Yohaannisi Xaafidoogaa 2:1-25
2 Heezzantta gallassi, Galiilan deꞌiya Qaana kataman issi asi bullachchiis, qassi Yesuusa aayyiya yan deꞌawusu.
2 Yesuusinne A kaalliyageetikka he bullachchawu shoobettidosona.
3 Woyne eessay wurana hanin, Yesuusa aayyiya ayyo, “Etawu woyne eessay baawa” yaagaasu.
4 Shin Yesuusi iyyo, “Maccaasee, tananne nena hegan gattiyabi aybee?* Ta wodee gakkiichchibeenna” yaagiis.
5 A aayyiya ushshaa aattiyageeta, “I yootiyobaa aybanne oottite” yaagaasu.
6 Ayhudatu wogaadan meecettanawu issoy issoy 44ppe 66 litiro gidiyagaa oyqqiya, shuchchaappe merettida usuppun wogga haattaa baattati yan deꞌoosona.
7 Yesuusi eta, “Baattatun haattaa kunttite” yaagiis. Yaagin eti baattata walxxi oottidi kunttidosona.
8 Yaatin I eta, “Haꞌꞌi appe duuqqidi bullachchawu aawatettay imettidoogawu efiite” yaagiis. Yaagin eti efiidosona.
9 Bullachchawu aawatettay imettidoogee woyne eessa kiyida haattaappe ganxxi ekkiis; I he woyne eessaa dendduwa erennan (haattaa duuqqida asati eriyaba gidikkonne), mishiraa xeegidi,
10 ayyo hagaadan giis: “Hara asay ubbay loꞌꞌo woyne eessaa koyro kessi wottees, yaatidi asay mattottiyo wode, made made giyagaa kessees. Shin neeni loꞌꞌo woyne eessaa hanno gakkanawu wotta aggadasa.”
11 Hagaa Yesuusi Galiilan deꞌiya Qaana kataman oottiis; hagee I oottido malaaliyabatuyyo doometta; hegan I ba bonchchuwa qonccissiis, yaatin A kaalliyageeti A ammanidosona.
12 Hegaappe guyyiyan, I, A aayyiya, A ishatinne A kaalliyageeti Qifirinaahooma wodhdhidosona, shin yan daro gallassaa takkibookkona.
13 He wode Ayhudatu Paasikay matatti uttiis, yaatin Yesuusi Yerusalaame kiyiis.
14 I Xoossaa garuwan meheta, dorssatanne haraphpheta bayzziyageeta, qassi miishshaa laammiyageeti bantta xaraphpheezaa matan uttidaageeta beꞌiis.
15 Hegaa gishshawu, I xurqqayiya dooqqi simmidi, eta ubbaa eta dorssatuuranne eta mehetuura Xoossaa garuwappe kessiis, qassi miishshaa laammiyageetu santtimeta laalidi, eta xaraphpheezata aatti yeggiis.
16 Qassi haraphpheta bayzziyageeta I, “Hageeta hagaappe diggite! Ta Aawaa keettaa zalꞌꞌe keetta* oottiyogaa aggite!” yaagiis.
17 A kaalliyageeti, “Ne keettaa siiqoy* ta gomppaa xuuggees” geetettidi xaafettidaagaa hassayidosona.
18 Hegaa gishshawu, Ayhudati A, “Hageeta oottanawu neeyyo maatay deꞌiyogaa ayba malaatan nuna bessuutee?” yaagidosona.
19 Yesuusi etayyo, “Ha Xoossaa garuwa qolite, yaatin taani heezzu gallassan A essana” yaagiis.
20 Yaagin Ayhudati, “Ha Xoossaa garoy 46 layttan keexettiis, yaatin neeni A heezzu gallassan essanee?” yaagidosona.
21 Shin I ba bollaa Xoossaa garuwa giis.
22 Gidoppe attin, I hayquwappe denddido wode, A kaalliyageeti I issi issitoo hegaadan giidoogaa hassayidosona, qassi geeshsha maxaafatanne Yesuusi yootidobaa ammanidosona.
23 Qassi I Yerusalaamen Paasikaa baalan malaaliyabata oottiis; hegaa beꞌidi daro asay A sunttan ammaniis.
24 Shin Yesuusi eta ubbaa eriyo gishshawu, muleera eta ammanibeenna;
25 qassi I asa wozanan deꞌiyabaa eriyo gishshawu, ooninne asabaa ayyo markkattana koshshibeenna.
Footnotes
^ Mise, “Taayyonne neeyyo aybee, maccaasee?” Hagee maayettibeennaagaa bessiya ziba haasaya. “Maccaasee” giidoogee bonchchennaagaa bessiyaba gidenna.
^ Woykko “giya.”
^ Mise, “yeemoy.”
