Yohaannisi Xaafidoogaa 19:1-42
19 Hegaappe guyyiyan, Philaaxoosi Yesuusa efiidi shocanaadan oottiis.
2 Qassi wotaaddarati agunttaa xaaxidi A huuphiyan wottidosonanne zoꞌꞌo afalaa A mayzzidi,
3 akko shiiqidi, “Ayhudatu Kawuwawu, saro!” yaagidi A qilliicciyogaa doommidosona. Qassi eti A qinxxalliya baqqidosona.
4 Philaaxoosi haranttuwa kare kiyidi etayyo hagaadan giis: “Siyite! Taani I mooridobaa aybanne demmabeennaagaa intte erana mala, intteyyo A kare kessaas” yaagiis.
5 Yaanin, Yesuusi xaaxettida agunttaa huuphiyan wottidinne zoꞌꞌo afalaa maayidi kare kiyiis. Qassi Philaaxoosi etayyo, “Bitanee hagaa!” yaagiis.
6 Shin waanna kahinetinne zabeti A beꞌidi, bantta qaalaa xoqqu oottidi, “A mittan kaqqa! A mittan kaqqa!” yaagidosona. Philaaxoosi etayyo, “Taani an ayba mooronne demmabeykke; intte A efiidi worite”* yaagiis.
7 Ayhudati ayyo hagaadan giidosona: “Nuuyyo higgee deꞌees, qassi I bana Xoossaa naꞌa giido gishshawu, higgee yootiyogaadan, I hayqqana bessees.”
8 Philaaxoosi eti giidobaa siyidi, kaseppe aaruwan yayyidi,
9 simmidi kawo keettaa gelidi Yesuusa, “Neeni awappe yaadii?” yaagiis. Shin Yesuusi ayyo aybanne zaaribeenna.
10 Yaatin Philaaxoosi ayyo hagaadan giis: “Neeni taayyo zaarikkii? Nena birshshanawu woy woranawu* taayyo maatay deꞌiyogaa erikkii?”
11 Yesuusi ayyo hagaadan giidi zaariis: “Saluwappe imettennaakko neeyyo ta bolli ayba maatinne baawa. Tana neeyyo aattidi immida bitaniya nagaray neegaappe aadhdhiyoy hegaassa.”
12 Hegaa gishshawu, Philaaxoosi A birshshiyo oge qoppanawu maliis, shin Ayhudati bantta qaalaa xoqqu oottidi, “Neeni ha bitaniya birshshikko, Qeesaara dabbo gidakka. Bana kawo giya ubbay Qeesaaraara gaaddetees”* yaagidosona.
13 Hegaappe guyyiyan, Philaaxoosi hegaa siyi simmidi, Yesuusa kare kessidi, Ibraawettuwan Gabataa giyo, shuchchay hiixettido sohuwan deꞌiya daannaa oydiyan uttiis.
14 He gallassay Paasikawu koshshiyaba giigissiyo gallassa; he wode saꞌay usuppun saate heera. Qassi I Ayhudatuyyo, “Beꞌite! Hagee intte kawuwa!” yaagiis.
15 Shin eti bantta qaalaa xoqqu oottidi, “A xayssa! A xayssa! A mittan kaqqa!” yaagidosona. Philaaxoosi etayyo, “Intte kawuwa woroo?” yaagiis. Waanna kahineti, “Nuuyyo Qeesaarappe hara kawoy baawa” yaagidi zaaridosona.
16 Yaatin, Yesuusi mittan kaqettana mala, Philaaxoosi A etayyo aattidi immiis.
Hegaa gishshawu, eti Yesuusa efiidosona.
17 Yesuusi kaqettana mittaa bawu tookkidi, Guuggiya Sohuwa giyosaa baanawu denddiis; he sohoy Ibraawettuwan Golggottaa geetettees.
18 Yan eti Yesuusa mittaa bolli misimaariyan xishidosona; appe naaꞌꞌu bagga miyyiyan hara naaꞌꞌu asati kaqettidosona.
19 A mootido gaasuwakka xaafidi, Philaaxoosi mittaa bolli wottiis. Xaafettidaagee hagaadan gees: “Ayhudatu Kawuwa Naazireete Yesuusa.”
20 Yesuusa mittan kaqqido sohoy Yerusalaameyyo mata gidiyo gishshawu, daro Ayhudati he xaafettidaagaa nabbabidosona, qassi hegee Ibraawettuwan, Laatiniyaninne Giriikettuwan xaafettiis.
21 Shin Ayhudatu waanna kahineti Philaaxoosayyo hagaadan giidosona: “I, ‘Taani Ayhudatu kawo’ yaagidoogaa xaafappe attin, ‘Ayhudatu Kawuwa’ yaagada xaafoppa.”
22 Philaaxoosi, “Taani issitookka xaafaychchaas” yaagiis.
23 Wotaaddarati Yesuusa mittan kaqqidi, I bollaara maayido maayuwa oyddawu shaakkidi issuwa issuwa ekkidosona; I garssaara maayido maayuwakka eti ekkidosona. Shin garssa maayoy huuphessaappe tohossaa gakkanawu sihoy baynnan dadettida maayo.
24 Hegaa gishshawu, eti issoy issuwawu hagaadan giidosona: “Hagaa daakkokko, shin oossa gidanaakko shaakkanawu saamaa yeggana.” Geeshsha Maxaafay, “Eti ta afalaa shaakki ekkidosona, qassi ta maayuwan saamaa yeggidosona” yaagiyogee hegan polettiis. Wotaaddarati oottidobaykka hegaa.
25 Shin Yesuusi kaqettido mittaa matan A aayyiya, A aayee michchiya, Qaliyopha machchiya Mayraamanne Magddala Mayraama eqqidosona.
26 Hegaa gishshawu, Yesuusi A aayyiyanne A kaalliya A siiqoy matan eqqidaageeta beꞌidi, ba aayeessi, “Taayee, hagaappe guyyiyan I ne naꞌaa!” yaagiis.
27 Hegaappe simmin, Yesuusi ba siiquwayyo, “Hagaappe guyyiyan A ne aayyiyo!” yaagiis. He saatiyappe doommidi, Yesuusi siiqiyogee O ba soo efiis.
28 Hegaappe guyyiyan, Yesuusi ubbabay polettidoogaa eriis, yaatidi I, “Tana saammees” yaagiis. Geeshsha Maxaafay yootiyobay hegan polettiis.
29 Caala woyne eessay kumido issi xaaroy he sohuwan uttiis. Hegaa gishshawu, eti caala woyne eessay kumido ispponjjiya mittaa* xeeran wottidi A doonaakko shiishshidosona.
30 Yesuusawu caala woyne eessaa immi simmin I, “Polettiis!” yaagidi, ba huuphiya ziqqi oottidi hayqqiis.*
31 He gallassay Sambbatawu koshshiyabaa giigissiyo gallassa gidiyo gishshawu, Ayhudati anhay Sambbatan mittan kaqettidi takkanaadan koyibookkona (he Sambbatay gita Sambbata); anhata gediya menttidi mittaappe wottanaadan eti Philaaxoosa oychchidoy hegaassa.
32 Hegaa gishshawu, wotaaddarati biidi, koyro bitaniya gediyanne Yesuusa miyyiyan kaqettida hankko bitaniya gediya menttidosona.
33 Shin eti Yesuusakko gakkidi, I hayqqidoogaa beꞌido gishshawu, A gediya menttibookkona.
34 Shin wotaaddaratuppe issoy Yesuusa miyyiya tooran caddin, sohuwara suuttaynne haattay goggiis.
35 Hegaa beꞌidaagee hagaa markkattiis, qassi I markkattiyobay tuma; inttekka ammanana mala, I yootiyobay tuma gidiyogaa I erees.
36 “A meqettaappe issoynne meqqenna”* geetettidi xaafettidaagee polettana mala he ubbabay haniis.
37 Qassi Geeshsha Maxaafay hara sohuwan, “Eti caddido izaawa xeellana” yaagees.
38 Hegaappe simmin, Yooseefa giyo, Armmaatiyasa katamaa asi Philaaxoosi ayyo Yesuusa anhaa immanaadan oychchiis; Philaaxoosi eeno giido gishshawu, I biidi Yesuusa anhaa efiis. Yooseefi Yesuusa kaalliya asa gidikkonne, Ayhudatuyyo yayyiyo gishshawu, hegaa asawu yootibeenna.
39 Qammi Yesuusakko kase yiida Niqoodimoosikka 30 kilo giraame gidiya sawiya qimametu walahaa* ekkidi yiis.
40 Yaatin, eti Ayhudatu mooguwa wogaadan, he qimameta liinuwa afalan wottidi Yesuusa anhaa xaaxidosona.
41 Qassi A worido* sohuwan issi gadee deꞌees; he gaden ooninne moogettibeenna ooratta duufoy deꞌees.
42 Ayhudatu baalawu koshshiyabaa giigissiyo gallassa gidiyo gishshawunne duufoy matasan deꞌiyo gishshawu, eti Yesuusa anhaa yan wottidosona.
Footnotes
^ Woykko “mittan kaqqite.”
^ Woykko “mittan kaqqanawu.”
^ Woykko “Qeesaara doonan bochchees.”
^ Griikettuwan, “hissopos.” Hegee 1.8 meetire gidiyagaa dicciya, Pilisxeema biittan deꞌiya mittaa gidennan aggenna.
^ Mise, “ba ayyaanaa yeggi bayiis.”
^ Woykko “kinchchettenna.”
^ Woykko “phuphphurettida qimameta.”
^ Woykko “mittan kaqqido.”
