Roome Asaassi Xaafettidaagaa 3:1-31
3 Yaatin, Ayhudati aybin goꞌettiyonaa, woy qaxxarettiyogee aybin maaddii?
2 Daroban goꞌettoosona. Koyroogee, Xoossay yootidobay etayyo imettiis.
3 Yaatin, ammanenna issi issi Ayhudatubaa woygana danddayettii? Eti ammanenna gishshawu asay Xoossan ammanettana danddayenna giyogee?
4 Mule hegaadan gidenna! Shin asay ubbay worddanchcha gidikkokka, “Neeni xillo gidiyogaa ne yootiyoban bessana malanne nena mootiyoban neeni shatimmana mala” geetettidi xaafettidoogaadan, Xoossay muletoo tumaa yootees.
5 Nuuni iitabaa oottiyo wode Xoossay xillo gidiyogaa asay akeekees. Yaatin, Xoossay nuna qaxxayiyogee bessennaba giyogee? (Issi issi asay hegaadan qoppees.)
6 Akkay gidenna! Hankkoode, saꞌan deꞌiya asaabaa Xoossay waati qachchanee?
7 Shin taani worddotiyogee Xoossay yootiyobay tuma gidiyogaa bessiyabanne asay A sabbanaadan oottiyaba gidikko, Xoossay tana ayssi nagaranchcha gii?
8 Qassi nuna, “Loꞌꞌobay yaanaadan ane iitabaa oottoos” yaagoosona giidi issoti issoti wordduwa yootiyogaadan ayssi gookkoo? He asatu bolli pirddiyogee bessiyaba.
9 Yaatin nuuni haratuppe aaruwan goꞌettoos giidi qoppana koshshii? Mule koshshenna! Ayssi giikko, qommoora giidoogaadan Ayhudatikka Giriiketikka ubbay nagarawu azazettoosona;
10 hegee hagaadan xaafettidoogaadaana: “Xillo asi baawa, issoynne deꞌenna;
11 yiggi xeelliya asi baawa; Xoossaa koyiya asi baawa.
12 Asay ubbay wora simmiis, eti ubbay pattennaageeta gididosona; haratuyyo kehiya asi baawa, issoynne baawa.”
13 “Eta kookkee dooyetti uttida duufo; eti bantta inxxarssan asaa balettidosona.” “Shooshshaa marzzee eta doonan deꞌees.”
14 “Eta doonan massammaynne camo haasayay kumiis.”
15 “Eta tohoti suuttaa gussanawu eesotoosona.”
16 “Eti ubbatoo asaa qohoosonanne tuggayoosona,
17 qassi eti sarotettaa ogiya eribookkona.”
18 “Eti Xoossawu yayyokkona.”
19 Eti ubbay sirphphi gaana malanne Xoossay eta qaxxayanaadan, saꞌan deꞌiya ubbay A sinttan mooranchcha gidana mala, Higgiyan deꞌiyabay ubbay Higgiya naagiyageetuyyo odettidoogaa eroos.
20 Hegaappe denddidaagan, higgee nagaray aybakko nuuni loytti akeekanaadan oottido gishshawu, ooninne* higgiyan koyettiyabaa oottidi Xoossaa sinttan xillo geetettenna.
21 Shin Higgiyaninne Xoossay erissidobaa yootiyageeti xaafidoban odettidaagaadan, higgee baynnan Xoossaa sinttan xillo geetettana danddayiyogee haꞌꞌi qoncciis,
22 ee, Yesuus Kiristtoosa ammaniyogan hegaadan xillo geetettana danddayettees, qassi hegee ammaniya ubbaassa. Ayssi giikko, Xoossay oonanne zaggenna.
23 Ayssi giikko, asay ubbay nagaraa oottiis, qassi eti Xoossaagaadan wottiyobi baynnaageeta gidana danddayokkona,
24 Kiristtoos Yesuusi nagaraappe woziyobaa qanxxidi eta ashshiis; hegaa gishshawu, eti Xoossaa sinttan xillo geetettoosona; qassi Xoossay laggetiyabi baynna ba kehatettan etawu hegaa coo immiis.
25 Asay Yesuusa suuttan ammanin Xoossaara eta sigetissiya* yarshshodan Xoossay A immiis. Xoossay danddayidi* kase nagaraa atto giyo wode I xillo gidiyogaa bessanawu hegaa oottiis.
26 Qassi ha wodiyan Yesuusa ammaniya asa xillo giyo wodekka I xillo gidiyogaa bessanawu hegaa oottiis.
27 Yaatin ceeqettiyobi aybi deꞌii? Aybinne baawa. Hegaa diggiya higgee awugee? Oosuwa higgee diggii? Akkay, ammanuwa higgee diggees.
28 Ayssi giikko, asi higgiyan koyettiyabaa oottidi gidennan, ammanuwan xillo geetettiyogaa akeekoos.
29 Woykko I Ayhudatu xalaalaa Xoossee? I hara biittaa asawukka Xoossaa gidennee? Ee, I hara biittaa asawukka Xoossaa.
30 Xoossay issuwa gidiyo gishshawu, qaxxarettida asata eta ammanuwappe denddidaagan xillo gaana, qassi I qaxxarettibeenna asata eta ammanuwan xillo gaana.
31 Yaatin nuuni nu ammanuwan higgiya goꞌꞌennaba kessiyo? Mule kessokko! Shin nuuni higgiyawu exatoos.
