Yohaannisi Xaafidoogaa 1:1-51
1 Doomettan Qaalaa giyogee deꞌees, qassi Qaalay Xoossaara deꞌees, qassi Qaalay xoossa.*
2 I doomettaappekka Xoossaara deꞌees.
3 Xoossay ubbabay deꞌanaadan oottiyo wode I maaddiis, qassi I maaddennan issibinne deꞌibeenna.
4 Deꞌoy deꞌanaadan I maaddiis, qassi deꞌoy asawu pooꞌo.
5 Qassi pooꞌoy xuman pooꞌees, shin xumay pooꞌuwa xoonana danddayibeenna.
6 Xoossay kiittido Yohaannisa giyo issi asi denddiis.
7 Ha bitanee ubba qommo asay I yootidobaappe denddidaagan ammananaadan, pooꞌuwabaa markkattanawu yiis.
8 He pooꞌoy A gidenna, shin I he pooꞌuwabaa markkattanawu yiis.
9 Ubba qommo asawu pooꞌissiya tumu pooꞌoy he wode asaakko* yaana hanees.
10 I asaa giddon* deꞌiis, qassi asay deꞌuwan deꞌanaadan maaddiis, shin asay A eribeenna.
11 I ba biitti yiis, shin A asay A mokki ekkibeenna.
12 Gidikkokka, A mokki ekkida ubbati A sunttan ammanido gishshawu, Xoossaa naata gidanaadan I etawu maataa immiis.
13 Qassi eti aawappenne aayeppe* woy eta shenen woy asa shenen yelettibookkona, shin Xoossaappe yelettidosona.
14 Hegaa gishshawu, Qaalay asa* gididi nunaara deꞌiis, qassi nuuni A bonchchuwa, aawi dumma naꞌa bonchchiyogaa mala bonchchuwa beꞌida; qassi laggetiyabi baynna kehatettaynne* tumay an kumiis.
15 (Yohaannisi abaa markkattiis, ee, I ba qaalaa xoqqu oottidi, “‘Ta geeduwa yiyagee taappe kase deꞌido gishshawu, taappe aadhdhees’ giidoy abaa.”)
16 Laggetiyabi baynna kehatettay an kumido gishshawu, nuuni ubbatoo he kehatettaa demmida.
17 Ayssi giikko, Xoossay Muuse baggaara Higgiya immiis, shin Yesuus Kiristtoosa baggaara nuuyyo laggetiyabi baynna kehatettaanne tumaa immiis.
18 Ay wodenne Xoossaa beꞌida asi baawa, shin ba Aawaa miyyiyan* deꞌiya dumma naꞌay, xoossay, A qonccissiis.
19 Ayhudati, “Neeni oonee?” giidi oychchanaadan kahinetanne Leewa zareta Yerusalaameppe kiittido wode, Yohaannisi hagaadan markkattiis:
20 I sohuwara, “Taani Kiristtoosa gidikke” yaagidi zaariis.
21 Qassi eti A, “Yaatin neeni oonee? Neeni Eelaasee?” yaagidi oychchidosona. Yaagin I, “Taani gidikke” yaagiis. Yaagin eti, “Neeni Xoossay erissidobaa yootiya, yaana geetettidaagee?” yaagidosona. Qassi I, “Gidikke!” yaagiis.
22 Yaatin eti A, “Nuna kiittidaageetuyyo odana mala, neeni oonakko nuuyyo yoota. Nena oona gay?” yaagidosona.
23 I hagaadan giis: “Xoossay erissidobaa yootiya Isiyasi giidoogaadan, bazzuwan ba qaalaa xoqqu oottidi, ‘Yihoowa ogiya sittayite’ yaagiyagee tana.”
24 He asati Parisaaweti kiittin yiidosona.
25 Hegaa gishshawu, eti A, “Yaatin, neeni Kiristtoosa woy Eelaasa woy Xoossay erissidobaa yootiya, yaana geetettidaagaa gidana xayikko, ayssi asaa haattan muukkay?” yaagidi oychchidosona.
26 Yohaannisi etayyo hagaadan giidi zaariis: “Taani inttena haattan muukkays. Intte giddon intte erenna asi deꞌees;
27 I ta geeduwa yees; taani A caammaa birshshanawukka bessikke.”
28 Hageeti Yorddaanoosappe arshsho baggan deꞌiya Biitaaniyan, Yohaannisi asaa haattan muukkiyosan hanidosona.
29 Yohaannisi wonttetta gallassi Yesuusi baakko yiyagaa beꞌidi hagaadan giis: “Asaa* nagaraa xayssiya Xoossaa Dorssaa beꞌite!
30 Taani, ‘Taappe kase deꞌido gishshawu taappe aadhdhiya bitanee ta geeduwa yees’ yaagada yootidoy abaa.
31 Taanikka A erikke, shin Israaꞌeela asay I oonakko erana mala, taani asaa haattan muukkays.”
32 Yohaannisi hagaadan giidikka markkattiis: “Taani ayyaanay haraphphe milatidi saluwappe wodhdhiyogaa beꞌaas, qassi he ayyaanay A bolli uttiis.
33 Taanikka A erikke, shin asaa haattan muukkanaadan tana kiittidaagee taayyo hagaadan giis: ‘Ayyaanay A bolli wodhdhiyogaanne uttiyogaa neeni beꞌiyo asi, hegee asaa geeshsha ayyaanan muukkana.’
34 Taani hegaa beꞌaas, qassi I Xoossaa Naꞌaa gidiyogaa markkattaas.”
35 Haranttuwakka, wonttetta gallassi Yohaannisi bana kaalliyageetuppe naaꞌꞌatuura eqqidi,
36 Yesuusi aadhdhiyagaa xeelliiddi, “Xoossaa Dorssaa beꞌite!” yaagiis.
37 Yohaannisa kaalliya he naaꞌꞌu asati I yaagiyogaa siyidi, Yesuusa kaallidosona.
38 Yaatin Yesuusi guyye simmidi, eti bana kaalliyogaa beꞌidi eta, “Intte ay koyeetii?” yaagiis. Eti A, “Rebbi (hegaa birshshettay “Asttamaariyawu” giyogaa), neeni awan deꞌay?” yaagidosona.
39 I eta, “Yiidi beꞌite” yaagiis. Yaagin eti biidi I deꞌiyosaa beꞌidosona, yaatidi he gallassi aara takkidosona; he wode saꞌay tammu saate gidana.
40 Yohaannisi yootidobaa siyidi Yesuusa kaallida naaꞌꞌatuppe issoy Simoon Pheexiroosa ishaa Inddiraasa.
41 I koyro ba ishaa Simoonaara gayttidi ayyo, “Nuuni Masiyara (hegaa birshshettay “Kiristtoosa” giyogaa) gayttida” yaagiis;
42 yaagidi A Yesuusakko ehiis. Yesuusi A beꞌidi ayyo hagaadan giis: “Neeni Yohaannisa naꞌaa Simoona; neeni Keefa (hegaa birshshettay “Pheexiroosa” giyogaa) geetettana.”
43 Wonttetta gallassi Yesuusi Galiilaa baanawu koyiis. Qassi I Piliphphoosaara gayttidi A, “Tana kaalla” yaagiis.
44 Piliphphoosi Inddiraasinne Pheexiroosi yiido Beetesayda katamaappe yiis.
45 Piliphphoosi Naatinaaꞌeelaara gayttidi ayyo hagaadan giis: “Nuuni Muuse Higgiyaninne Xoossay erissidobaa yootiyageeti xaafidoban abay odettido uraara gayttida; I Yooseefa naꞌaa Yesuusa, I Naazireete asa.”
46 Shin Naatinaaꞌeeli ayyo, “Naazireeteppe loꞌꞌo asi kiyana danddayii?” yaagiis. Piliphphoosi A, “Yaada beꞌa” yaagiis.
47 Yesuusi Naatinaaꞌeeli akko yiyagaa beꞌidi, “Hagee an malttee baynna tumu Israaꞌeela asa” yaagidi abaa yootiis.
48 Naatinaaꞌeeli A, “Tana awan eray?” yaagiis. Yesuusi ayyo, “Piliphphoosi nena xeesanaappe kase, neeni balasiya mittaa lanqqen deꞌishin taani nena beꞌaas” yaagiis.
49 Naatinaaꞌeeli, “Rebbi, neeni Xoossaa Naꞌaa, neeni Israaꞌeela Kawuwa” yaagiis.
50 Yesuusi ayyo hagaadan giis: “Taani nena balasiya mittaa lanqqen beꞌidoogaa yootido gishshawu ammanay? Neeni hageetuppe aaruwan malaaliyabata beꞌana.”
51 Hegaappe simmin, I ayyo hagaadan giis: “Taani intteyyo tumaa odays, saloy dooyettin Xoossaa kiitanchchati asa Naꞌaakko wodhdhishiininne pude kiyishin intte beꞌana.”
Footnotes
^ Woykko “Xoossaa mala.”
^ Mise, “he wode saꞌaa.”
^ Mise, “I saꞌan.”
^ Mise, “ashuwa shenen.”
^ Mise, “asho.”
^ Woykko “Xoossaa kehatettaynne.”
^ Woykko “Aawaa tiran.” Hegee dumma kehatettaa bessiyaba.
^ Mise, “Saꞌaa.”
