Roome Asaassi Xaafettidaagaa 7:1-25
7 Ishatoo, Higgee issi asayyo goda gidiyoy I paxa deꞌiyo wode gidiyogaa erekketii? (Ayssi giikko, taani higgiya eriyageetuyyo yootays.)
2 Leemisuwawu, machchiya I azinay paxa deꞌiyo wode, ba azinaara waaxettada issippe deꞌawusu; shin I azinay hayqqikko, A ba azinaa higgiyappe laꞌa kiyawusu.
3 Hegaa gishshawu, I azinay paxa deꞌiyo wode, A hara bitaniya gelikko, wodiraa laammidaaro geetettawusu. Shin I azinay hayqqikko, A ba azinaa higgiyappe laꞌa kiyawusu; hegaa gishshawu A hara ura gelikko, wodiraa laammukku.
4 Hegaa gishshawu, ta ishatoo, yarshshettida Kiristtoosa bollaappe denddidaagan, inttekka higgiyawu hayqqideta; nuuni Xoossaa ufayssiyabaa oottana mala, I hayquwappe denttido Kiristtoosawu intte haarettana mala hegee haniis.
5 Ayssi giikko, nuuni ashuwa amuwadan deꞌido wode, Higgee qonccissido nagaraa amoy hayquwa ayfiya ayfanawu nu asatettan* oottees.
6 Shin nuuni nuna teqqida Higgiyawu hayqqido gishshawu appe laꞌa kiyida; hegaa gishshawu, nuuni Higgee kaalettiyo gishshawu gidennan, ayyaanay kaalettiyo gishshawu aylle gidana bessees.
7 Yaatin nuuni woyganee? Higgee nagaree? Mule gidenna! Higgee baynnaakko taani nagaraa erikke. Leemisuwawu, Higgee, “Neeni asabaa amottana bessenna” geennaakko, taani asabaa amottiyogaa erikke.
8 Shin azazoy ubbabaa amoy ta giddon deꞌiyogaanne hegee nagara gidiyogaa, nagari tumuppe aybakko taani eranaadan oottiis; higgee baynna wode nagarawu wolqqi baawa.
9 Higgee baynna wode kase taani paxa deꞌays. Gidoppe attin, azazoy yin nagaray deꞌiis, shin taani hayqqaas.
10 Qassi taayyo deꞌuwa demissana giido azazoy hayquwa ehiis.
11 Ayssi giikko, azazoy taani nagaray aybakko eranaadan oottiis, qassi nagaray tana balettiisinne woriis.
12 Hegaa gishshawu, Higgee ba huuphen geeshsha, qassi azazoykka geeshsha, xillonne loꞌꞌo.
13 Hegaa gishshawu, loꞌꞌobay taayyo hayquwa ehiidee? Akkay! Shin loꞌꞌoban hayquwa tawu ehaanawu ta giddon oottiyagee nagaraa gidiyogee qonccana mala tana woridaagee nagaraa. Qassi azazoy nagaray keehi iitaba gidiyogaa qonccissees.
14 Ayssi giikko, Higgee Xoossaabaa gidiyogaa nuuni eroos, shin taani nagarawu bayzettida nagaranchcha.*
15 Ayssi giikko, taani ay oottiyakko akeekikke. Taani oottanawu koyiyobaa oottikke, shin ixxiyobaa oottays.
16 Taani Higgee loꞌꞌo gidiyogaa maayays, yaanikkokka, taani oottanawu koyiyo loꞌꞌobaa oottikke.
17 Hegaa gishshawu, hegeeta oottiyagee tana gidennaagee tuma, shin ta giddon deꞌiya nagaray oottees.
18 Ayssi giikko, ta giddon, hegeekka, ta ashuwan loꞌꞌobi deꞌennaagaa erays; taani loꞌꞌobaa oottanawu amottays, shin amottiyo loꞌꞌobaa oottana danddayikke.
19 Ayssi giikko, taani oottanawu koyiyo loꞌꞌobaa oottikke, shin taani oottanawu koyenna iitabaa oottays.
20 Hegaa gishshawu, taani oottana koyennabaa oottikko, hegaa ta giddon deꞌiya nagaray ootteesippe attin, taani oottikke.
21 Hegaa gishshawu, ha higgee ta giddon deꞌees: Taani suurebaa oottana koyiyo wode, tanan iitabay deꞌees.
22 Taani ta wozanan Xoossaa higgiyan keehi ufayttays,
23 shin ta bollaa* giddon deꞌiya, nagaraa higgiyan tana omooddidi efiya, hara higgiya ta bolla* giddon beꞌays.
24 Taani ayba azzanttiya asee! Tana ha hayquwawu efiya asatettaappe ashshanay oonee?
25 Nu Godaa Yesuus Kiristtoosa baggaara tana ashshiya Xoossawu galatay gido! Simi taani ta qofan Xoossaa higgiyawu aylle, shin ta ashuwan nagaraa higgiyawu aylle.
Footnotes
^ Mise, “bollaa shaahotun.”
^ Mise, “asho.”
^ Mise, “bollaa shaahotu.”
^ Mise, “bollaa shaahotu.”
