Roome Asaassi Xaafettidaagaa 6:1-23
6 Yaatin nuuni woygana koshshii? Laggetiyabi baynna kehatettay daranaadan nuuni nagaraa oottiyogaa aggana koshshenneeyye?
2 Akkay! Nuuni nagarawu hayqqida, yaatin waanidi nagaraa oottiyogaa aggokkoo?
3 Woy nuuni Kiristtoos Yesuusa giddo muukettidaageeti ubbay A hayquwa giddo muukettidoogaa erekketii?
4 Hegaa gishshawu, Kiristtoosi ba Aawaa wolqqan hayquwappe denddidoogaadan, nuunikka ooratta deꞌuwa deꞌana mala, A hayquwa giddo muukettidi aara moogettida.
5 Nuuni aagaa mala hayquwa hayqqidi aara issuwa gidido gishshawu, aagaa mala dendduwakka denddidi aara issuwa gidanaagee tuma.
6 Ayssi giikko, nuuni nagarawu aylle gidennaadan, nu nagaranchcha asatettay wolqqaa xayana mala, nu kase deꞌoy aara mittan misimaariyan xishettidoogaa eroos.
7 Ayssi giikko, issi asi hayqqiyo wode, Xoossay A nagaraa acuwa maariis.*
8 Hegaa bollikka, nuuni Kiristtoosaara hayqqido gishshawu, aara deꞌanaagaakka ammanettoos.
9 Ayssi giikko, Kiristtoosa haꞌꞌi Xoossay hayquwappe denttido gishshawu, I haranttuwa hayqqennaagaanne hayquwawu A bolli wolqqi baynnaagaa nuuni eroos.
10 Ayssi giikko, I haranttuwa hayqqana koshshennan issitoo xallaa nagarawu* hayqqiis, shin haꞌꞌi deꞌuwa Xoossawu* deꞌees.
11 Inttekka hegaadan, nagarawu hayqqidabadaaninne Kiristtoos Yesuusa baggaara Xoossawu deꞌiyabadan qoppite.
12 Hegaa gishshawu, asatettaa amuwawu intte azazettenna mala, hayqqiya intte asatettaa nagaray kawodan haariyogaa aggennaadan oottoppite.
13 Qassi iitabaa oottanawu intte asatettaa* nagarawu sheedhdhiyogaa aggite. Shin hayquwappe denddida asadan inttena Xoossawu sheedhdhite. Qassi loꞌꞌobaa oottanawu intte asatettaa* Xoossawu sheedhdhite;
14 Ayssi giikko, intte higgiyawu haarettiyogaa aggidi, laggetiyabi baynna Xoossaa kehatettan goꞌettiyo gishshawu, nagaray inttena haarana bessenna.
15 Yaatin nuuni ay kuuyana koshshii? Nuuni higgiyawu haarettiyogaa aggidi laggetiyabi baynna Xoossaa kehatettan goꞌettiyo gishshawu nagaraa oottana koshshii? Mule koshshenna!
16 Intte ubbatoo azazettiyo urawu aylle gidiyogaa ereeta. Hegaa gishshawu, intte nagarawu aylle gidikko hayqqana, shin Xoossawu aylle gididi azazettikko xillo gidana.
17 Shin intte issi wode nagarawu aylle gidikkonne, Xoossaayyo wozanappe azazettiyo gishshawunne I tamaarissidoogaadan oottiyo gishshawu Xoossawu galatay gido.
18 Ee, intte nagaraa aylletettaappe kiyido gishshawu, xillotettawu aylle gidideta.
19 Intte bali baynnaageeta gidenna gishshawu, taani asay eriyo qaalan yootays; iitabaa oottanawu intte asatettaa tunabawunne iitabawu aylledan sheedhdhidoogaadan, haꞌꞌi geeshshabaa oottanawu intte asatettaa xillotettawu aylledan sheedhdhite.
20 Ayssi giikko, intte nagaraa aylle gidido wode, xillotettay inttessi goda gidenna.
21 Intte he wode ayfidobay aybee? Haꞌꞌi inttena yeellayiyabata ayfideta. Ayssi giikko, hegeetu wurssettay hayquwa.
22 Gidoppe attin, intte haꞌꞌi nagaraa aylletettaappe kiyidi Xoossaayyo aylle gidido gishshawu, geeshshatettaara gayttidabaa ayfeeta, qassi hegawu wurssettay merinaa deꞌuwa.
23 Ayssi giikko, nagaray qanxxiyobay hayquwa, shin Xoossay nu Godaa Kiristtoos Yesuusa baggaara immiyo imotay merinaa deꞌuwa.
Footnotes
^ Woykko “nagaraa atto giis.”
^ Hegeekka, nagaraa xayssanaassa.
^ Woykko “Xoossay koyiyobaa oottanawu.”
^ Mise, “bollaa shaahota.”
^ Mise, “bollaa shaahota.”
