Yohaannisi Xaafidoogaa 15:1-27
15 “Taani tumu woyniya turaa, qassi diccanaadan maaddiyagee ta Aawaa.
2 Ayfiya ayfenna tashe ubbaa I qanxxi olees, qassi ayfiya tashe ubbay loytti ayfanaadan I karees.*
3 Taani intteyyo yootido qaalaappe denddidaagan intte geeshsha.
4 Tanaara issuwa gididi deꞌite; taanikka inttenaara issuwa gidada deꞌana. Woyniya tashee turaa bolli deꞌana xayikko ayfiya ayfennaagaadan, inttekka tanaara issuwa gididi deꞌana xayikko ayfana danddayekketa.
5 Taani woyniya turaa, intte qassi woyniya tasheta. Tanaara issuwa gididi deꞌiyanne taani aara issuwa gidido uri daro ayfiya ayfees; ayssi giikko, taani baynnan intte aybanne oottana danddayekketa.
6 Ooninne tanaara issuwa gididi deꞌana xayikko, I olin meliya tashe mala gidana. Qassi asay shiishshidi taman olin he tasheti xuugettoosona.
7 Intte tanaara issuwa gididi deꞌikko, qassi taani yootidobaa intte wozanan wottikko, intte koyiyobaa aybakka oychchin hegee intteyyo imettana.
8 Intte daro ayfiya ayfidi tana kaalliyageeta gidiyogaa bessiyo wode, ta Aaway bonchchettees.
9 Aaway tana siiqiyogaadan, taanikka inttena siiqays; ta siiquwan deꞌite.
10 Taani Aawaa azazota naagada A siiquwan deꞌiyogaadan, intte ta azazota naagikko, ta siiquwan deꞌana.
11 “Intte taagaadan ufayttana malanne intte ufayssay kumetta gidana mala, taani intteyyo hageeta yootaas.
12 Ta azazoy hagaa: Taani inttena siiqiyogaadan issoy issuwa siiqite.
13 Issi uri ba laggetu gishshawu ba shemppuwa* aatti immiyogaappe aadhdhiya siiqoy baawa.
14 Taani azaziyobaa oottikko, intte ta laggeta.
15 Ayllee ba goday oottiyobaa erenna gishshawu, taani inttena aylleta giikke. Shin ta Aaway taassi odido ubbabata taani intteyyo yootido gishshawu, inttena laggeta gaas.
16 Taani inttena dooraasippe attin, intte tana dooribeekketa, qassi intte biidi, deꞌi bayiya afiya ayfanaadan taani inttena sunttaas; yaatikko, intte ta sunttan Aawaa ay oychchikkokka, I intteyyo immana.
17 “Intte issoy issuwa siiqana mala, taani inttena hageeta azazays.
18 Ha saꞌaa asay inttena ixxikko, intteppe kase tana ixxidoogaa ereeta.
19 Intte ha saꞌaa asaa mala gidiyakko, ha saꞌaa asay inttena dosana. Shin taani inttena ha saꞌaa asaa giddoppe dooraasippe attin, intte eta mala gidenna gishshawu, eti inttena ixxoosona.
20 Taani yootidobaa ubbatoo hassayite: Ayllee ba godaappe aadhdhenna. Eti tana naaqqidaba gidikko, inttenakka naaqqana; eti taani yootidobaa naagiyakko, intte yootidobaakka naagana.
21 Shin eti tana Kiittidaagaa erenna gishshawu, intte tana kaalliyogaappe denddidaagan ha ubbabaa eti intte bolli oottana.
22 Taani yaada etayyo yootabeennaba gidiyakko, etawu nagara gidenna. Shin haꞌꞌi bantta nagaraa gaasoyiyobi etayyo baawa.
23 Tana ixxiya ooninne ta Aawaakka ixxees.
24 Hara ooninne oottibeenna oosota taani eta giddon oottennaakko, eti mooranchcha gidokkona, shin haꞌꞌi eti tana beꞌidosona, qassi tana ixxidosona; eti ta Aawaakka ixxidosona.
25 Shin eta Higgiyan, ‘Eti tana gaasoy baynnan ixxidosona’ geetettidi xaafettidaagee polettana mala hagee haniis.
26 Inttena maaddana geeshsha ayyaanay yiyo wode tabaa intteyyo markkattana; he ayyaanay ta Aaway yeddiyonne tumaa tamaarissiya ayyaanaa;
27 qassi doomettaappekka intte tanaara deꞌiyo gishshawu, inttekka tabaa markkattana bessees.
