Yohaannisi Xaafidoogaa 17:1-26
17 Yesuusi hageeta yooti simmidi, saluwa xeelliiddi hagaadan woossiis: “Aawawu, wodee gakkiis. Ne naꞌay nena bonchchana mala ne naꞌaa bonchcha.
2 Neeni ayyo immidoogeetu ubbaayyo I merinaa deꞌuwa immana mala, asa* ubbaa bolli ayyo maataa immadasa.
3 Tumu Xoossay ne xalaala gidiya nenanne neeni kiittido Yesuus Kiristtoosa eriyogee* merinaa deꞌuwawu kaalettees.
4 Neeni taayyo immido oosuwa ootta wurssada nena saꞌan bonchchaas.
5 Hegaa gishshawu, Aawawu, taani ne miyyiyan deꞌanaadaaninne saꞌaa asay merettanaappe kase ne miyyiyan taayyo deꞌiya bonchchuwa demmanaadan ootta.
6 “Neeni tawu immido, kase ha saꞌaa asaa giddon deꞌiyageetuyyo taani ne sunttaa erissaas.* Eti kase nebaa, qassi neeni eta taayyo immadasa; eti ne qaalaa naagidosona.*
7 Neeni taayyo immido ubbabata taani neeppe demmidoogaa eti eridosona;
8 eti hegaa eriyoy neeni taayyo yootidobata taani etawu odido gishshataassa. Eti hegeeta ekkidosonanne taani ne gishshaa haasayanawu yiidoogaa tumuppe eridosona, qassi neeni tana kiittidoogaa ammanidosona.
9 Taani etabaa woossays; eti nebaa gidiyo gishshawu, neeni taayyo immidoogeetubaa woossaysippe attin, ha saꞌaa asaabaa woossikke;
10 tabay ubbay nebaa, nebaykka tabaa, qassi eti tana bonchchidosona.
11 “Taani neekko bays, hagaappe guyyiyan taani saꞌaa asaa giddon deꞌikke, shin eti saꞌaa asaa giddon deꞌoosona. Geeshsha Aawawu, nuuni issuwa gidiyogaadan etikka issuwa gidana mala, neeni taayyo immido ne sunttaa gishshawu eta naaga.
12 Taani etaara deꞌiyo wode, neeni taayyo immido ne sunttaa gishshawu eta naagaas; qassi taani eta qohiyabaa teqqido gishshawu, xaafettidabay polettana mala, bashshaa naꞌaappe attin, etappe issoynne xayibeenna.
13 Shin haꞌꞌi taani neekko bays; eti taagaadan tumuppe ufayttana mala, taani hageeta saꞌaa asaa giddon yootays.
14 Taani ne qaalaa etayyo yootaas, shin taani saꞌaa asaa mala gidennaagaadan, etikka saꞌaa asaa mala gidenna gishshawu, saꞌaa asay eta ixxiis.
15 “Neeni eta Dabloosappe naaganaadan woossaysippe attin, saꞌaa asaa giddoppe eta kessanaadan woossikke.
16 Taani saꞌaa asaa mala gidennaagaadan, etikka saꞌaa asaa mala gidokkona.
17 Tuman eta geeshsha;* ne qaalay tuma.
18 Neeni tana saꞌaa asaa giddo kiittidoogaadan, taanikka eta saꞌaa asaa giddo kiittaas.
19 Qassi etikka neeyyo oottanawu tuman dummati uttana mala, taani eta gishshaa neeyyo oottanaadan dummata uttaas.
20 “Taani hageetu xallaassa gidennan, eti yootiyobaa siyidi tana ammaniyageetuyyokka woossays;
21 Aawawu, hegee saꞌaa asay neeni tana kiittidoogaa ammanana mala, neeni tanaara issuwa gidiyogaadaaninne taani nenaara issuwa gidiyogaadan, etikka nunaara issuwa gidanaadaana.
22 Nuuni issuwa gidiyogaadan eti issuwa gidana mala, neeni taayyo immido bonchchuwa taani etayyo immaas.
23 Eti tanaara issuwa, neenikka tanaara issuwa; hegaa gishshawu, eti muleera issuwa gidana; neeni tana kiittidoogaanne tana siiqiyogaadan etakka siiqiyogaa saꞌaa asay hegan erana.
24 Aawawu, saꞌaa doomettaappe* kasekka neeni tana siiqiyo gishshawu, neeni taayyo immidoogeeti ta bonchchuwa beꞌana mala, eti taani deꞌiyosan tanaara deꞌanaadan koyays.
25 Xillo Aawawu, saꞌaa asay nena erenna, shin taani nena erays, qassi hageeti neeni tana kiittidoogaa eroosona.
26 Neeni tana siiqiyogaa mala siiquwa eti bessana malanne eti tanaara issuwa gidana mala, taani etawu ne sunttaa erissaas, qassi erissana.”
Footnotes
^ Mise, “asho.”
^ Woykko “eri eri biyogee.”
^ Woykko “qonccissaas.”
^ Woykko “azazettidosona.”
^ Woykko “Geeshsha oosuwa oottanaadan eta dummaya wotta.”
^ Hagee Addaamenne Hewaani naata bessiyaba.
