Roome Asaassi Xaafettidaagaa 4:1-25
4 Hegaa gishshawu, ashuwan nu mayzza aawaa Abrahaamabaa shin woyganee?
2 Leemisuwawu, Abrahaami xillo geetettidoy ba oosuwappe denddidaagaana gidiyakko, I ceeqettanaadan oottiyabay deꞌees. Shin I Xoossaa sinttan ceeqettana danddayenna.
3 Geeshsha Maxaafan deꞌiya qofay aybee? “Abrahaami Yihoowa ammaniis, qassi hegaa gishshawu Xoossay A xillo asadan xeelliis.”
4 Oottida urawu A miishshaa qanxxiyogee kehatettadan xeelettenna, shin hegee ayyo imettana bessiyaba.*
5 Gidoppe attin, nagaraa oottikkonne ba oosuwan ammanettenna asa xillo giya Xoossaa ammaniya ura ammanuwa Xoossay xillotettadan xeellees.
6 Hegee oosoy baynnan Xoossay xillo giyo asi ufayttiyogaa Daawitikka yootidoogaa mala; I hagaadan giis:
7 “Eti oottido iitabay atto geetettidonne eta nagaray kamettido* asati ufayttoosona;
8 Yihooway A nagaraa mule qoodenna asi ufayttees.”
9 Yaatin hegaadan ufayttiyageeti qaxxarettida asatu xalleeyye, qaxxarettibeenna asatikka ufayttiyonaa? Ayssi giikko, nuuni hagaadan giida: “Abrahaama ammanuwa gishshawu Xoossay A xillo asadan xeelliis.”
10 Yaatin Xoossay A xillo asadan xeellidoy awudee? He wode I qaxxarettideeyye, qaxxarettibeennee? I he wode biron qaxxarettibeenna.
11 Xoossay I qaxxarettanaadan yootiis; hegee I biron qaxxarettennan ammanido gishshawu xillo geetettidoogaa bessiya malaata.* Hegaa gishshawu, qaxxarettennan ammaniya ubbatuyyo I aawa gidiis, qassi Xoossay eta xillo asadan xeelliis;
12 Abrahaami qaxxarettida asatussikka aawa, I qaxxarettidaageetu xalaalaassa gidennan, aagaadan ammaniyageetussikka aawa; nu aaway Abrahaami biron qaxxarettennankka ammanees.
13 Ayssi giikko, Abrahaami woy A zerettay biittaa laattanaagaa Xoossay qaalaa gelidoy higgiyana gidenna, shin Abrahaami ba ammanuwappe denddidaagan xillo geetettido gishshawu qaalaa geliis.
14 Laattiyageeti higgiya naagiyageetu xalla gidikko, ammanoy aynne maaddenna, qassi qaalaa gelidobaykka mela attiis.
15 Higgee Xoossay hanqqettanaadan oottiyogee tuma, shin higgee baynnaakko, higgiya kanttiyogeekka deꞌenna.
16 Xoossay immana giyoy laggetiyabi baynna ba kehatettan gidana mala, ammanuwa gishshawu I immana giyoy hegaassa; nu ubbaa aawaa Abrahaama naatu ubbaassi, Higgiya naagiyageetu xallaassi gidennan, aagaadan ammaniyageetussikka Xoossay qaalaa gelidobay polettana mala I hegaa oottees.
17 (“Taani nena daro deretussi aawa oottaas” geetettidi xaafettidoogaadan hegee haniis.) Hegee hayqqidaageeti paxa deꞌanaadan oottiyanne deꞌennabata deꞌoosona giya, I ammanido Xoossaa sinttan haniis.
18 Danddayettennaba milatikkokka, “Ne zerettay hegaadan hanana” geetettidoogaadan, I daro deretu aawa gidanaagaa ammaniis.*
19 Qassi I ammanuwan shuggana xayikkonne, hayqqidaba mala gidida ba bollaanne (ayyo layttay 100 heera gidiyo gishshawu), Saari uloy hayqqidaagaa* qoppiis.
20 Shin Xoossay immana giidobaappe denddidaagan, I siribeennanne ammanennan aggibeenna; ubbakka I ammanuwan minnidi Xoossaa sabbiis,
21 qassi Xoossay immanawu qaalaa gelidobaa I polanakka danddayiyogaa wozanappe ammanettiis.
22 Yaatin, “Xoossay hegaa gaasuwan A xillo asadan xeelliis.”
23 Shin Geeshsha Maxaafan, “Xoossay A xillo asadan xeelliis” giya qofay A xalaalaassa gidenna;
24 I nunakka xillo asadan xeellana, hegaa gishshawu, he qofay nuussikka xaafettiis, ayssi giikko, nu Godaa Yesuusa hayquwappe denttida A nuuni ammanoos.
25 I nu nagaraa gishshawu hayqqana mala asay A aatti immiis, qassi nuuni xillo geetettana mala Xoossay A hayquwappe denttiis.
Footnotes
^ Woykko “hegee acodan xeelettiyaba.”
^ Woykko “atto geetettido.”
^ Woykko “geetettidoogawu maatafa.”
^ Woykko “hidootaa wottiis.”
^ Woykko “mantta gididaagaa.”
