazidoogaadan I erissidobaa yootiyageeti xaafidobaappe hegee etawu qoncciis. I hara biittaa ubbaa asay A ammananaadaaninne awu azazettanaadan koyees;
27 A xalaalay hayyuwa eriya Xoossay Yesuus Kiristtoosa gaasuwan merinawu sabetto. Aminꞌꞌi.
