Roome Asaassi Xaafettidaagaa 2:1-29
2 Hegaa gishshawu, haratu bolli pirddiya nenoo, ooninne pirddiyo gaasoy baawa; ayssi giikko, neeni haratu bolli pirddiyo wode, eti oottiyobata oottiyo gishshawu mooranchcha gidiyogaa bessaasa.
2 Hegaa malabaa oottiyageetu bolli Xoossay pirddanaagaa eroos, qassi I xillobaa* pirddees.
3 Shin hegaa malabaa oottaydda, hegeeta oottiyageetu bolli pirddiya nenoo, Xoossay pirddiyo wode appe qosettana gaada qoppay?
4 Xoossay daroppe kehees, bana teqqeesinne danddayees, yaatin neeni hegaa xaasayay? Neeni zilꞌꞌettada laamettanaadan Xoossay ba kehatettan maaddanawu koyiyogaa erikkii?
5 Neeni zilꞌꞌettada laamettanawu koyenna, wozanay kebeelido asa gidiyo gishshawu, Xoossaa hanqquwa gallassawu neeyyo hanqquwa minjjaasa; Xoossay he gallassi ba xillo pirddaa qonccissana.
6 Qassi I asawu ubbawu A oosuwadan zaarana:
7 genccidi loꞌꞌobaa oottiyogan Xoossaa ufayssanawu, qassi bonchchuwanne musenna bollaa demmanawu koyiyageeti merinaa deꞌuwa ekkana;
8 gidoppe attin, ooyettiyageetanne tumaara giigiyabaa oottiyogaa aggidi xillo gidennabaa oottiyageeta Xoossay hanqqettananne qaxxayana.
9 Qohiyabaa oottiya ooninne,* koyro Ayhudati, qassi Giriiketikka waayettananne seelettana;
10 shin loꞌꞌobaa oottiyageetu ubban, koyro Ayhudatun, qassi Giriiketunkka Xoossay ufayttana, eti bonchchettananne Xoossaara sarotettan deꞌana.
11 Ayssi giikko, Xoossay oonanne zaggenna.
12 Ayssi giikko, higgiya erennan nagaraa oottidaageeti ubbay higgiya erennaba gidikkokka xayana; shin higgiya eriiddi nagaraa oottidaageeti ubbay higgiyan xaafettidaagaadan pirddaa ekkana.
13 Ayssi giikko, Xoossay xillo gaanaageeti higgiyara giigidi deꞌiyageetappe attin, higgiya siyiyageeta gidokkona.
14 Hara biittaa asati higgiya erana xayikkokka, higgiyan deꞌiyabaa oottoosona; eti higgiya erana xayikkokka, banttawu higge.
15 Eta kahay etaara markkattiyo wode, qassi eta qofay* eta moorideta woy mooribeekketa giyo wode, higgee oychchiyobaa oottiyogee eta wozanan xaafettidoogaa bessoosona.
16 Taanikka yootiyo mishiraachchuwadan, asay geeman oottidobawu bessiyabaa Xoossay Kiristtoos Yesuusa baggaara qachchiyo gallassi hegee hanana.
17 Haꞌꞌi Ayhuda geetettiyagoo, higgiyan ammanettiyagoonne Xoossan ceeqettiyagoo,
18 neeni oottanaadan Xoossay koyiyobaa eraasa, qassi Higgiyappe nena tamaarissido* gishshawu, keehi goꞌꞌiyabaa waati shaakkanaakko eraasa,
19 qassi neeni aynne sirennan, taani qooqiya kaalettays, xuman deꞌiyageetuyyo pooꞌo yaagaasa;
20 neeni eeyyata seerays, naata tamaarissays, qassi Higgiyan deꞌiya keehi koshshiyabaanne tumaa akeekays yaagaasa;
21 yaatin neeni harata tamaarissaasa, shin nena ayssi tamaarissikkii? Neeni harati wuuqqennaadan yootaasa, shin ayssi wuuqqay?
22 Neeni harata, “Wodiraa laammoppite” yaagaasa, shin ayssi wodiraa laammay? Neeni eeqa misileta shenetaasa, shin xoossatu garota ayssi bonqqay?
23 Neeni higgiyan ceeqettaasa, shin Higgiya menttada ayssi Xoossaa kawushshay?
24 Ayssi giikko, Geeshsha Maxaafay hagaadan gees: “Hara biittaa asaa giddon asay intte gaasuwan Xoossaa sunttaa toochchees.”
25 Qaxxarettiyogee neeni higgiya naagiyo wode xallan maaddees; shin neeni higgiya menttikko, qaxxarettiyogee aynne maaddenna.
26 Hegaa gishshawu, qaxxarettibeenna asi Higgiyan koyettiyabaa oottikko, Xoossay A qaxxarettida asadan xeellennee?
27 Qassi bollaa qaxxarettibeenna asi Higgiyan koyettiyabaa oottidi, higgiya eraydda higgiya menttiya, qaxxarettida nena yiggana.
28 Ayssi giikko, “Taani Ayhuda” giya asi tumu Ayhuda gidenna, bollaa qaxxarettiyogeekka aynne maaddenna.
29 Shin wozanan Ayhuda gidida asi tumu Ayhuda, qassi wozanaa qaxxarettiyogee tumu qaxxara; I hegaadan qaxxarettiyoy ayyaanaanappe attin, higgiya naagiyogaana gidenna. A galatiyay Xoossaappe attin, asaa gidenna.
Footnotes
^ Mise, “tumaara maayiyabaa.”
^ Woykko “O shemppoynne.”
^ Mise, “qofaa giddon.”
^ Woykko “qaalan tamaarissido.”
