Roome Asaassi Xaafettidaagaa 8:1-39
8 Hegaa gishshawu, Kiristtoos Yesuusaara issuwa gididaageeti mooranchcha gidokkona.
2 Ayssi giikko, ayyaanaa higgee intteyyo deꞌuwa immin Kiristtoos Yesuusaara issuwa gidideta; yaanin nagaraanne hayquwa higgiyappe laꞌa kiyideta.
3 Xoossay nagaraa xayssanawu ba Naꞌaa nagaranchcha ashuwa milatissi kiittidi, Higgee ashuwa gaasuwan wolqqaa xayido gishshawu oottana danddayibeennabaa oottiis; qassi I yaatidi ashuwa nagaraa bolli pirddiis.
4 Higgiyan koyettiya xillotettay nunan polettana mala hegee haniis; nuuni ayyaanawu azazettidi deꞌoosippe attin, ashuwawu azazettidi deꞌokko.
5 Ayssi giikko, ashuwawu azazettidi deꞌiyageeti ashuwabaa qoppoosona, shin ayyaanawu azazettidi deꞌiyageeti ayyaanaabaa qoppoosona.
6 Ayssi giikko, ashuwabaa qoppiyogee hayqo, shin ayyaanaabaa qoppiyogee deꞌonne sarotetta;
7 ayssi giikko, ashoy Xoossaa higgiyawu haarettenna gishshawunne haarettanawukka danddayenna gishshawu, ashuwabaa qoppiyageeti Xoossaara morkkettoosona.
8 Hegaa gishshawu, ashuwa ufayssanawu koyiyageeti Xoossaa ufayssanawu danddayokkona.
9 Gidoppe attin, Xoossaa ayyaanay tumu inttenan deꞌikko, ayyaanawu azazetteetappe attin, ashuwawu azazettekketa. Shin oonaaninne Kiristtoosa ayyaanay deꞌana xayikko, he asi abaa gidenna.
10 Gidoppe attin, intte Kiristtoosaara issuwa gidikko, nagaraa gaasuwan intte asatettay hayqqikkokka, xillotettaappe denddidaagan ayyaanay intteyyo deꞌuwa immees.
11 Yesuusa hayquwappe denttida Xoossaa ayyaanay inttenan deꞌikko, Kiristtoos Yesuusa hayquwappe denttida Xoossay hayqqiya intte asatettaakka inttenan deꞌiya ba ayyaanan paxa deꞌanaadan oottana.
12 Hegaa gishshawu, ishatoo, nuuni ashuwawunne A oosuwawu wolqqan azazettana bessenna;
13 ayssi giikko, intte ashuwawu azazettidi deꞌikko, hayqqiyogee geeshsha; shin intte ayyaanay maaddin asatettaa oosuwa worikko, paxa deꞌana.
14 Ayssi giikko, Xoossaa ayyaanay kaalettiyo ubbati Xoossaa naata.
15 Ayssi giikko, Xoossaa ayyaanay nuuni aylle gididi zaarettidi yayyanaadan oottenna, shin nuuni nu qaalaa xoqqu oottidi, “Abbaa, Aawawu!” giidi an xeegiyo, inttena ba naata oottidi ekkiyo ayyaanaa Xoossay immiis.
16 Nuuni Xoossaa naata gidiyogaa A ayyaanay nu ayyaanaara issippe markkattees.
17 Simi nuuni Xoossaa naata gidikko, I nuussi laataa immana, qassi I Kiristtoosassi immido laataa nuussi immana; nuuni Kiristtoosadan waayettikko, aara issippe xoqqu xoqqu gaana.
18 Nuuni haꞌꞌi waayettiyo waayiya Xoossay nuuyyo malaaliya woytuwa immana wodiyara geeddarssiyo wode hegee ufura* mala gaada qoppays.
19 Ayssi giikko, meretay ubbay Xoossaa naatu bonchchoy beettana wodiya naagees.
20 Ayssi giikko, meretay ubbay hada deꞌo deꞌiis; shin Xoossaa sheneenappe attin, ba shenen hegaadan deꞌibeenna. Gidoppe attin, ha hidootay deꞌees:
21 Meretay ubbay musiya bollaa aylletettan deꞌiyogaappe attidi, Xoossaa naatu gita laꞌatettaa demmana.
22 Ayssi giikko, hanno gakkanawu meretay ubbay issippe ooliyogaanne waayettiyogaa eroos.
23 Qassi eta xalaala gidennan, gakkida xeera kattaa mala ayyaanaa ekkida nuunikka ooloos. Qassi Yesuusa wozuwan nu asatettaappe laꞌa kiyin Xoossay nuna ba naata oottidi ekkana wodiya nuuni yeemottidi naagoos.
24 Ayssi giikko, nuuni hegaa naagishin* Xoossay nuna ashshiis; shin naagiyobaa beꞌikko, A naagiyogee attees. Ayssi giikko, issi uri beꞌiyobaa waanidi naagana danddayii?
25 Shin nuuni naagidobaa* biron beꞌana xayikko, laamotidi hegaa gencci naagiyogaa aggokko.
26 Hegaa bollikka, nuuni porqqattiyo wode Xoossaa ayyaanay nuna maaddana danddayees. Ay woossanaakko nuussi issi issitoo erettennan ixxana danddayees. Hegaa mala hanotatun nuuni woyganaakko erana xayikkonne, nu qofay Xoossaa ayyaanaa baggaara erettana danddayees.
27 Shin geeshsha ayyaanay Xoossay koyiyogaadan woossiyo gishshawu, wozanaa qoriyagee he ayyaanay geeshshatuyyo woossiyobaa erees.
28 Xoossay A sheniyadan xeesettida, A siiqiyageeti goꞌettana mala ba oosuwa ubbaa maarayiyogaa nuuni eroos;
29 ayssi giikko, I dooranaageetubaa koyrokka erees, qassi eti ba ishatu giddon bayratiya A Naꞌaa milatiyageeta gidanaagaa maaciis.*
30 Hegaa bollikka, I xeegidoogeeti A Naꞌaa milatanaageeta; qassi I xillo giidoogeeti I xeegidoogeeta. Qassi I xoqqu xoqqu oottidoogeeti I xillo giidoogeeta.
31 Yaatin hageetubaa nuuni woygana koshshii? Xoossay nunaara deꞌikko, nuna xoonanay oonee?
32 I nu gishshawu ba Naꞌaa aatti immiisippe attin, I waayettennaadan diggibeenna gishshawu, nuussi kehidi hara ubbabaakka aara issippe immennee?
33 Xoossay dooridoogeeta mootanay oonee? Ayssi giikko, eta xillo giyay Xoossaa.
34 Eta bolli pirddanay oonee? Ayssi giikko, hayqqidaagee, ee, hegaappekka aaruwan Xoossay hayquwappe denttidoogee, Xoossaappe ushachcha baggaara uttidaageenne nu gishshataassi woossiyagee Kiristtoos Yesuusa.
35 Kiristtoosi nuna siiqennaadan digganabi aybee? Waayee woy hirggay woy naaqoy woy namisay woy kalloy woy daafiyabay woy bisoy digganee?
36 Geeshsha Maxaafay hagaadan gees: “Nuuni ne asa gidiyo gishshawu, eti ubbatoo nuna woranawu koyoosona; eti shukkiyo dorssadan nuna xeelloosona.”
37 Shin nuna siiqiyagee maaddiyo gishshawu, he ubbaban nuuni xoonoos.
38 Ayssi giikko, Xoossay nuna siiqiyogaa taani ammanays. Hayqoy woy deꞌoy woy kiitanchchati woy kawotettati woy haꞌꞌi deꞌiyabati woy yaanabati woy wolqqati
39 woy bollan deꞌiya aybinne woy garssan deꞌiya aybinne woy hara ay meretinne nu Goday Kiristtoos Yesuusikka siiqiyo Xoossaa siiquwappe nuna shaakkana danddayenna.
Footnotes
^ Woykko “pattennaba.”
^ Woykko “hegan hidootaa wottishin.”
^ Woykko “hidootaa wottidobaa.”
^ Woykko “koyrokka erees.”
