Yohaannisi Xaafidoogaa 11:1-57
11 Biitaaniya kataman deꞌiya Alꞌꞌaazara giyo issi bitanee harggiis; Marttanne I michchiya Mayraamakka yan deꞌoosona.
2 Ha Mayraama Godaa bolli shittuwa tigada ba huuphiya binnaanan A tohuwa quccida maccaasiyo; harggida Alꞌꞌaazari I ishaa.
3 Yaanin A michchoti, “Godawu, neeni siiqiyogee harggees” giidi Yesuusakko kiitaa yeddidosona.
4 Shin Yesuusi hegaa siyido wode hagaadan giis: “Ha harggee woriyaba gidenna, shin Xoossaa Naꞌay hegan bonchchettana mala, hegee Xoossaa bonchchissana.”
5 Yesuusi Martto, I michchiyonne Alꞌꞌaazara siiqees.
6 Gidoppe attin, I Alꞌꞌaazari harggiyogaa siyido wode, ba deꞌiyosan hara naaꞌꞌu gallassaa takkiis.
7 Hegaappe guyyiyan, I bana kaalliyageeta, “Ane guyye Yihudaa hinddite” yaagiis.
8 A kaalliyageeti ayyo hagaadan giidosona: “Rebbi, Yihudaa asay mata wode nena shuchchan caddanawu koyiis; yaatin guyye yaa buutee?”
9 Yesuusi hagaadan giidi zaariis: “Issi gallassan 12 saatee pooꞌo gidennee? Ooninne pooꞌuwan hemettikko, I asawu pooꞌiya pooꞌuwa beꞌiyo gishshawu, A aybinne xubbenna.
10 Shin ooninne qammi hemettikko, I xuman deꞌiyo gishshawu xubettees.”
11 I hegaa yooti simmidi, “Nu laggee Alꞌꞌaazari xiskkiis, shin taani A denttanawu yaa bays” yaagiis.
12 Yaagin, A kaalliyageeti ayyo, “Godawu, I xiskkiyaba gidikko, ayyo kehana” yaagidosona.
13 Gidikkonne, Yesuusi Alꞌꞌaazari hayqqidoogaa yootiis. Shin eti I shemppanawu xiskkiyogaa yootiis giidi qoppidosona.
14 Yaanin, Yesuusi etayyo hagaadan giidi geeshshidi yootiis: “Alꞌꞌaazari hayqqiis,
15 qassi taani yan deꞌabeenna gishshawu ufayttays; ayssi giikko, taani oottanabay intte ammanuwa minttana. Ane akko hinddite.”
16 Yaagin, Menttiya giyo Toomaasi Yesuusa kaalliya haratuyyo, “Nuuni aara hayqqana mala hinddite” yaagiis.
17 Yesuusi yaa gakkido wode, Alꞌꞌaazari oyddu gallassaa duufuwan takkidoogaa beꞌiis.
18 Biitaanee Yerusalaame matan, yaappe heezzu kilo meetire* gidiyasan deꞌees.
19 Qassi daro Ayhudati Marttinne Mayraami ishay hayqqido gishshawu eta minttettanawu yiidosona.
20 Martta Yesuusi yiyogaa siyada aara gayttanawu baasu; shin Mayraama son uttaasu.
21 He wode Martta Yesuusayyo hagaadan gaasu: “Godawu, neeni hagan deꞌidaba gidiyakko, ta ishay hayqqenna.
22 Shin neeni Xoossaa oychchiyobaa aybanne Xoossay neeyyo immanaagaa taani haꞌꞌikka erays.”
23 Yesuusi iyyo, “Ne ishay hayquwappe denddana” yaagiis.
24 Martta ayyo, “I wurssetta gallassi hayquwappe denddanaagaa taani erays” yaagaasu.
25 Yesuusi iyyo hagaadan giis: “Asay ta baggaara denddees, qassi ta baggaara deꞌees. Tana ammaniya uri hayqqikkokka, zaarettidi deꞌuwa demmana;
26 qassi paxa deꞌiyanne tana ammaniya ubbay mule hayqqenna. Neeni hegaa ammanay?”
27 A Yesuusayyo, “Ee, Godawu, neeni asaakko* yaana geetettida, Xoossaa Naꞌaa, Kiristtoosa gidiyogaa taani ammanays” yaagaasu.
28 A hegaa ga simmada, ba michchiyo Mayraamo xeeganawu baasu; yaatada asi siyennan iyyo, “Asttamaaree yiis, qassi nena xeegees” yaagaasu.
29 Mayraama hegaa siyosaara denddada akko baasu.
30 Yesuusi he wode katamaa geliichchibeenna, shin Marttiira gayttidosan deꞌees.
31 Mayraamo minttettiiddi iira son deꞌiya Ayhudati A eesuwan denddada biyogaa beꞌido gishshawu, yeekkanawu duufoy deꞌiyosaa bawusu gi qoppidi, O kaallidosona.
32 Mayraama Yesuusi deꞌiyosaa gakkido wode, A beꞌada A tohuwan kunddaasu, yaatada ayyo, “Godawu, neeni hagan deꞌidaba gidiyakko, ta ishay hayqqenna” yaagaasu.
33 Yesuusi A yeekkiyogaanne iira yiida Ayhudatikka yeekkiyogaa beꞌido wode, gurumꞌꞌettiis,* qassi gomppan mishettiis.
34 Yesuusi, “A awan wottidetii?” yaagiis. Eti A, “Godawu, beꞌanawu hindda” yaagidosona.
35 Yesuusi afuxxiis.
36 He wode Ayhudati, “I A ay keena siiqiyakko beꞌite!” yaagidosona.
37 Shin etappe issoti issoti, “Qooqiya ayfiya pattida* ha bitanee hagee hayqqennaadan oottana danddayennee?” yaagidosona.
38 Hegaappe simmin, Yesuusi haranttuwakka gurumꞌꞌetti simmidi, duufoy deꞌiyosaa biis. Duufoy gonggolo, qassi geliyosay wogga shuchchan gorddettiis.
39 Yesuusi, “Shuchchaa denttite” yaagiis. Hayqqidaagaa michchiya Martta ayyo, “Godawu, I hayqqoosappe oyddu gallassa gidido gishshawu, hannoode peenotana” yaagaasu.
40 Yesuusi iyyo, “Neeni ammanikko Xoossaa bonchchuwa beꞌanaagaa taani neeyyo yootabeykkinaa?” yaagiis.
41 Qassi eti shuchchaa denttidosona. Yaatin, Yesuusi saluwa xeelliiddi hagaadan giis: “Aawawu, neeni ta woosaa siyido gishshawu nena galatays.
42 Neeni ta woosaa ubbatoo siyiyogaa taani erays; shin hagan eqqida asay tana neeni kiittidoogaa ammanana mala, hagaa eta gishshawu gaas.”
43 I hegaa gi simmidi, ba qaalaa xoqqu oottidi, “Alꞌꞌaazaraa, haa kiya!” yaagiis.
44 Hayqqida bitanee A tohoti, A kushetinne A somꞌꞌoy carqqiyan xaaxetti uttidaashin gaxi kiyiis. Yesuusi eta, “I hemettanaadan birshshite” yaagiis.
45 Hegaa gishshawu, Mayraamikko yiidi I oottidobaa beꞌida Ayhudatuppe daroti A ammanidosona.
46 Shin etappe amaridaageeti Parisaawetukko biidi, Yesuusi oottidobaa etayyo odidosona.
47 Hegaa gishshawu, waanna kahinetinne Parisaaweti Sanhedirine shilootaa shiishshidi hagaadan giidosona: “Ha bitanee daro malaatata oottiyo gishshawu, nuuni ay oottin kehee?
48 Nuuni I hagaadan hanishin aggi bayikko, asay ubbay A ammanana, qassi Roomati yiidi nu sohuwanne* nu deriya wotti ekkana.”
49 Shin etappe issoy, he laytti gita kahinee, Qayaafi etayyo hagaadan giis: “Intte aybakka erekketa,
50 deree muleera xayiyogaappe asaa gishshawu issi asi hayqqiyogee inttena goꞌꞌiyogaa intte qoppibeekketa.”
51 Gidoppe attin, hegaa I baappe yootibeenna, shin I he laytti gita kahine gidiyo gishshawu, Yesuusi deriya gishshaa hayqqanaagaa I yootanaadan Xoossay oottiis.
52 I deriya xallaassa gidennan, Xoossaa naati laalettidaageeta shiishshidi issuwa oottanawu hayqqana.
53 Qassi he gallassappe doommidi eti A woranawu maqettidosona.
54 Hegaa gishshawu, Yesuusi asay beꞌiyosan hemettiyogaa aggiis, shin yaappe denddidi bazzuwa matan deꞌiya Efireema giyo katamaa biidi, bana kaalliyageetuura yan takkiis.
55 He wode Ayhudatu Paasikay matattiis, qassi he biittan deꞌiya daro asati Paasikaa baalaappe kase Muuse Higgee yootiyogaadan banttana geeshshanawu Yerusalaame biidosona.
56 Eti Yesuusa koyidosona, qassi Xoossaa garuwa giddon eqqidi issoy issuwayyo, “Intteyyo ay milatii? I ha baalaa yeennee?” yaagidosona.
57 Shin waanna kahinetinne Parisaaweti Yesuusa eti oyqqana mala, ooninne I deꞌiyosaa erikko, yootana koshshees giidi azazidosona.
Footnotes
^ Mise, “15 istadiya.”
^ Mise, “saꞌaa.”
^ Mise, “ba ayyaanan gurumꞌꞌettiis.”
^ Mise, “dooyida.”
^ Hegeekka, Xoossaa garuwa.
