Yohaannisi Xaafidoogaa 10:1-42
10 “Taani intteyyo tumaa odays, dorssaa birddiya A penggiyara geliyogaa aggidi, harasaara giꞌꞌidi geliyagee kaysonne pangga.
2 Shin penggiyara geliyagee dorssaa henttanchchaa.
3 Penggiya naagiyagee ayyo dooyees, qassi dorssati A cenggurssaa siyoosona. I dorssatu sunttaa xeegidi eta kaalettidi kessees.
4 I eta ubbaa kessidi, etappe sinttawu bees, qassi dorssati A cenggurssaa eriyo gishshawu, A geeduwa kaalloosona.
5 Dorssati eti erenna ura cenggurssaakka erenna gishshawu, appe baqatoosonappe attin, mulekka A geeduwa kaallokkona.”
6 Yesuusi ha geeddarissuwa etayyo yootikkonne, I yootidobaa eti akeekibookkona.
7 Yaatin Yesuusi haranttuwa hagaadan giis: “Taani intteyyo tumaa odays, dorssati geliyo penggee tana.
8 Tana milatidi yiida ubbati kaysotanne panggata; shin dorssati eta siyibookkona.
9 Penggee tana; ta baggaara geliya ooninne attana, I gelananne kiyana, qassi miyobaa demmana.
10 Kaysoy wuuqqanawu, xayssanawunne woranawu yeesippe attin, harabawu yeenna. Taani eti deꞌuwa, kumetta deꞌuwa demmanaadan yaas.
11 Taani loꞌꞌo henttanchchaa; loꞌꞌo henttanchchay ba shemppuwa* dorssatu gishshawu aattidi immees.
12 Dorssati abaa gidennanne henttanchcha gidenna qaxarettida uri wanggireelloy yiyogaa beꞌidi dorssata yeggi bayidi woxxees, qassi wanggireelloy amaridaageeta oyqqin, harati piskki giidi laalettoosona;
13 ayssi giikko, I qaxarettida ura, qassi dorssatubay A qofissenna.
14 Taani loꞌꞌo henttanchchaa. Taani ta dorssata erays, ta dorssatikka tana eroosona;
15 hegeekka, Aaway tana eriyogaadaananne taani Aawaa eriyogaadaana; qassi taani ta shemppuwa* dorssatu gishshawu aattada immays.
16 “Ha birddiyan deꞌenna hara dorssatikka taayyo deꞌoosona; taani etakka kaalettana bessees, eti ta cenggurssaa siyana, qassi issi henttanchchay heemmiyo issi wude gidana.
17 Taani ta shemppuwa* zaarada ekkana mala, aattada immiyo gishshawu, Aaway tana siiqees.
18 Taani ta shemppuwa ta shenen aattada immaysippe attin, ooninne taappe wotti ekkenna. Ta shemppuwa aattada immiyogee ta maata, qassi A zaarada ekkiyogeekka ta maata. Hegaa oottanaadan ta Aaway tana azaziis.”*
19 I yaagido gishshawu, Ayhudati issoy haraa qofaa haranttuwakka phalqqidosona.
20 Etappe daroti, “A daydanttay oyqqiis, qassi I gooyees. I yootiyobaa ayssi siyeetii?” yaagidosona.
21 Harati hagaadan giidosona: “Daydantti oyqqido asi hagaa haasayenna. Daydantti qooqetu ayfiya pattana* danddayii?”
22 He wode Anjjissuwa* Baalay Yerusalaamen bonchchettees. Wodee balggo,
23 qassi Yesuusi Xoossaa garuwan Solomona Ogiya giyosan hemettees.
24 He wode Ayhudati yuuyi aadhdhidi A, “Neeni Kiristtoosakkonne nuuyyo* ayssi yootikkii?” yaagiyogaa doommidosona.
25 Yesuusi etayyo hagaadan giis: “Taani intteyyo yootaas, shin intte ammanekketa. Taani ta Aawaa sunttan oottiyo oosoti tabaa markkattoosona.
26 Shin intte ta dorssata gidenna gishshawu ammanekketa.
27 Ta dorssati ta cenggurssaa siyoosona; taani eta erays, qassi eti tana kaalloosona.
28 Taani etayyo merinaa deꞌuwa immays; eti ay wodenne xayokkona, qassi eta ooninne ta kushiyappe wotti ekkenna.
29 Ta Aaway taassi immidobay hara ubbabaappe aadhdhees, qassi eta ooninne Aawaa kushiyappe wotti ekkana danddayenna.
30 Taaninne Aaway issuwa.”
31 Ayhudati Yesuusa caddanawu haranttuwakka shuchchaa denttidosona.
32 Yesuusi etayyo hagaadan giis: “Taani ta Aaway azazin loꞌꞌo oosota darota oottada inttena bessaas. Intte he oosotuppe awugaa gaasuwan tana shuchchan caddanawu koyeetii?”
33 Ayhudati ayyo hagaadan giidi zaaridosona: “Neeni Xoossaa toochchidoogaa gaasuwanappe attin, loꞌꞌo ooso gishshawu nuuni nena shuchchan caddokko; ayssi giikko, neeni asa gidaydda, nena xoossa gaasa.”
34 Yesuusi etayyo hagaadan giis: “Intte Higgiyan, ‘Taani, “Intte xoossata”* gaas’ geetettidi xaafettibeennee?
35 Xoossay ba qaalay seeriyogeeta, ‘Intte xoossata’ yaagees; qassi Geeshsha Maxaafan ayba balinne baawa.
36 Shin Aaway taani ayyo oottanaadan dummayi wottidi* asaakko* kiittiis; yaatin, ‘Taani Xoossaa Naꞌaa’ tana giido gishshawu, intte tana, ‘Xoossaa toochchaasa’ yaageetii?
37 Taani ta Aaway koyiyobaa oottana xayikko, tana ammanoppite.
38 Shin taani oottiyoy hegeeta gidikko, intte tana ammanana xayikkokka, Aaway tanaara issuwa gidiyogaanne taani Aawaara issuwa gidiyogaa intte akeekana mala, qassi kaseppe loyttidi akeekana mala, he oosota ammanite.”
39 Yaagin, eti A haranttuwakka oyqqanawu malidosona, shin I etappe kessi ekkiis.
40 Qassi I Yorddaanoosappe hefinttan Yohaannisi koyro asaa haattan muukkiyosaa biidi yan takkiis.
41 Qassi daro asay akko yiidi hagaadan giis: “Yohaannisi issi malaatanne oottibeenna, shin Yohaannisi ha bitaniyabaa yootido ubbabay tuma.”
42 Qassi daroti yan A ammanidosona.
Footnotes
^ Woykko “deꞌuwa.”
^ Woykko “deꞌuwa.”
^ Woykko “deꞌuwa.”
^ Mise, “Taani ha azazuwa ta Aawaappe ekkaas.”
^ Mise, “dooyana.”
^ Woykko “Xoossaa Garuwa Geeshuwa (Hanuka).”
^ Woykko “nu shemppuwawu.”
^ Woykko “xoossa malata.”
^ Woykko “tana geeshshidi.”
^ Mise, “saꞌaa.”
