Roome Asaassi Xaafettidaagaa 9:1-33
9 Taani Kiristtoosa kaallays; geeshsha ayyaanay ta kahaa kaalettin taani tumaa yootays; taani yootiyobay worddo gidenna;
2 ta wozanan keehi kayyottaysinne keehi hirggays.
3 Ayssi giikko, ta ishata, ta asho dabbota maaddiyaba gidikko, taani qanggettida asadan Kiristtoosappe shaahettanawu giiga uttaas;
4 eti Xoossay ba naata oottidi ekkido Israaꞌeelata. Xoossay eta xoqqu xoqqu oottiis, qassi etaara maacettiisinne etayyo Higgiya immiis; Xoossaayyo goynniyo maatay etayyo deꞌees, qassi I eta anjjanawu qaalaa geliis.
5 Eti nu mayzza aawatu zeretta, qassi Kiristtoosi etappe yelettiis. Ubbaa haariya Xoossawu merinawu sabay gido. Aminꞌꞌi.
6 Gidoppe attin, hegee Xoossaa qaalay polettibeenna giyogaa gidenna. Ayssi giikko, tumu “Israaꞌeelati” Israaꞌeela zerettata ubbata gidokkona.
7 Eti Abrahaama zeretta gidiyo gishshawu ubbati naata gidokkona, shin, “Ne naata geetettanaageeti Yisaaqa zerettata gidana” geetettidi xaafettiis.
8 Hegee Abrahaama naati ubbati tumuppe Xoossaa naata giyogaa gidenna, shin Xoossay qaalaa gelidoogaadan yelettidaageeti tumu Abrahaama naata.*
9 Ayssi giikko, Xoossay, “Yiya laytti hannoode taani yin, Saara attuma naꞌa yelana” yaagidi qaalaa geliis.
10 Xoossay he wode xalla gidennan, nu mayzza aawaa Yisaaqappe Irbbiqa mentte naata shahaarido wodekka he qaalaa geliis;
11 he naati biron yelettennan, qassi eti loꞌꞌobaa woy iitabaa oottennan deꞌishin, Xoossay oona dooranaakko yootiis; ayssi giikko, Xoossay ba koyiyo ura dooreesippe attin, asa A oosuwadan doorenna;
12 Xoossay iyyo, “Bayray kaaluwa aylle gidana” yaagidoy hegaassa.
13 Qassi hegee, “Taani Yaaqooba siiqaas, shin Eesawa ixxaas” geetettidi xaafettidaagaara maayees.
14 Yaatin nuuni woygana koshshii? Xoossaaban likke gidennabi deꞌii? Akkay!
15 Ayssi giikko, I Muuseyyo, “Taani maaranawu koyiyo oonanne maarana, qassi taani qarettanawu koyiyo ooyyonne qarettana” yaagees.
16 Hegaa gishshawu, dooriyagee maariya Xoossaappe attin, issi asa koshshay woy daafuray I doorettanaadan oottenna.
17 Xoossay* Paaroonayyo hagaadan gees: “Taani ta wolqqaa neban bessanawunne ta sunttay saꞌaa ubban odettana mala, nena paxa wottaas.”
18 Hegaa gishshawu, I maaranawu koyiyo oonanne maarees, shin zozzattanawu koyiya ooninne zozzattanaadan aggi bayees.
19 Hegaa gishshawu, intte taayyo hagaadan gaana: “Xoossay maacidobaa ooninne gaaddetanawu danddayenna gishshawu, I ufayssanawu metiyagaa gidiyoy aybissee?”
20 Shin nenoo, Xoossaayyo xalada zaaranawu neeni oonee? Urqqa miishshay A medhdhiya ura, “Tana hagaadan ayssi oottadii” yaagii?
21 Urqqa miishshaa medhdhiyagee issi urqqaappe issi miishshaa bonchchobawu goꞌettanawunne qassi hara miishshaa kawushshabawu goꞌettanawu medhdhiyo maatay ayyo deꞌiyogaa erekketii?
22 Yaatin Xoossay ba hanqquwa bessanawunne ba wolqqaa erissanawu, xayana bessiya hanqqo miishshata keehi danddayidi tookkanawu koyikko shin?
23 I maariyo asatuyyo* ba gita anggaa erissanawu hegaa oottidaba gidikko shin? I etayyo woytuwa giigissi wottiis.
24 I Ayhuda asatu giddo xalaalaappe gidennan, hara biittaa asatu giddoppekka xeegido nuuni he asata.
25 I Hooseꞌa maxaafankka yootidobay hegaa: “Ta asa gidennaageeta ‘ta asa’ gaana, qassi taani kase siiqennaaro, ‘ta siiqiyoree’ gaana;
26 qassi eti, ‘Intte ta asata gidekketa’ geetettido sohuwan ‘merinawu deꞌiya Xoossaa naata’ geetettana.”
27 Hegaa bollikka, Isiyasi Israaꞌeelatubaa hagaadan giidi awaajjiis: “Israaꞌeela naatu qooday abbaa shafiya keena gidikkokka, keehi guutta asay* attana.
28 Ayssi giikko, Yihooway saꞌan deꞌiya asaa qorana, qassi I hegaa eesuwan wurssana.”
29 Qassi Isiyasi kasetidi yootidoogaadaana: “Saluwa kiitanchchata haariya Yihooway nuuyyo zerettaa ashshennaba gidikko, nuuni Sadoomadan hanana, qassi Gamoora mala gidana.”
30 Yaatin nuuni woygana koshshii? Hara biittaa asay xillo gidanawu baaxetana xayikkonne ammanuwappe denddidaagan Xoossaa sinttan eti xillo gididosona;
31 shin Israaꞌeelati xillotettaa higgiya naaganawu baaxetikkonne eti he higgiya muleera naagibookkona.
32 Aybissi? Eti ammanuwan gidennan, bantta oosuwan xillo gidanawu qoppido gishshataassa. Eti “xube shuchchan” xubettidosona;
33 hagaadan xaafettidaagaadaana: “Beꞌite! Taani Xiyonen xube shuchchaa, qassi ooggiya zaallaa wottays, shin an ammanettiya asi yeellatenna.”
Footnotes
^ Mise, “zeretta.”
^ Woykko “Geeshsha Maxaafay.”
^ Woykko “maarotaa miishshatuyyo.”
^ Woykko “attida guuttay.”
