Roome Asaassi Xaafettidaagaa 5:1-21
5 Hegaa gishshawu, ammanuwappe denddidaagan nuuni haꞌꞌi xillo geetettida; yaanikko, nu Godaa Yesuus Kiristtoosa baggaara Xoossaara sarotettan deˈoos.
2 Nu ammanuwappe denddidaagan nuuni haꞌꞌi an minni eqqido, laggetiyabi baynna kehatettaa Xoossay nuussi kehanaadankka Kiristtoosa baggaara ogee dooyettiis; nuuni Xoossaa bonchchuwa demmanawu naagiyo* gishshawu, haꞌꞌi ufayttana koshshees.*
3 Hegaa xalla gidennan, waayee nuuni genccanaadan maaddiyogaa eriyo gishshawu, waayettiiddikka ufayttana koshshees;*
4 gencciyogee qassi Xoossay dosiyo asa gidanaadan maaddees; Xoossay dosiyo asa gidiyogee qassi hidootay deꞌanaadan maaddees.
5 Qassi Xoossaa siiqoy I nuussi immido geeshsha ayyaanaa baggaara nu wozanan kumido gishshawu, hidootay nuna yeellayenna.
6 Ayssi giikko, nuuni laafa gidi uttidaashin, Kiristtoosi wodee gakkin nagaranchcha asatu gishshawu hayqqiis.
7 Ayssi giikko, xillo asa gishshawu hayqqanawu koyiya uri baawa gaana danddayettees; shin loꞌꞌo asa gishshawu hayqqanawu koyiya uri geella deꞌana danddayees.
8 Shin Xoossay ba siiquwa nuuyyo hagaadan bessiis: nuuni nagaranchcha gidi uttidaashin Kiristtoosi nu gishshawu hayqqiis.
9 Hegaappe denddidaagan, nuuni A suuttan xillo geetettido gishshawu, A baggaara Xoossaa hanqquwappe attanaagee geeshsha.
10 Nuuni Xoossaara morkkettidi deꞌiiddi A Naꞌay hayqqido gishshawu aara sigettida; hegaappe denddidaagan, nuuni haꞌꞌi sigettidi A deꞌuwan attanaagee keehi ammanttiyaba.
11 Hegaa xalla gidennan, nuna Xoossaara sigettida nu Godaa Yesuus Kiristtoosa baggaara nuuni Xoossaara dabbotido gishshawukka keehi ufayttoos.
12 Hegaa gishshawu, issi asa gaasuwan nagaray saꞌaa yiidoogaadaaninne nagaraa gaasuwan hayqoy yiidoogaadan, asay ubbay nagaraa oottido gishshawu hayqoy eta ubbaa gakkiis.
13 Ayssi giikko, Higgiyappe kasekka nagaray saꞌan deꞌees, shin higgee baynna wode oonanne nagaraa oottadasa giidi mootana danddayettenna.
14 Gidoppe attin, Addaame wodeppe doommidi Muuse wode gakkanaashin, nagaraa Addaameegaadan oottibeennaageetu bollikka nagaray kawodan haariis. Addaamee yaana geetettidaagaa mala.
15 Shin Xoossaa imotay mooruwappe dummatees; ayssi giikko, issi asa mooruwan daroti hayqqikko, laggetiyabi baynna Xoossaa kehatettaynne laggetiyabi baynna, issi asa Yesuus Kiristtoosa kehatettan Xoossay coo immiyo imotay darotuyyo eellanaagee* keehi ammanttiyaba!
16 Hegaadankka, coo immiyo imotaa ayfee issi asa mooruwa ayfiyappe dummatees. Ayssi giikko, issi mooroy asaa ubbaa mooranchcha giissiis, shin daro nagaraa gishshawu coo immiyo imotay daro asay xillo geetettanaadan oottiis.
17 Ayssi giikko, issi asa mooruwa gaasuwan A baggaara hayqoy kawotikko, laggetiyabi baynna Xoossaa kehatettaynne I coo immiyo imotay etawu eellidoogeeti issi asa, Yesuus Kiristtoosa baggaara deꞌanaageenne kawo gididi haaranaagee keehi ammanttiyaba!
18 Hegaa gishshawu, issi mooruwan asawu ubbawu hayqoy pirddettidoogaadan, issi xillo oosoykka asay ubbay xillo geetettanaadaaninne paxa deꞌanaadan oottees.
19 Ayssi giikko, issi asi azazettibeenna gishshawu daroti nagaranchcha gididoogaadan, hegaadankka issi asi azazettido gishshawu daroti xillo gidana.
20 Asay daroban mooriyogaa bessanawu Higgee imettiis. Shin nagaray darin, Xoossay laggetiyabi baynna ba kehatettay eellanaadan oottiis.
21 I aybissi hegaadan oottidee? Nagaraynne hayqoy kawo gididi haaridoogaadan, asay nu Godaa Yesuus Kiristtoosa baggaara merinawu deꞌana mala, laggetiyabi baynna Xoossaa kehatettay xillotettan kawo gididi haaranaadan oottiis.
Footnotes
^ Woykko “hidootaa wottiyo.”
^ Woykko geella, “ufayttoos.”
^ Woykko geella, “ufayttoos.”
^ Woykko “kumi palahanaagee.”
