Yohaannisi Xaafidoogaa 18:1-40
-
Yihuday Yesuusa aattidi immiis (1-9)
-
Pheexiroosi bisuwan shociis (10, 11)
-
Yesuusa Haanna soo efiidosona (12-14)
-
Pheexiroosi erikke giido koyruwa (15-18)
-
Yesuusi Haanna sinttan (19-24)
-
Pheexiroosi erikke giido naaꞌꞌanttuwanne heezzanttuwa (25-27)
-
Yesuusi Philaaxoosa sinttan (28-40)
-
“Ta Kawotettay ha saꞌaa kawotettatu mala gidenna” (36)
-
18 Yesuusi hegaadan gi woossi simmidi, bana kaalliyageetuura Qediroona zanggaaraappe hefinttan deꞌiya issi gade biis.
2 Yesuusinne A kaalliyageeti darotoo yan shiiqiyo gishshawu, A aattidi immiya Yihudaykka he sohuwa erees.
3 Hegaa gishshawu, Yihuday amarida wotaaddarata, qassi waanna kahinetunne Parisaawetu zabeta ekkidi yiis; eti xomppiya, bisuwanne bikilaa oyqqidi yiidosona.
4 He wode, Yesuusi bana gakkanabaa ubbaa eriyo gishshawu, sinttawu kiyidi eta, “Intte oona koyeetii?” yaagiis.
5 Eti ayyo, “Naazireete Yesuusa” yaagidi zaaridosona. I etayyo, “Taani A” yaagiis. A aattidi immiya Yihudaykka etaara eqqiis.
6 Shin Yesuusi etayyo, “Taani A” yaagin, eti guyye shiiqidi saꞌan kunddidosona.
7 Yaatin I zaarettidi, “Intte oona koyeetii?” yaagidi eta oychchiis. Eti, “Naazireete Yesuusa” yaagidosona.
8 Yesuusi hagaadan giis: “Taani A gidiyogaa intteyyo yootaas. Simi intte tana koyiyaba gidikko, ha asata yeddite.”
9 I, “Neeni taayyo immidoogeetuppe issoynne xayibeenna” giidoogee polettana mala hegee haniis.
10 He wode, Simoon Pheexiroosi bisuwa oyqqido gishshawu, kessidi gita kahiniya aylliya shocidi, A ushachcha hayttaa qanxxi oliis. He aylliya sunttay Malkkoosa.
11 Shin Yesuusi Pheexiroosayyo hagaadan giis: “Bisuwa A shoohuwan yegga. Taani uyanaadan Aaway immidobaa uyana koshshennee?”
12 Hegaappe guyyiyan, wotaaddarati, eta halaqaynne Ayhudatu zabeti Yesuusa oyqqidi qachchidosona.
13 Haanni Qayaafawu bollo gidiyo gishshawu, eti A koyro Haanna soo efiidosona; Qayaafi he laytti gita kahine.
14 Asaa gishshawu issi asi hayqqiyogee eta goꞌꞌiyogaa Ayhudata zoridaagee Qayaafa.
15 Simoon Pheexiroosinne Yesuusa kaalliya haray Yesuusa geeduwa kaallidi biidosona. Yesuusa kaalliya hankkuwa gita kahinee eriyo gishshawu, I Yesuusaara gita kahiniya keettaa geliis;
16 shin Pheexiroosi penggiya matan karen eqqiis. Yaatin gita kahinee eriyo, Yesuusa kaalliya hankkoy kiyidi, kariya naagiyarissi yootidi Pheexiroosa gelissiis.
17 Kariya naagiya ashkkariya Pheexiroosa, “Neenikka ha bitaniya kaalliyageetu yareeyye?” yaagaasu. I, “Taani gidikke” yaagiis.
18 Aylletinne zabeti saꞌay meeggiyo gishshawu, eti eettido tamaa matan eqqidi hoꞌꞌoosona. Pheexiroosikka etaara eqqidi hoꞌꞌees.
19 Waanna kahinee A kaalliyageetubaanne I tamaarissiyobaa Yesuusa oychchiis.
20 Yesuusi ayyo hagaadan giis: “Taani asa ubbaa sinttan haasayaas. Taani awudekka Ayhudati ubbay shiiqiyo shiiqo keettaaninne Xoossaa garuwan tamaarissaasippe attin, aybakka geeman yootabeykke.
21 Tana ayssi oychchay? Taani etayyo yootidobaa siyidaageeta oychcha. Hageeti taani ay yootidaakko eroosona.”
22 I yaagi simmin, matan eqqida zabetuppe issoy Yesuusa qinxxalliya baqqidi, “Waanna kahiniyayyo hegaadan zaaray?” yaagiis.
23 Yesuusi ayyo hagaadan giidi zaariis: “Taani haasayidobay likke gidana xayikko, likkennabay aybakko yoota,* shin taani haasayidobay likke gidikko, tana ayssi baqqay?”
24 Hegaappe simmin, Haanni I qashetti uttidaashin gita kahiniya Qayaafakko A yeddiis.
25 Simoon Pheexiroosi eqqidi tamaa hoꞌꞌees. Eti A, “Neenikka A kaalliyageetu yareeyye?” yaagidosona. I, “Taani gidikke” yaagidi kashi giis.
26 Gita kahiniya aylletuppe issoy, “Neeni aara deꞌiyagaa taani gaden beꞌabeykkinaa?” yaagiis. He ayllee Pheexiroosi hayttaa qanxxi olido bitaniya dabbo.
27 Shin Pheexiroosi haranttuwakka kashi giis, qassi sohuwara kuttoy waassiis.
28 Hegaappe simmin, eti Yesuusa Qayaafa sooppe biittaa haariyagaa soo efiidosona. He wode saꞌay guura. Shin eti Paasikaa qumaa maanawu koyido gishshawunne tunanawu koyibeenna gishshawu, biittaa haariyagaa soo gelibookkona.
29 Yaatin Philaaxoosi kare kiyidi eta, “Intte ha bitaniya mootiyobay aybee?” yaagiis.
30 Eti ayyo hagaadan giidi zaaridosona: “Ha bitanee mooranchcha gidennaakko,* nuuni A neeyyo aattidi immokko.”
31 Yaagin Philaaxoosi etayyo, “A efiidi intte higgiyadan A waatana koshshiyakko maacite” yaagiis. Ayhudati ayyo, “Oonanne woriyo maatay nuuyyo baawa” yaagidosona.
32 I mati ay mala hayqo hayqqanaakko qonccissanawu yootidobay polettana mala hegee haniis.
33 Philaaxoosi simmidi kawo keettaa gelidi Yesuusa xeegiis; yaatidi A, “Neeni Ayhudatu kawoo?” yaagiis.
34 Yesuusi, “Neeni hegaa tumuppe eranawu koyada oychchayiyye, woy haratuppe tabaa siyido gishshawu oychchay?” yaagiis.
35 Philaaxoosi hagaadan giidi zaariis: “Taani Ayhuda aseeyye? Ne asaynne waanna kahineti nena taayyo aattidi immidosona. Neeni oottidobay aybee?”
36 Yesuusi hagaadan giidi zaariis: “Ta Kawotettay ha saꞌaa kawotettatu mala gidenna. Ta Kawotettay ha saꞌaa kawotettatu mala gidiyakko, asay tana Ayhudatuyyo aatti immenna mala, ta asati olettana. Shin taani giidoogaadan, ta Kawotettay ha saꞌaa kawotettatu mala gidenna.”
37 Yaagin Philaaxoosi A, “Yaatin neeni kawoo?” yaagiis. Yesuusi hagaadan giidi zaariis: “Taani kawo gidiyogaa neeni odaydda deꞌaasa. Taani tumaayyo markkattanawu yelettaas, qassi hegawu asaakko* yaas. Tumaa bagga gidiya ubbay taani yootiyobaa siyees.”
38 Philaaxoosi ayyo, “Tumay aybee?” yaagiis.
I hegaa gi simmidi, haranttuwa Ayhudatukko kare kiyidi etayyo hagaadan giis: “Taani I mooridoba demmabeykke.
39 Hegaa bollikka, Paasikaa bonchchiyo wode intte meeziyadan taani intteyyo issi asa birshshana. Yaatin, taani Ayhudatu Kawuwa intteyyo birshshanaadan koyeetii?”
40 Yaagin eti bantta qaalaa xoqqu oottidi, “Barbbaana birshshappe attin, ha bitaniya birshshoppa!” yaagidosona. Barbbaani pangga.
