Yohaannisi Xaafidoogaa 13:1-38
13 Paasikaa baalaappe kase, Yesuusi saꞌaappe ba Aawaakko biyo wodee gakkidoogaa eriis. I bana kaalliya saꞌan deꞌiyageeta siiqiyo gishshawu, wurssettay gakkanaashin eta siiqiis.
2 He wode eti kahuwa moosona, qassi Yesuusa aattidi immana mala, Simoona naꞌaa Asqqorootu Yihudaa wozanan Dabloosi qofaa wottiis.
3 Qassi Yesuusi Aaway ubbabaa A kushiyan wottidoogaa, I Xoossaa matappe yiidoogaanne Xoossaakko biyogaa erido gishshawu,
4 kahuwa miyosaappe denddidi, bollaara maayidobaa qaari wottiis. Qassi pooxaa ekkidi ba xeessan xaaxiis.*
5 Hegaappe simmin, I keriyan haattaa tigidi bana kaalliyageetu tohuwa meecciyogaanne ba xeessan xaaxido* pooxan eta tohuwa qucciyogaa doommiis.
6 I Simoon Pheexiroosakko gakkido wode, Pheexiroosi A, “Godawu, neeni ta tohuwa meeccana hanay?” yaagiis.
7 Yesuusi ayyo, “Taani oottiyobaa neeni haꞌꞌi akeekakka, shin neeni guyyeppe akeekana” yaagiis.
8 Pheexiroosi A, “Taani ta tohuwa nena mule meecissikke” yaagiis. Yesuusi ayyo, “Taani nena meeccana xayikko, nena tanaara gattiyabi baawa” yaagiis.
9 Simoon Pheexiroosi A, “Godawu, ta tohuwa xalla gidennan, ta kushetakka ta huuphiyakka meecca” yaagiis.
10 Yesuusi ayyo hagaadan giis: “Bollaa meecettida ura kumetta bollay geeshsha; yaatiyo gishshawu, I tohoppe harabaa meecettana koshshenna. Qassi ubbata gidana xayikkonne, intte geeshsha.”
11 Ayssi giikko, I bana aattidi immana ura erees. I, “Geeshshati ubbata gidekketa” yaagidoy hegaassa.
12 I eta tohuwa meecci simmidi, ba maayuwa maayiis, yaatidi zaarettidi xarapheezaa zemppi uttidi etayyo hagaadan giis: “Taani intteyyo oottidobaa akeekidetii?
13 Intte tana ‘Asttamaariya,’ qassi ‘Godaa’ yaageeta. Taani Asttamaare, qassi Goda gidiyo gishshawu, intte hegaa giyogee bessiyaba.
14 Hegaa gishshawu, taani Goday, qassi Asttamaaree intte tohuwa meeccido gishshawu, inttekka issoy issuwa tohuwa meeccana koshshees.
15 Ayssi giikko, taani intteyyo oottidoogaadan inttekka oottana mala, taani intteyyo leemiso gidaas.
16 Taani intteyyo tumaa odays, ayllee ba godaappe aadhdhenna, qassi kiitettida uri A kiittidaagaappe aadhdhenna.
17 Intte hageeta eriyo gishshawu, oottikko ufaytteeta.
18 Taani haꞌꞌi yootiyobay inttebaa ubbaabaa gidenna; taani dooridoogeeta erays. Shin Geeshsha Maxaafay, ‘Tanaara miyagee taayyo morkke gidiis’* giyogee polettana mala hagee haniis.
19 Haniyo wode he izaawu tana gidiyogaa intte ammanana mala, haꞌꞌi hananaappe kase taani intteyyo yootays.
20 Taani intteyyo tumaa odays, taani kiittiyo ura mokkiya ooninne tanakka mokkees, qassi tana mokkiya ooninne tana kiittidaagaakka mokkees.”
21 Yesuusi hageeta yooti simmidi shabbirettiis, qassi, “Taani intteyyo tumaa odays, intteppe issoy tana aattidi immana” yaagidi geeshshidi yootiis.
22 I obaa hegaadan giidaakko Yesuusa kaalliyageetuyyo xiphphi gin, eti issoy issuwa xeelliyogaa doommidosona.
23 Yesuusa kaalliyageetuppe issoy, I siiqiyogee, Yesuusa matan* zemppi uttiis.
24 Hegaa gishshawu, Simoon Pheexiroosi A simꞌꞌidi, “I obaa yootiyakko nuussi oda” yaagiis.
25 Yaatin, hankkoy Yesuusa tiraakko shiiqi zemppidi A, “Godawu, I oonee?” yaagiis.
26 Yesuusi, “Taani oyttan usttaa tushkkada immana uri A” yaagidi zaariis. I oyttan usttaa tushkki simmidi, Simoona naꞌaa Asqqorootu Yihudawu immiis.
27 Yihuday oyttaa ekki simmin, Seexaanay A wozanan geliis. Yaatin Yesuusi A, “Neeni oottiyobaa gamꞌꞌennan sohuwara ootta” yaagiis.
28 Shin I hegaa ayyo giidoy aybissakko, xarapheezaa zemppi uttidaageetuppe issoynne eribeenna.
29 Issoti issoti Yihuday miishshaa saaxiniya oyqqiyo gishshawu, Yesuusi A, “Nuuyyo baalawu koshshiyabaa shamma,” woykko, “Amarida miishshaa hiyyeesatuyyo imma” yaagiis giidi qoppidosona.
30 Yaatin, I he oyttaa ekki simmidi sohuwara kiyidi biis. Qassi he wode saꞌay qamma.
31 Hegaa gishshawu, I bi simmin, Yesuusi hagaadan giis: “Haꞌꞌi asa Naꞌay bonchchettiis, qassi Xoossay an bonchchettiis.
32 Xoossay A bonchchana, qassi Xoossay A sohuwara bonchchana.
33 Naatoo,* taani inttenaara guuttaa takkana. Intte tana koyana, qassi taani Ayhudatuyyo giidoogaadan, haꞌꞌi intteyyokka, ‘Taani biyosaa intte baana danddayekketa’ yaagays.
34 Taani inttena ooratta azazuwa azazays: Issoy issuwa siiqite. Taani inttena siiqidoogaadan inttekka issoy issuwa siiqite.
35 Intte issoy issuwa siiqiyogan, asay ubbay intte tana kaalliyageeta gidiyogaa erana.”
36 Simoon Pheexiroosi A, “Godawu, neeni awa bay?” yaagiis. Yesuusi, “Neeni haꞌꞌi tana kaallada taani biyosaa baana danddayakka, shin neeni guyyeppe kaallana” yaagidi zaariis.
37 Pheexiroosi A, “Godawu, taani haꞌꞌi nena kaallana danddayennay aybissee? Taani ne gishshawu ta shemppuwa* aattada immana” yaagiis.
38 Yesuusi hagaadan giis: “Neeni ta gishshawu ne shemppuwa* aattada immanee? Taani neeyyo tumaa odays, kuttoy waassana gakkanaashin, neeni heezzutoo tana erikke gaana.”
Footnotes
^ Woykko “dancciis.”
^ Woykko “danccido.”
^ Mise, “ta bolli ba ginddiya denttiis.”
^ Mise, “tiran.”
^ Mise, “Guutta naatoo.”
^ Woykko “deꞌuwa.”
^ Woykko “deꞌuwa.”
