Yohaannisi Xaafidoogaa 14:1-31
14 “Hirggoppite. Xoossaa ammanite; tanakka ammanite.
2 Ta Aawaa keettan deꞌiyo daro sohoti deꞌoosona. Taani intteyyo sohuwa giigissanawu biyo gishshawu, hegaadaana gidennaakko taani intteyyo yootana.
3 Qassi, taani biyo wode sohuwa giigissada, taani deꞌiyo sohuwan inttekka deꞌana mala, simma yaada inttena ekkada baana.
4 Qassi taani awa biyakko ogiya intte ereeta.”
5 Toomaasi A, “Godawu, neeni awa biyakko nuuni erokko. Ogiya nuuni waati erana danddayiyo?” yaagiis.
6 Yesuusi ayyo hagaadan giis: “Ogee, tumaynne deꞌoy tana. Ta baggaara gidana xayikko, ooninne Aawaakko beenna.
7 Intte tana erikko, ta Aawaakka erana; ha saatiyappe doommidi intte A ereeta, qassi intte A beꞌideta.”
8 Piliphphoosi A, “Godawu, nuna Aawaa bessa; hegee nuuyyo gidana” yaagiis.
9 Yesuusi ayyo hagaadan giis: “Piliphphoosaa, taani inttenaara hagaa keena adussa wodiya deꞌinkka, neeni tana erikkii? Tana beꞌida ooninne Aawaakka beꞌiis. Neeni waanada, ‘Nuna Aawaa bessa’ yaagay?
10 Taani Aawaara issuwa gidiyogaa, qassi Aaway tanaara issuwa gidiyogaa ammanikkii? Taani intteyyo yootiyobata taappe yootikke, shin ba oosuwa oottiiddi deꞌiyagee tanaara issuwa gidiya Aawaa.
11 Taani Aawaara issuwa, qassi Aaway tanaara issuwa gidiyogaa taani yootiyo wode ammanite; hankkoode, taani oottido oosotu gishshawu ammanite.
12 Taani intteyyo tumaa odays, taani oottiyo oosota tana ammaniya oonikka oottana; qassi taani Aawaakko biyo gishshawu, I hegeetuppe aadhdhiya oosota oottana.
13 Qassi Naꞌaappe denddidaagan Aaway bonchchettana mala, intte ta sunttan oychchiyoba aybanne taani oottana.
14 Intte ta sunttan ay oychchikkokka, taani oottana.
15 “Intte tana siiqikko, ta azazota naagana.
16 Taani Aawaa oychchana, qassi inttenaara merinawu deꞌana mala, hara maaduwa* I intteyyo immana;
17 hegee ha saꞌaa asay beꞌenna gishshawunne erenna gishshawu, demmana danddayenna tumaa ayyaanaa. He ayyaanay inttenaara deꞌiyo gishshawunne inttenan deꞌiyo gishshawu, intte A ereeta.
18 Taani inttena xonꞌꞌa* agga bayikke. Taani inttekko yaana.
19 Guutta wodeppe guyyiyan, ha saꞌaa asay tana mule beꞌenna, shin intte beꞌana; ayssi giikko, taani deꞌays, qassi inttekka deꞌana.
20 Taani ta Aawaara issuwa gidiyogaa, qassi intte tanaara issuwa gidiyogaanne taani inttenaara issuwa gidiyogaa intte he gallassi erana.
21 Tana siiqiyagee ta azazota ekkiyanne azazettiya ura. Qassi tana siiqiya ura ta Aaway siiqana; hegaa bollikka, taani A siiqananne I tana geeshshi eranaadan oottana.”
22 Yihuday (Asqqorootu Yihudaa gidenna), “Godawu, neeni aybi kiyin ha saꞌaa asaa aggada nuuni nena geeshshi eranaadan oottanawu koyay?” yaagiis.
23 Yesuusi ayyo hagaadan giidi zaariis: “Tana siiqiya ooninne ta yootiyo qaalaa naagana, qassi ta Aaway A siiqana; nuuni akko yiidi aara deꞌana.
24 Tana siiqenna uri taani yootiyo qaalaa naagenna. Intte siyiyo qaalay tana kiittida Aawaabaappe attin, tabaa gidenna.
25 “Taani inttenaara deꞌiyo wode hageeta intteyyo yootaas.
26 Shin Aaway ta sunttan kiittana, maaddiya geeshsha ayyaanay inttena ubbabaa tamaarissananne taani intteyyo yootido ubbabaa hassayissana.
27 Taani intteyyo immiyo sarotettaa inttenaara wottana. Taani immiyo sarotettay asay immiyogaa mala gidenna. Intte wozanay shabbirettanaadan woy hirgganaadan oottoppite.
28 Taani intteyyo, ‘Taani bays, qassi simmada inttekko yaana’ giidoogaa siyideta. Intte tumuppe tana siiqiyaba gidikko, Aaway taappe aadhdhiyo gishshawu, taani Aawaakko biyogee inttena ufayssana.
29 Haniyo wode intte ammanana mala, hananaappe kase haꞌꞌi taani intteyyo yootaas.
30 Ha saꞌaa asaa haariyagee yiyo gishshawu, taani inttenaara daro haasayikke, qassi ta bolli ayyo maati* baawa.
31 Shin asay taani Aawaa siiqiyogaa eranaadan taani Aaway azazidoogaadan oottays. Denddite, hagaappe boos.
Footnotes
^ Woykko “maaddiyagaa, minttettiyagaa.” Ha qaalaanne A qonccissiya sunttaasotu mattumay Giriikettuwan attuma. Griikettuwan attuma woy macca gidenna wolqqaa, geeshsha ayyaanaa Yesuusi ha sohuwan asatto qonccissiis.
^ Woykko “aawaynne aayyiya baynna naꞌadan.”
^ Woykko “wolqqi.”
