Yohaannisi Xaafidoogaa 12:1-50
12 Yesuusi Paasikawu usuppun gallassay attidaashin, I hayquwappe denttido Alꞌꞌaazari deꞌiyo Biitaaniya katamaa gakkiis.
2 Yaatin, eti ayyo kahuwa kattidosona, qassi Martta etayyo qumaa aattawusu, shin Alꞌꞌaazari aara qumaa miyageetuppe issuwa.
3 He wode, Mayraama bagga litiro gidiya, walahi baynna keehi alꞌꞌo narddoose shittuwa ekkada Yesuusa tohuwan tigaasu, yaatada ba huuphiya binnaanan A tohuwa quccaasu. Shittoy he keettan muleera sawuwa tonggu giis.
4 Shin A kaalliyageetuppe issoy, mata wode A aatti immana Asqqorootu Yihuday hagaadan giis:
5 “Ha shittoy 300 dinaariyan bayzettin, miishshay hiyyeesatuyyo ayssi imettennee?”
6 Shin I kayso gidiyo gishshawu hegaa giisippe attin, hiyyeesatuyyo qoppidi gibeenna; miishshaa saaxiniya oyqqiyay A, qassi hegan wottido miishshaappe wuuqqees.
7 Yesuusi hagaadan giis: “A taani moogettana gallassaa qoppada hagaa oottana mala, O wayssoppite.
8 Ayssi giikko, hiyyeesati inttenaara ubbatoo deꞌoosona, shin taani hagan inttenaara ubbatoo deꞌikke.”
9 Daro Ayhudati Yesuusi yan deꞌiyogaa eridosona; yaatiyo gishshawu, eti Yesuusa beꞌana xalaalaassa gidennan, I hayquwappe denttido Alꞌꞌaazarakka beꞌanawu yaa biidosona.
10 Waanna kahineti he wode Alꞌꞌaazarakka woranawu maqettidosona;
11 ayssi giikko, daro Ayhudati yaa biidi, Alꞌꞌaazari hanidobaa beꞌidi Yesuusa ammanoosona.
12 Wonttetta gallassi, baalawu yiida daro asay Yesuusi Yerusalaame yiyogaa siyiis.
13 Hegaa gishshawu, eti zambbaa tashiya oyqqidi aara gayttanawu kiyidosona; yaatidi bantta qaalaa xoqqu oottidi, “Xoossawu, nuuni nena woossoos, A ashsha! Israaꞌeela Kawoy, Yihoowa sunttan yiyagee anjjettidaagaa!” yaagidosona.
14 Yesuusi hare maraa demmidi, kasetidi xaafettidaagaadan A toggiis; he xaafettidaagee hagaadan gees:
15 “Xiyone naꞌee, yayyoppa. Ne kawoy hare maraa toggidi yees.”
16 Yesuusa kaalliyageeti koyro hageeta akeekibookkona, shin Yesuusawu xoqqa maatay imettido wode, eti oottidobay kaseti xaafettidaagaa mala gidiyogaa hassayidosona.
17 Duufuwappe gaxi kiyanaadan Alꞌꞌaazara Yesuusi xeegiyo wodenne hayquwappe A denttiyo wode aara deꞌiya cora asay hanidabaa darotoo asaayyo yootiis.
18 Cora asay aara gayttanawu biidoy I he malaataa oottidoogaa siyido gishshataassa.
19 Hegaa gishshawu, Parisaaweti issoy issuwawu, “Nuuyyo mule hanibeennaagaa beꞌeetii? Kumetta deree* A kaallees” yaagidosona.
20 He wode, goynuwawu baalaa sohuwa yiida asaa giddon amarida Giriiketi deꞌoosona.
21 He asati Galiilan deꞌiya Beetesaydappe yiida Piliphphoosakko shiiqidi, “Godawu, nuuni Yesuusa beꞌanawu koyoos” yaagidi A oychchidosona.
22 Piliphphoosi biidi Inddiraasawu yootiis. Inddiraasinne Piliphphoosi biidi Yesuusawu yootidosona.
23 Shin Yesuusi etayyo hagaadan giis: “Asa Naꞌay bonchchettiyo saatee gakkiis.
24 Taani intteyyo tumaa odays, gisttiya ayfee saꞌan wodhdhidi hayqqana xayikko, issi ayfe gididi attees, shin hayqqikko, daro ayfiya ayfees.
25 Ba shemppuwa* siiqiya ooninne A xayssees, shin haꞌꞌi* ba shemppuwa* ixxiya ooninne merinaa deꞌuwa demmanawu A naagees.
26 Ooninne taayyo haggaazanawu koyikko, tana kaallo, qassi taayyo haggaaziya urikka taani deꞌiyosan deꞌana. Ooninne taayyo haggaazanawu koyikko, Aaway A anjjana.
27 Taani* keehi hirggays, qassi woygoo? Aawawu, ha waayiya wodiyappe tana ashsha. Shin ha waayiya wodee yiyogee attenna; taani saꞌaa yiidoy hegaassa.
28 Aawawu, ne sunttaa bonchcha.” Yaagin, “Taani bonchchaas, qassi zaarettadakka bonchchana” yaagiya qaalay saluwappe siyettiis.
29 Yan eqqida asay hegaa siyidi, daday wodhdhiis giyogaa doommiis. Harati qassi, “Kiitanchchay A haasayissiis” yaagidosona.
30 Yesuusi hagaadan giis: “Ha qaalay intte goꞌettanaadan siyettiisippe attin, taani goꞌettanaadan siyettibeenna.
31 Xoossay ha saꞌaa* pirddiyo wodee gakkiis; ha saꞌaa haariyagee haꞌꞌi pixinggettana.
32 Shin tana saꞌaappe pude denttiyo* wode, taani ubba qommo asaa taakko shiishshana.”
33 I mati ay mala hayqo hayqqanaakko qonccissanawu hegaa yootiis.
34 He wode asay ayyo hagaadan giis: “Higgee Kiristtoosi merinawu deꞌanaagaa yootees. Neeni waanada asa Naꞌaa saꞌaappe pude denttiyogee* attenna gay? Ha asa Naꞌay oonee?”
35 Yaagin, Yesuusi etayyo hagaadan giis: “Hagaappe guyyiyan pooꞌoy inttenaara amarida wodiya takkana. Xumay inttena diggenna mala, pooꞌoy deꞌishin hemettite; xuman hemettiya ooninne awa biyakkokka erenna.
36 Pooꞌoy deꞌiyo wode, intte pooꞌuwa naata gidana mala, pooꞌuwa ammanite.”
Yesuusi hageeta yooti simmidi biis, qassi eta ayfiyappe geemmiis.
37 I eta sinttan daro malaatata oottidaba gidikkokka, eti A ammanibookkona;
38 Xoossay erissidobaa yootiya Isiyasi odidobay polettana mala hegee haniis; I hagaadan giis: “Yihoowaa, nuuni yootidobaa* ooni ammanidee? Qassi Yihoowa wolqqay* oossi qonccidee?”
39 Eti ayssi ammanana danddayibeennaakko Isiyasi harasan hagaadan giis:
40 “Eti bantta ayfiyan beꞌenna mala, qassi bantta wozanan akeekenna malanne taani pattanaadan taakko simmenna mala, I eta ayfiya qooqissiis, qassi eta wozanaa gooziis.”
41 Isiyasi Kiristtoosa bonchchuwa beꞌido gishshawu, abaa hegaadan yootiis.
42 Gidikkonne, asaa kaalettiya darotikka A ammanoosona, shin Parisaawetuyyo yayyidosona; hegaa gishshawu, asay eta bohenna mala,* eti Kiristtoosa ammaniyogaa oossinne yootokkona;
43 ayssi giikko, eti banttanan asay ufayttiyogaa* Xoossay ufayttiyogaappe* aaruwan dosoosona.
44 Shin, Yesuusi ba qaalaa xoqqu oottidi hagaadan giis: “Tana ammaniya ooninne tana ammaniyogaa xalla gidennan, tana kiittidaagaakka ammanees;
45 qassi tana beꞌiya ooninne tana kiittidaagaakka beꞌees.
46 Tana ammaniya ubbay xuman deꞌenna mala, taani asaa giddon* pooꞌiya pooꞌodan yaas.
47 Shin ooninne taani yootiyobaa siyidi hegaa naagana xayikko, taani A bolli pirddikke; ayssi giikko, taani asaa* ashshanawu yaasippe attin, eta* bolli pirddanawu yabeykke.
48 Tananne taani yootiyobaa ekkenna ura bolli pirddiyagee deꞌees. Taani yootidobay wurssetta gallassi A bolli pirddana.
49 Ayssi giikko, taani taappe yootabeykke, shin taani ay yootanaakkonne ay tamaarissanaakko tana kiittida Aaway tana azaziis.
50 Qassi A azazoy merinaa deꞌuwa demissiyogaa taani erays. Hegaa gishshawu, taani yootiyo ubbabaa ta Aaway taayyo odidoogaadan yootays.”
Footnotes
^ Mise, “saꞌay.”
^ Woykko “deꞌuwa.”
^ Mise, “ha saꞌan.”
^ Woykko “deꞌuwa.”
^ Woykko “Ta shemppuwan.”
^ Woykko “Xoossaappe haakkida asaa.”
^ Hegeekka, mittan kaqettiyogaa.
^ Hegeekka, mittan kaqettiyogaa.
^ Woykko “nuuppe siyidobaa.”
^ Mise, “kushee.”
^ Woykko “shiiqo keettaappe yedettenna mala.”
^ Mise, “asan bonchchettiyogaa.”
^ Mise, “Xoossan bonchchettiyogaappe.”
^ Mise, “saꞌan.”
^ Mise, “saꞌaa.”
^ Mise, “saꞌaa.”
