Yohaannisi Xaafidoogaa 16:1-33
16 “Intte handdaraashenna mala taani hageeta yootaas.
2 Asay inttena bohana.* Inttena woriya ubbay yaatiyogan Xoossawu haggaazays giidi qoppiyo wodee yaana.
3 Shin eti ta Aawaakka tanakka erenna gishshawu hegaadan oottana.
4 Gidikkonne, hageeti haniyo wodee gakkin, taani hagaa yootidoogaa intte hassayana mala hageeta intteyyo yootaas.
“Taani inttenaara deꞌiyo gishshawu, hageeta kase intteyyo yootabeykke.
5 Gidoppe attin, taani tana kiittidaagaakko haꞌꞌi bays; shin intte giddoppe ooninne tana, ‘Awa bay?’ giidi oychchibeenna.
6 Gidikkokka, taani hageeta intteyyo yootido gishshawu, intte keehi kayyottideta.
7 Gidoppe attin, taani intteyyo tumaa odays, taani intte goꞌettana mala bays. Ayssi giikko, taani baana xayikko inttena maaddiya geeshsha ayyaanay yeenna; shin taani biikko, A intteyyo yeddana.
8 Hegaa bollikka, I yiyo wode, nagaray aybakko, xillotettay aybakko, qassi Xoossaa pirdday aybakko asawu ubbawu ammanttiya naqaashaa bessana.
9 Asay tana ammanenna gishshawu, I eta nagarawu ammanttiya naqaashaa bessana.
10 Taani Aawaakko biyo gishshawu, taani xillobaa oottiyogaa ammanttiya naqaashaa I asaa bessana.
11 Xoossay ha saꞌaa haariyagaa bolli pirddido gishshawu, Xoossay O bolli pirddiyakkokka ammanttiya naqaashaa I bessana.
12 “Taani intteyyo yootiyo darobati deꞌoosona, shin intte hegeeta haꞌꞌi akeekanawu danddayekketa.
13 Shin maaddiya tumaa ayyaanay yiyo wode, intte tumaa wurssi akeekanaadan kaalettana; ayssi giikko, I siyiyobaa haasayeesippe attin, ba shenen haasayenna, qassi hananabata I intteyyo qonccissana.
14 I taappe ekkidobaa intteyyo qonccissana; hegaa gishshawu, I tana bonchchana.
15 Aawaayyo deꞌiya ubbabay tabaa. Taani taappe ekkidobaa qonccissees giidoy hegaassa.
16 Guutta wodeppe guyyiyan intte tana beꞌekketa, qassikka, guutta wodeppe guyyiyan intte tana beꞌana.”
17 A kaalliyageetuppe issoti issoti he wode hagaadan giidosona: “I nuuyyo, ‘Guutta wodeppe guyyiyan intte tana beꞌekketa, qassikka, guutta wodeppe guyyiyan intte tana beꞌana,’ qassi, ‘Taani Aawaakko biyo gishshawu’ yaagidobay woygiyogee?”
18 Qassikka eti, “I, ‘guutta wode’ yaagidobay woygiyogee? I yootiyobay aybakko nuuni erokko” yaagidosona.
19 Yesuusi eti A oychchanawu koyidoogaa eriis; hegaa gishshawu I etayyo hagaadan giis: “Taani, ‘Guutta wodeppe guyyiyan intte tana beꞌekketa, qassikka, guutta wodeppe guyyiyan intte tana beꞌana’ yaagido gishshawu issoy issuwa oychcheetii?
20 Taani intteyyo tumaa odays, intte yeekkananne zilaalana, shin ha saꞌaa asay ufayttana; intte kayyottana, shin kayyottiyogaa aggidi ufayttana.
21 Issi maccaasiya yelanawu wodee gakkin, O leessoy oyqqees,* shin A yeliyo wode, naꞌi yelettidoogaa beꞌada ufayttiyo gishshawu, waayyiya hassayukku.
22 Inttekka haꞌꞌi kayyotteeta, shin taani inttena zaarettada beꞌana; yaatin, intte keehi ufayttana, qassi intte ufayssaa ooninne intteppe wotti ekkenna.
23 He gallassi intte tana aybakka oychchekketa. Taani intteyyo tumaa odays, Aawaa intte ta sunttan aybakka oychchikko, I intteyyo hegaa immana.
24 Hanno gakkanawu intte ta sunttan issibaakka oychchibeekketa. Intte keehi ufayttana mala oychite, yaatikko, intte ekkana.
25 “Taani intteyyo hageeta leemisotun yootaas. Taani intteyyo leemisotun yootenna wodee yaana, shin taani Aawaabaa intteyyo geeshshada yootana.
26 He gallassi Aawaa intte ta sunttan woossana; taani hegaa giyoy, intte gishshaa woossana gaanaassa gidenna.
27 Ayssi giikko, intte tana siiqiyo gishshawunne taani Xoossay kiittin yiidoogaa ammaniyo gishshawu, Aaway inttena siiqees.
28 Taani Aaway kiittin ha saꞌaa asaakko yaas. Haꞌꞌi taani ha saꞌaappe Aawaakko bays.”
29 Yesuusa kaalliyageeti hagaadan giidosona: “Godawu, haꞌꞌi neeni geeshshada yootaasa, qassi ayba leemisonne yootakka.
30 Neeni ubbabaa eriyo gishshawu, ooninne nena oychchana koshshennaagaa nuuni haꞌꞌi eroos. Hegaappe denddidaagan, neeni Xoossay kiittin yiidoogaa nuuni ammanoos.”
31 Yesuusi etayyo hagaadan giis: “Intte haꞌꞌi ammaneetii?
32 Siyite! Intte ubbay tana yeggi bayidi intte soo soo biyo saatee yaana, qassi keehi matiis. Shin Aaway tanaara deꞌiyo gishshawu, taani xonꞌꞌa gidikke.
33 Ta baggaara intteyyo sarotettay deꞌana mala, taani intteyyo hageeta yootaas. Ha saꞌan intte waayettana, shin minnite! Taani ha saꞌaa iitatettaa xoonaas.”
